MBROJTJE me roje e kallash prokurorë e gjyqtarë nën kërcënim

Me dy truproja përkrah, Tonin Stërkaj gjyqtari i Shkodrës nxiton të hyjë në sallë ku palët po e presin për të drejtuar seancën e radhës. Asnjëri nga oficerët nuk lëviz nga salla, derisa gjyqi mbaron. Më tej shoqëruesit që e ruajnë, qëndrojnë jashtë zyrës. Ky rregull vazhdon kështu me vendim të Komisionit të Mbrojtes së Posaçme të KLGJ i mbledhur me urgjencë pak orë mbasi në portën e shtëpisë së Stërkaj në 29 prill, shpërtheu një sasi tritoli. 30 vjet në sistemin e drejtësisë, Gjyqtari është i bindur mbi dyshimet e tij se përse ja shpërthyen explozivin në banesë dhe këtë e shpjegon gjatë një interviste për NEWSBOMB. “Gjithçka ka ndodhur për shkak të detyrës”. Që prej vitit 1995 ka shpallur me mijëra vendime. Vetëm vitin e kaluar gjykoi 700 çështje, një barrë e madhe kjo për një njeri të ligjit dhe për shumë të tjerë që përballen me këtë situatë të mbingarkesës. Por gjyqtari 62 vjeçar nuk dorëzohet. “Nuk ndihem i frikësuar, por i stresuar; me të drejtë të Zotit jam, se nuk i kam hyrë kurrkujt të hak. E dyta, dua të falenderoj shtetin që m’u gjet afër në një kohë rekord. Aktualisht kam mbrojtje dhe siguri dhe shkoj përditë në krye të detyrës ”, artikulon Tonin Stërkaj. Kujton se çfarë ndodhi duke zbardhur dita e 29 prillit, shpërthimi që tronditi Shkodrën e që fatmirësisht u mbyll pa viktima. Por autorët ende nuk janë identifikuar. “Isha në gjumë, mbase ishte ora tre e natës kur dëgjova një shpërthim shumë të fortë. E dëgjova nga dritarja në krah nga vinte shpërthimi, u tundën muret. U zgjova. ‘Mjerë kush e pati këtë rrezik’, mendova. U zgjua gruaja dhe aty na ra zilja. Më thotë kojshia: “A e dëgjove shpërthimin?” -“Po”, thamë. Ka ndodhur në shtëpinë tënde, - më tha. Tentova me dalë, më kapi bashkëshorjta, më pyeti “ku je nis, ku je duke shkuar. Po sikur të jenë duke të pritur jashtë”. Pikërisht pas bisedës me njëri -tjetrin, gjyqtari telefonoi në numrin pa pagesë duke kërkuar policinë. “Pa u treguar kush jam, ju dhashë adresën dhe ata mbërritën menjëherë”, shton Stërkaj, në shtëpinë e të cilit, në pragun e portës në lagjen “Tom Kola” u ndez përmes fitilit dhe më pas shpërtheu 200 gramë tritol. Prokuroria ka administruar dëshmi e prova konfirmon se hetimet po kryhen veprat e kanosjes së gjyqtarit, shkatërrim prone dhe mbajtje municionesh. Kamerat e sigurisë e shfaqin autorin, itenerari i të cilit po gjurmohet teksa largohet nëpër rrugica. Por ai dhe personi që mund ta kenë porositur vazhdojnë të jenë të panjohur. Gjatë këtyre ditëve që kthyen edhe njëherë vëmendjen e institucioneve tek siguria e gjyqtarëve dhe prokurorëve që hetojnë, Tonin Stërkaj do të mbahet nën mbrojtje për 6 muaj. Mbrojtja fizike u vendos edhe në banesën e tij, ndërsa çifti është pyetur me shpresën se do të jepnin detaje apo pista pararpake. Një listë të dyshuarish janë nën hetim, persona të botës së krimit të gjykuar prej Stërkajt dhe që po verifikohen, pavarësisht se gjyqtari insiston se nuk ka patur asnjëherë kërcënim apo sinjale të ngjashme rreziku. Gruaja e Skerdilajt Konomit: Akoma pres… Në Shqipëri ngjarja më e rëndë që ka marrë jetën e një gjyqtari