MUNDËSIA E AGRON SHEHAJT

Ai mund të ishte tani duke drekuar apo darkuar mes njerëzve më me influencë në botë, mes biznesmenëve të suksesshëm, atyre që kanë bërë emër, histori në botën e biznesit, medias apo politikës. Në një mbrëmje pushimi në Maldive, buzë detit në një resort luksi me të madhin Andrea Bocelli, sipërmarrësin Matteo Zoppas, i cili drejton biznese shumëkombëshe me vlerë miliona euro, drejtorin e gazetës “La Repubblica”, futbollistin Oliver Giroud (Zhiru), Paolo Fiorellin, president i kompanisë postare botërore apo influenceren e njohur Chiara Ferragni. Njëjtë siç ishte atë natë, kur një darkë mes këtij niveli, u bë lajm në revistën Prestigjoze “Forbes”. Por jo, ai ka zgjedhur të bëjë politikë në Shqipëri dhe për më tepër, t’u thotë shqiptarëve të vërtetën, në një kohë kur ne, na janë mësuar edhe veshët tashmë me gënjeshtrat që kemi dëgjuar nga politikanët këto 30 vite. E kam fjalën për Agron Shehajn. Dhe duke ditur gjithë atë rrjet njohjesh e kontaktesh të tij për të cilët shkroi gjatë “Forbes”, e pyes troç: Po ç’të duhet Shqipëria, Agron? Pse ato para që ke nuk i shijon në një vend të sigurt, mes atij rrethi elitar, ku nuk të rrezikon asgjë e askush, por vjen këtu dhe i hyn një beteje që nuk i dihet si përfundon? “Shqipëria është vendi ku kam lindur. Është vendi të cilit i kam borxh gjithçka. Shqipëria më ka dhënë jetën. Në fund të fundit, është vendi im. Unë mund të bëj politikë edhe në Itali, por Shqipëria është e para, është ajo që më përmbush si njeri dhe e ndjej si detyrim. Është detyrë” , më thotë Agroni, me sigurinë dhe besimin e një njeriu që e di se është duke bërë gjënë e duhur. E në fakt ka shumë nga ata, që duke e parë modelin perëndimor, frymën europiane që ai përcjell në politikë, por edhe për të qenit aq idealist, mendojnë se Agroni është për një “terren të huaj”, jo shqiptar. Por Agroni nuk e sheh kështu. Nga takimet që ka përditë në çdo cep të Shqipërisë ku është duke zhvilluar një tur bisedash të hapura, ai thotë se qytetarët janë të etur për një alternativë të re, për njerëz të vërtetë. Dhe ajo që vihet re dhe është e pazakontë në ligjërimin e Agronit gjatë këtyre takimeve, është fakti që nuk u thotë shqiptarëve, siç kemi dëgjuar shpesh politikanët në kohë fushatash, premtime të natyrës: “Ky është fundi i Edi Ramës! Në zgjedhjet e 2025-ës Rama do jetë i mbaruar, sepse unë do ta mund”! Përkundrazi, ai u thotë se është e vështirë të mundësh Ramën! Në dukje një absurd për të gjithë ata që bëjnë përditë politikë, dhe synojnë të marrin sa më shumë vota duke përdorur armë nga më të ndryshmet, deri te populizmi e nacionalizmi. Por ai, nuk do t’ia dijë nëse kjo e dëmton, siç shumë mendojnë. Ai është i bindur që shqiptarëve u duhet thënë e vërteta. “Situata në Shqipëri është shumë e rëndë. Pushteti ka shtrirë rrënjët kudo, shumë thellë. Ne nuk jemi një vend demokratik ku qytetarët, ditën e zgjedhjeve, shkojnë të votojnë krejtësisht të lirë. Këtu jemi në një sistem ku mazhoranca ka kthyer zgjedhjet në një formalitet, e ka bërë rotacionin politik të pamundur se ka kapur cdo pushtet, pushtetin politik, ka kapur ekonominë, përdor shtetin, është e lidhur me krimin. Do ishte e pasinqertë nga ana ime, madje do ishte një mashtrim, t’u thoja njerëzve: Hë se ky është një pushtet që ne do e rrëzojmë kollaj fare në zgjedhjet e ardhshme! Duhet të fillojmë të themi të vërtetën. Duhet ta shohim të vërtetën në sy. Ekonomia është e kapur, opinioni është i manipuluar përmes ndikimit në media dhe çdo skandal nuk ka asnjë efekt elektoral” . Po duke i thënë këtë të vërtetë çfarë fiton? Sepse me ç’shohim, këtu fituesit më të mëdhenj janë ata që dinë shumë mirë të luajnë me propagandën, nacionalizmin… Ata kanë popullaritet sot. Çfarë fiton ti me këtë të vertetë që u thua njerëzve?