vijon të jetë atentati i telekomanduar që vrau në qendër të qytetit të Vlorës gjyqtarin Skerdilajd Konomi. Atentati ndodhur në 9 shtator 2011, pasoi në mbi një dekadë hetime që nuk dhanë asnjë rezultat, duke e lënë çështjen të dyzuar midis dyshimeve për atentat për shkak të detyrës, por edhe për shkak të konflikteve gjyqësore për 275 hektarë tokë në bregdet. Dosja u përcoll sa tek ish-prokuroria e krimeve të rënda (funksionale deri në dhjetor 2019), sa tek policia lokale e Vlorës për mbledhje shtesë provash. Më tej vrasja e gjyqtarit, u delegua për shkak të cilësive të tij të veçanta pranë SPAK që sërisht ja kaloi kompetencën auroriteteve lokale e më tej nga Vlora, çështja kaloi në Fier ku Skerdilajd Konomi kishte mbajtur për një kohë të gjatë detyrën e magjistratit civil. Me një hetim të dështuar, dhjetra hipoteza të ngritura e të hedhura poshtë, rezulati vazhdon të mbetet dëshpërues sidomos për familjen e gjyqtarit Skerdilajd Konomi, por edhe për miqtë e tij, disa ende mgjistratë që ju ka mbetur prej 2011 kujdesi i tepruar i kontrollit të automjetit nga frika e një pakoje shpërthyese. Bashkëshortja e gjyqtarit të vrarë flet eksklusivisht për Newsbomb duke thyer heshtjen e gjatë e dukë bërë apel për hetime jo vetëm për zbardhjen e vrasjes së telekomanduar alla mafioze, por edhe për të hetuar drejtësinë se çfarë bëri për proceset civile për pronat e familjes Konomi. “ Drejtësia dhe shteti duhet të angazhohen në shqyrtimin e thellë dhe të drejtë të tragjedisë tonë të dhimbshme. Eshtë e domosdoshme që sistemi aktual i drejtësisë, SPAK e të gjitha strukturat, të angazhohen në zbardhjen e kësaj ngjarjeje të paprecedentë, duke iniciuar një hetim të përgjegjshëm dhe transparent, për të gjitha proceset gjyqësore të stisura në vijim. Një angazhim i tillë, do të jetë thelbesor për të siguruar drejtësinë për familjen tonë dhe Skerdin, i cili ishte një gjyqtar i ri, i pashembullt në integritet dhe profesionalizëm, por që tragjikisht, u përball me një fund të pashlyeshëm, duke vdekur për të drejtën e tij të pronës”. Enkelejda Konomi i ka të hapura plagët e shpirtit që në këtë rast, bëhen akoma edhe më të rënda kur paqen e kërkuar nuk e gjen, kur vrasja e të shoqit gjyqtar mbetet pa autor, e kur autoritetet hetuan me ritmin e breshkës, e tani nuk hetojnë thuajse fare, për vrasjen e Skerdilajdit. Enkelejda sot nuk është e aftë të dallojë të mirën nga e keqja, por edhe atë që është e përshtatshme nga ajo e papërshtatshmja. Në mendjen e saj ende jehon aksioma se “i drejti digjet në vendin e rrënimit të vet” dhe kështu po shkon edhe historia e hetimeve për Skerdin që i mungon tanimë prej 2011-tës. E vërteta nuk ka forcë të dalë, ndërsa e keqja ka marrë rrugët duke u përhapur vetvetiu, dhe sa më shumë kalojnë vitet, aq më shumë mjegullohet shpresa se ngjarja një ditë do të zbardhet. Hetimet për çështjen ishin të përcipta, të padrejta. Por kjo nuk do të thotë asfare se Enkelejda ka hequr dorë nga kërkesa për drejtësi. Gjyqytarë e prokurorë nën mbrojtje Këshilli i Lartë Gjyqësor aktualisht ka vendosur nën mbrojtje dhe ruajtje - përveç gjyqtarit Stërkaj - edhe gjyqtaren e posaçme Irena Gjoka. Kjo e fundit u vleërësua se ishte nën rrezik pas akuzave politike dhe shqyrtimit të dosjes “Partizani”. Zonja Gjoka sipas ligjit për mbrojtjen e gjyqtarëve të posaçëm dhe prokurorëve të SPAK ruhet nga Garda e Republikës, që gjithashtu kishte së bashku me oficerë të RES nën ruajtje dhe mbrojtje edhe gjyqtaren antikorrupsion Etleva Deda. Por se sa të mbrojtur janë gjyqtarët dhe prokurorët, qofshin ata magjistratë që vendosin drejtësi ndaj të korrptuarve dhe krimit të organizuar, apo përfaqësues të prokurorive të zakonshme, i jep përgjigje mes shembujve, avokati Detar Hysi. Leart Haxhia, klienti i avokatit të njohur, - i cili ka mbi dy dekada mbrojtës në gjykatë i njerëzve të krimit të organizuar, - së fundmi u tradhëtua nga bashkëpunëtori i drejtësisë, Artan Tafani. I riu tregoi mes të tjerash se nën rrezik ishin dy prokurore, njëra Merita Sinani, magjistrate në Lushnjë dhe tjetra, Doloreza Musabelliu, prokurore në SPAK. Nisur nga kjo dëshmi të dyja prokuroret mbahen nën mbrojtje, por avokati Hysi insiston se dëshmia mbetet e pafaktuar me prova. Në këtë pikë Hysi thotë se siguria e gjyqtarëve e prokurorëve në Shqipëri garantohet vetëm gjatë fazave kur ata hetojnë dhe gjykojnë çështje të caktuara. “Dua të theksoj madje se disa prokurorë dhe gjyqtarë të atëhershëm (të ish-krimeve të rënda), u mbrojtën përkohësisht me bodyguard, pra për aq sa zgjat çështja. Më pas e kujtoj mirë se ata u lanë në mëshirë të fatit dhe pak a shumë u shfytëzuan nga shteti duke u harruar. Krimi është kërcënues në çdo kohë edhe atëherë kur gjyqtari dhe prokurori nuk është më në ruajtje. Këtu ka diçka që nuk shkon” , thotë avokati i njohur. Reagimi i SPAK SPAK thotë për NEËSBOMB se “sipas ligjit 95/2016, ligjit 96/2016 dhe VKM-në nr. 478, dt. 10.07.2019, i ndryshuar, të gjithë prokurorëvë të posaçëm (18) iu sigurohet mbrojtje personale me një truproje, punonjës i Gardës së Republikës”. Edhe selia e SPAK ruhet nga garda sipas një vendimi të këshillit të Ministrave të vitit 2019. “Sipas pikës 4 dhe 5 të VKM-së, në raste të veçanta dhe me kërkesë të Drejtuesit të Prokurorisë së Posaçme, sigurohet mbrojtje për anëtarët e familjes, banesat dhe/ose eskortë për prokurorët”, shton më tej prokuroria e posaçme për Neësbomb. Megjithatë, vitin e kaluar vendimi i këshillit të ministrave i 2019, u amendua dhe siç shpjegon zyrtarisht kjo prokurori “SPAK paraqiti komentet e tij, ku shumica e tyre u morën në konsideratë”. Pa treguar se sa është numri i çështjeve të referuara nga nisja e funksionimit të prokurorisë dhe gjykatave kundër korrupsionit dhe krimit të organizuar dhe Byrosë Kombëtare të Hetimit, kjo prokurori shpjegon se “në të gjitha rastet e kërcënimeve, SPAK ka marrë masat duke ju referuar kuadrit ligjor në fuqi”. Edhe gjykata e posaçme duke ju referuar VKM 809, të fundvitit 2023, në të cilën garda e Republikës shton strukturën, “si dhe me kërkesë për mbrojtje personale nga vetë gjyqtarët, garda kujdeset për sigurinë e pesë gjyqtarëve të kësaj gjykate. Që nga momenti i fillimit të kësaj gjykate ka patur vetëm një rast mesazhesh intimiduese referuar për hetim”, shpjegon gjykata e posaçme për NEWSBOMB , pas kërkesës së redaksisë