- e pyes sërish Agronin. “Unë në radhë të parë nuk shoh se çfarë fitoj, por çfarë është e drejtë dhe e duhur. Unë mendoj që duhet thënë e vërteta. Elektorati ka nevojë për dikë që u thotë të vërtetën, pavarësisht nëse është në favorin tim apo jo. Mua shumë njerëz më thonë: Agron, nuk mund t’i thuash këto gjëra se pastaj demoralizon elektoratin. Por elektorati nuk është budalla, nuk është se nuk i sheh gjërat dhe po nuk ia thashë unë, nuk i kupton. Elektorati e di më mirë se unë që nuk janë ata që kanë në dorë fatin e politikanëve por është e kundërta. Qeveria ka në dorë fatin e qytetarëve. Dhe ndryshimi nis pikërisht duke parë të vërtetën në sy. Nëse në këto 30 vjet, as opozita nuk ka thënë të vërtetën me frikën se: obobo, do demoralizojmë elektoratin, atëhere çfarë na dallon ne nga mazhoranca?! Sepse mazhoranca gënjen, nëse dhe opozita gënjen, atëherë i bie jemi të gjithë njësoj! Nëse unë dua të sjell ndryshimin, nuk mund ta bëj këtë duke qenë më nacionalist se Rama, më populist se Rama, më dinak se Rama. Ajo që bën diferencën është kontrasti. Dhe kontrasti i parë është fakti që unë nuk mendoj çfarë fitoj apo nuk fitoj, por të them të vërtetën. Thjesht të vërtetën. E vërteta, e vërteta, e verteta. Për këtë ka nevojë ky vend. Mos harro që ne vijmë nga një regjim komunist ku për 45 vjet na thanë vetëm mashtrime, mashtrime… Kemi jetuar në një “truman shoë” ku të gjithë e shikonin të vërtetën por askush nuk guxonte ta thoshte. Ne nuk mund të vazhdojmë të bëjmë të njëjtën gjë” , thotë Agroni i cili në këto zgjedhje futet në një moment kur në skenën politike kanë lindur disa parti të reja si ajo e Adriatik Lapajt, Endri Shabanit apo Arlind Qorrit. E në këtë kontekst e pyes se çfarë ka ndryshe ai nga ata, çfarë e diferencon. “Një gjë është pikërisht kjo. Duke mos qenë populist e duke thënë të vërtetën. Në Shqipëri, një nga problemet është fakti që këta që kanë pushtetin, nuk kapin vetëm ekonominë, nuk kapin vetëm mediat por tentojnë të kapin dhe opozitën. I vërsulen opozitës. Opozita ka përgjegjësitë e veta, por është viktimë sepse jo të gjithë janë qendrestarë, jo të gjithë kanë kurajon, lirinë, mundësinë, t’i qendrojnë sulmeve të qeverisë. Dikush edhe thyhet” , thekson Agroni, teksa shton se “kush kërkon besimin e qytetarëve, duhet të tregohet i pathyeshëm!” E në këtë pikë, ai duket se i ka dhënë provat si denoncues i disa prej skandaleve më të mëdha të qeverisë, siç ishte Unaza e Madhe që pasoi me ndryshimin e qeverisë, me largimin e Damian Gjiknurit, apo skandali i burrit investitor strategjik të ish-ministres Olta Xhaçka. Pas këtyre denoncimeve, Shehajt i bllokuan edhe disa zyra të një prej bizneseve të tij, por sërish nuk hoqi dorë. Disa ditë më parë madje, ministri i Drejtësisë Ulsi Manja i tha hapur nga foltorja e Kuvendit që “ky shtet do duhet të merret seriozisht me ty”, ndaj e pyes nëse ka frikë që në këtë betejë me pushtetin, do përfundojë duke i hapur punë vetes me bizneset e tij. “Politika ka një kosto. Unë nuk e di deri në ç’pikë do shkojnë ata, por di që sa më tepër unë të bëhem kërcënim për pushtetin e tyre, aq më tepër ata do përdorin pushtetin në mënyrë të paligjshme dhe të padrejtë për të më sulmuar” , thotë ai, i vetëdijshëm për çfarë është duke bërë dhe aspak i surprizuar për pasojat. “Opozitë nuk bën vetëm politika; bën edhe media, edhe shoqëria civile por shiko nëse kanë vuajtur ndonje pasojë. Në disa raste madje, jo vetëm nuk kanë vuajtur pasojat, por kanë përfituar. Nga kjo kuptohet që opozita nuk është bërë siç duhet. Këtu nuk ka nevojë as për investigime kushedi, se flasim për vendin më të korruptuar të Europës. Këtu korrupsioni është sheshit! Këta dhe ato që përfitojnë i përfitojnë hapur në emër të bashkëshorteve të tyre. Drejtorët e Bashkisë kishin kompanitë e tyre, ish ministri i Shqndetësisë ka rrjetin e farmacive më të mëdha në Shqipëri.” Shehaj ndjen revolte edhe për atë që po ndodh me Jugun e Shqipërisë, me pronat e qytetarëve, nga Vlora në Ksamil. Ai thotë se pushtetarët janë kthyer në zaptues të hapësirave në jug duke ndërtuar resorte e duke i lënë pronarët e vërtetë të tokave, të varfër. Për të, nga turizmi po përfiton një pakicë e vogël njerëzish. “Ekonomia shqiptare do rritet në momentin që hapet. Duhet një rritje dyshifrore e ekonomisë për të sjellë mirëqenie për të gjithë dhe zhvillimi i turizmit është një mundësi e madhe. Nëse investitorët janë ministrat dhe familjarët e tyre s’ka dyshim që kjo mundësi nuk ka për të sjellë rezultatet e duhura dhe shumica e shqiptarëve do vazhdojnë të largohen. Modeli i korrupsionit përvecse është i padrejtë, nuk mund të sjellë mirëqenie për shumicën”. Por çfarë sjell ai të re? “Unë synoj te sjell një model tërësisht ndryshe nga sa kemi parë, një parti të djathtë, një parti të vërtetë, që nuk thotë vetëm atë që i intereson, që flet për problemet reale. Njerëzit janë të zhgënjyer, por nuk kanë hequr dorë. Janë të vetëdijshëm që vetëm përmes politikës, mund të ndryshojë një vend. Nuk ka asnjë mënyrë tjetër. E rëndësishme është qëndrueshmëria. T’i qëndrosh parimeve, vlerave dhe të vërtetës ”, thotë ai. E mbi këtë parim lindi “MUNDËSIA” e AGRON SHEHAJT Mundësia lindi si një bindje e Shehajt që në Partinë Demokratike nuk kishte më të ardhme, ai e kishte humbur besimin se PD do arrinte të rinovohej dhe të bëhej e besueshme për qytetarët. “Për një arsye të thjeshtë. Sepse ne propozonim të njëjtin model që kishte patur PD dikur në pushtet dhe që në njëfarë mënyre e përsëriti dhe Rama. Thjesht ndryshimi ishte që nuk ishin më të djathtët në pushtet, por të majtët. Modeli ishte i njëjtë: kush shkon më pushtet, kap shtetin dhe e përdor për interesa të ngushta, personale të pushtetarëve, të miqve të tyre, apo të atyre që ne i quajmë oligarkë. Ky është modeli që i është dhënë shqiptarëve deri tani. Dhe nga kjo lindi ideja e “MUNDËSISË”! Çfarë do doja unë nëse nuk do isha në politikë? Si qytetar i thjeshtë… Do besoja që gjërat do rregulloheshin vetvetiu; që ndryshimi do vinte nga qielli? Jo. Unë do kërkoja një mundësi” . Por pse ky emër? Shehaj rrëfen se vendimin për ta quajtur kështu partinë e mori teksa drekonte në një restorant me disa miq. “Kishim kohë që e diskutonim në çdo takim dhe po ngulja këmbë mbi faktin që pavarësisht se si mund të tingëllojë, MUNDËSIA është ajo që njerëzit kanë nevojë. Sepse ndonjëherë, këto analizat në dukje të thella, intelektualësh dhe politikanësh, bëhen të lodhshme. Duke drekuar, kamarieri i restorantit më tha se donte të largohej nga Shqipëria. E pyeta pse dhe më tha “Sepse këtu nuk ka asnjë mundësi!” Në atë moment thashë: Ja pra, pa e ngacmuar, pa i dhënë një hint, ai e tha vetë: Mundësia! Dhe po ta mendosh prindërit ikin jashtë për fëmijët e vet, sakrifikojnë për një mundësi për fëmijët e vet, të gjithë duam një mundësi”. Kushdo që ikën jashtë kërkon një mundësi dhe e vërteta është që shqiptarët, kur ikin jashtë kanë më shumë mundësi, edhe pse e nisin nga fillimi, nuk njohin gjuhën, nuk njohin kulturën, prapë gjejnë mundësi, ndryshe nga sa ndodh në Shqipëri. Ndaj kjo më bindi, se Mundësia është ajo për të cilën kanë nevojë qytetarët. SHEHAJ: 10 VITE PUNË PËR MILIONIN E PARË Biznesmenët thonë mos më pyet si e kam bërë milionin e parë, por si e ka bërë milionin e parë Agron Shehaj? “Kjo e milionit të parë është një legjendë besoj, ose mund të vlejë më shumë në Shqipëri sepse këtu janë pasuruar nëpërmjet lidhjeve politike, krimit, trafikut... Unë e kam bërë me shumë mund, me shumë sakrifica dhe më janë dashur shumë vite punë. Mund të më jenë dashur të paktën 10 vjet punë për milionin e parë” , rrëfen Shehaj i cili ka ndjekur “manualin” e sipërmarrësit të bërë vetë, duke nisur gjithçka nga zero. Ai nuk kishte asgjë, përveç dëshirës për të bërë diçka dhe një ideje biznesi. I mori borxh prindërve, të gjitha kursimet e jetës, 20 mijë euro, 20 të tjera te një i afërm, e pastaj borxhet sa vinin e shtoheshin. Befas, Agroni e gjeti veten të zhytur në borxhe për shkak të parave që po i investonte në fillimet e biznesit të tij. “U deshën vite të mbuloja kostot. Pastaj jo çdo gjë që fitoja, shkoja e tërhiqja sepse doja ta riinvestoja. Pra nuk merrja dhe i fusja në bankë por merrja dhe i riinvestoja. Me pak fjalë, para se të bëja milionin e parë, është dashur shumë punë e sakrifica” , rrëfen Agroni i cili nuk harron as momentet e dëshpërimit në ato fillime kur ka menduar edhe të tërhiqet por frika nga dështimi e bëri të mos hiqte dore dhe në fund t’ia dilte. A ka ai të njëjtën frikë, si në biznes, edhe sot në politikë, pra frikën se mos dështon? “Jo. Sot është një fazë tjetër e jetës. Sot më shumë se frika nga dështimi, vlen bindja se kjo është gjëja e duhur. Jam totalisht i bindur që po bëj gjënë e duhur. Nëse në biznes mund të më ketë kaluar nëpër mend ideja se mos nuk ishte biznesi i duhur, mos po gaboja, se mos nuk ishte momenti i duhur, këtu nuk kam dyshim që kjo është gjëja e duhur. Mund të ndodhë që jo të gjithë do e kuptojnë dhe do të më japin besim sepse politika është besim, por që kjo është gjëja e duhur, nuk kam asnjë dyshim… ”. NGA ANIJA E EMIGRANTËVE, NË ITALINË E MUNDËSIVE Agron Shehaj është larguar nga Vlora bashkë me prindërit dhe vëllain, në moshën 13 vjeçare, në vitin 1991 me një anije ushtarke. Pakkush e di se ky në foto është Agroni fëmijë, i veshur me xhiboks gri, një orë plastike në dorën e majtë dhe dy gishta të ngritura lart në shenjë triumfi. Kjo foto e tij shkrepur nga Guido Perini që po dokumentonte mbërritjen e emigrantëve shqiptarë në Bolzano, është bërë virale kudo në mediat italiane si “Corriere Della Sera', 'L'Espresso', “Rai Uno”, 'La Repubblica', apo edhe gjermanen 'Der Speigel' të cilat kanë shkruar për emigrantin shqiptar, i cili preku majat si biznesmen në Itali. Agroni, atë udhëtim në anije, nuk e sheh si një moment të vështirë të jetës, por një kthesë për të dhe familje. E megjithatë ka patur një moment që ishte më i vështiri i jetës së tij. “Kur shkuam në Itali na dërguan nja 3 muaj në kamp. Kampi u mbyll dhe më pas nisi shpërndarja dhe sistemimi i emigrantëve. Mirëpo ne nuk kishim shtëpi, të paktën për disa ditë sa të shkonim te një shtëpi e vogël që kishim gjetur. Prindërit e mi i çuan në hotel ndërsa mua dhe vëllain na çuan në një si tip konvikti. Dhe ajo natë ishte… (emocionohet) U ndjeva vërtet keq!” Nuk di çfarë mund t’i ketë kaluar nëpër mend një 13 vjeçari teksa priste që të gdhinte e të takonte prindërit e tij, por në fund ia vlejti gjithçka. “Për mua Italia ishte vendi i mundësive. Vija nga një vend ku im atë ishte futur mik për të më regjistruar në shtëpinë e pionerëve për elektriçist. Isha 12 vjeç. Bëra dy leksione, vajta dy herë dhe pastaj nuk vajta më. Dhe as nuk e kujtoja ç’ndodhi! Pas disa kohësh, pyeta tim atë sepse nuk më kujtohej pse nuk vajta më. E ai më tregoi që dikush më kishte parë te ky kursi për elektriçist te shtëpia e pionerëve dhe më kishin përjashtuar sepse vija nga një shtresë të persekutuarish dhe nuk mund të më jepej ajo mundësi, sepse dhe ajo ishte një mundësi e jashtëzakonshme për mua ”, rrëfen ai. Por sot që Agroni ia ka krijuar mundësitë vetes, është duke jetuar ditët më të mira, thotë se ajo ngjarje e ka ndikuar në njeriun që është sot. “Atëherë isha fëmijë dhe nuk e kuptoja mirë, por tani them me vete: Unë jetova 13 vjet në atë regjim dhe shiko sa impakt të madh kishte ai regjim mbi jetën time dhe mundësitë që kisha. Dhe gjithmonë më ka bërë përshtypje mungesa e mundësive të prindërve të mi. Padrejtësia. Jo për jetën e varfër, sepse të gjithë pak a shumë ashtu ishin, por çfarë më bënte përshtypje ishte mohimi i mundësive, mungesa e lirisë, një jetë e tërë ku ti nuk vendos dot për jetën tënde, sepse dikush tjetër ka vendosur për ty. Për mua është e paagjimueshme por ky ishte realitet për prindërit e mi dhe më pas kjo më ka ndihmuar në shfrytëzimin e mundësive që më janë dhënë. Kur duhej të vendosja mes një jete me më pak risqe, mbajtjes në kontroll të ambicies personale, apo investimit me më shumë risqje, kjo ka patur ndikim të jashtëzakonshëm në vendimet e mia sepse i kam thënë vetes: unë kam ato mundësi që prindërit e mi nuk i kanë pasur dhe unë nuk mund të mos i shfrytëzoj këto liri. Sepse për mua, mundësi do të thotë liri”. Ishte më në fund i lirë. Në Bolzano kreu studimet e shkollës së mesme, dhe në Firence, studimet e larta për Ekonomi. Ai beson se ekonomia është gjithçka. Vetëm përmes hapjes së ekonomisë, mund të vijë rritja ekonomike dhe mirëqenia në Shqipëri. SHEHAJ, LIDHJA ME TË DJATHTËN DHE HISTORIA E PERSEKUTIMIT TË FAMILJES Agron Shehaj rrjedh nga një familje e persekutuar, si nga e ëma, ashtu edhe nga babai. Ai rrëfen se i ati nuk e ka njohur kurrë babain e vet, sepse gjyshi i Agronit ka vdekur në burg kur babai i tij ishte vetëm 8 vjeç. Agroni kujton se prindërit e tij kanë bërë një jetë nën terrorin e vazhdueshëm se dita-ditës mund të arrestoheshin. Për të thënë të vërtetat e atij regjimi, Shehaj ka themeluar fondacionin “Kujto.al”, arkivën online mbi krimet e komunizmit, e ku gjenden mbi 50 mijë profile të të vrarëve, pushkatuarve dhe të internuarve nga regjimi komunist. Kujto.al publikon vazhdimisht shkrime, foto, video, rrëfime, dëshmi, apo dokumentarë që hedhin dritë mbi të kaluarën. E megjithatë Agroni është i keqardhur për faktin që në Shqipëri nuk kemi asnjë të dënuar për krimet e komunizmit apo qoftë dhe një ditë përkujtese për viktimat e atij regjimit. Fondacioni “kujto.al”, nuk është i vetmi. Ai ka themeluar fondacionin “Lumo Skëndo” me shkrimtarin dhe historianin Uran Butka i cili i kërkoi qeverisë të sillnin në Shqipëri eshtrat e Mit’hat Frashërit. SHEHAJ, DEPUTETI “PA RROGË” I KUVENDIT Agron Shehaj është deputet i Kuvendit, por prej 6 vitesh nuk e ka marrë kurrë rrogën. Kjo sepse vendosi ta dhurojë për 6 motrat jetime, një histori dramatike e bërë publike në vitin 2018, kur 6 vajzat e vogla të familjes humbën babain dhe brenda pak kohësh edhe nënën duke mbetur të vetme në fshatin e tyre në Poç të Kukësit. Shehaj nuk dëshiron të flasë për këtë, por kurioziteti dhe këmbëngulja ime për të ditur më shumë rreth kësaj marrëdhenieje, me bindjen që kemi nevojë për akte të tilla frymëzuese, fiton në fund. Koha ka kaluar, vajzat nuk janë më aq të vogla dhe xhaxhai që kujdesej për to, tanimë jeton më Gjermani me familjen e tij. Një ditë, ai e kontaktoi për ta falenderuar teksa në bisedë e sipër, Shehaj mësoi se vajzat nuk kishin bërë kurrë pushime, nuk kishin shkuar asnjëherë në det. Atë verë ai i ndihmoi që kjo të mos ishte më një ëndërr. Dhe falë rrogës mbi 2 milionë lekë çdo muaj, ato kanë mundur të bëjnë disi një jetë normale e çfarë është më e rëndësishmja, të shkojnë në shkollë e arsimohen. Agroni vetë është baba i dy djemve dhe një vajze. Bashkëshortja e tij, Enida është ndjekësja, mbështetësja, por edhe kritizierja e tij më e madhe. Ai tregon se shpesh ajo shqetësohet teksa e dëgjon duke debatuar me tone të ashpra. “Tani ka një orë në dorë që mat rrahjet e zemrës dhe më thotë: Unë kur të shikoj ty në parlament apo në debat, rrahjet e zemrës më shkojnë njësoj sikur bëj vrap, mbi 140, pa bërë asgjë, thjesht duke ndjekur. E përjeton çdo gjë bashkë me mua”. KONVENTA E MUNDËSISË Agroni po punon me një grup të rinjsh e të rejash që i qëndrojnë besnikë që nga koha kur kandidoi për herë të parë për deputet, pastaj për herë të dytë, mandej në garën e tij për kryetar PD-je përballë Lulzim Bashës, e sërish tani në këtë betejë të radhës. Ai ka ndërtuar një rrjet të quajtur “Next You” që i ka dhënë mundësi gjithkujt të bëhet pjesë dhe aktualisht ka rreth 2 mijë të rinj e të reja pjesë të nismës. Konventa e parë e themelimit të partisë “Mundësia” do të zhvillohet më datë 1 qershor në Pallatin e Kongreseve. Kjo konventë do jetë ndryshe nga ajo që kemi parë deri më sot nga partitë e tjera. Për herë të parë, do zbulohet logoja e partisë, themeluesit e saj, platforma dhe vizioni i saj para se të formalizohet në gjykatë. Ligji kërkon 3 mijë firma por, siç thotë Agroni, ky numër është tejkaluar tashmë para konventës ku pritet të marrin pjesë mijëra mbështetës dhe nismëtarë. Mundësia pritet të jetë një parti me organizim ndryshe, ku secili do ketë përgjegjësi dhe shans të tregojë veten. MUNDËSIA e Agron Shehajt synon mbi 10% të votave në zgjedhjet e ardhshme dhe kjo duket të jetë sipërmarrja më e madhe e jetës së tij.

Nga Anta Muçaku

Artikuj të ngjashëm Artikuj

102 kontejnerët me ngarkesën e errët të maskuar nën hijen e portit

Bjeshkët që marrosën turistët: Nga më e bukura Zoj, tek Xhubleta

Shqipëria 49’ nën lupën e CIA-s: Si t’i ndihmojmë grupet e rezistencës!

Silvana Braçe ekonomistja që pushtoi Skenën e Festivaleve

Ne mbushim 3 vite dhe kemi një dhuratë për ju!

51 ministrat që Edi Rama u bëri NDERIN E JETËS

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Inva Mula: Unë sopranoja e parë shqiptare në skenat evropiane

Bjeshkët që marrosën turistët: Nga më e bukura Zoj, tek Xhubleta

102 kontejnerët me ngarkesën e errët të maskuar nën hijen e portit

PORTO PALERMO, Ferri i të internuarve në Kalanë e bukur të Vasiliqisë

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Lojrat Olimpike gradojnë dy rusë në “Kolonelë” shqiptarë

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?