për informacion. PROKURORËT E ZAKONSHËM Një provë e mbledhur, një gjurmë që të çon drejt atyre që mbas pushtetit të krimit do preferonin të ishin gjithmonë të pacënueshëm, por me autorë të padënuar dhe të pazbuluar, do të thotë jo vetëm që drejtësia mbetet e pavendosur, por edhe që rreziku prej krimeve të tyre, është aty. Në një lagje çfarëdo mund të jetë duke prekur edhe fëmijërinë e dikujt që si rastësisht i ofrohet drogë. Dikush tjetër, nuk është i sigurtë cilën nga zonat të frekuentojë, nga frika mos gjendet në mes të një vatre me plumba të shtënë për hesape të pambyllura. Nuk di si ti bëjë llogaritë me të ardhurat e tij kur krahasohet me standartin e fqinjit i cili pa punuar një ditë, ngjan se prodhon para, edhe pse ka dëgjuar se ai tjetri “merret me krime”. Ai tjetri mund të jetë një vrasës ende i pagjetur, gjobëvënës, kërcënues, trafikant, anëtar grupi, drejtues organizate kriminale. Për ta zbuluar duhet jo vetëm punë, përgjime me orë të stërgjatura, individë që duhen kthyer të penduar, apo dëshmitarë okularë që duhen bindur që të flasin, por edhe një lloj dedikimi vetmohues që kapërcen çdo lloj frike. Është një përplasje mes të dyja anëve që nuk mbyllet asnjëherë. Ekspertët e kriminalistikës pranojnë se sa më shumë ti afrohesh krimit aq më kërcënues bëhet ai dhe kjo ka ndodhur me shtatë prokurorë, dy prej të cilëve janë ish-prokurorë ndaj të cilëve Komisionet e Mbrojtjes kanë firmosur ruajtjen e tyre, eskortimin. Sa më shumë u afrohet drejtësia, aq më i rrufeshëm është reagimi i atyre që gjenden në krahun e krimit të organizuar. Që janë anëtarë grupesh kriminale. Të jesh prokuror dhe gjyqtar është sidomos e vështirë në qytetet Elbasan, Lushnjë, Durrës, Shkodër dhe natyrisht në Tiranë aty ku gjendet selia e zyrave të prokurorëve të posaçëm të SPAK. Ky mendim të vjen vetvetiu sapo merr në dorë listën e prokurorëve që veç kolegëve kanë një mbrojtje ekstra. Në këtë listë janë emrat e kryeprokurorit të SPAK Altin Dumani, Adnan Xholi, Doloreza Musabelliu, Ridvan Suka, Kreshnik Ajazi, Xhelian Seferi, Arjan Muça , Merita Selimi dhe Arjan Ndoja. Dhe në kushtet kur po vërehet se në muajt e fundit, kërcënimet janë shtuar, Këshilli i Lartë i prokurorisë i shpjegon NeësBomb se është kërkuar që edhe godinat e prokurorive të zakonshme të ruhen me policë me uniformë. “ Do propozohet kërkesa për ndryshim në ligjin për armët. Prokurorët që duan mund të kenë armë zjarri për ta mbajtur me vete ”, u shpreh kreu i KLP, Alfred Balla. Megjithatë i vetmi hetim që ka emra konkretë dhe gjendet në gjykatën e posaçme edhe për akuzën e vrasjes së funksionarëve publikë mbetur në tentativë, është sulmi i armatosur drejt automjetit me të cilin po udhëtonte prokurori i Durrësit Arjan Ndoja. Redjan Rraja, Ariol Halilaj, akuzohen jo vetëm për atentatin e dështuar ndaj prokurorit i shkarkuar aktualisht nga detyra, dhe ende nën ruajtje nga shteti. Por edhe për vrasjen e shoferit të prokurorit Andi Maloku. Të deklaruar fajtorë nga gjykata në fashikull përmendet se Rraja “dhe bashkëpuntorët e tij në krim kishin ndërmartrë të gjitha masat në krim duke ditur se Arjan Ndoja ushtronte detyrën e prokurorit. Kjo cilësi e Ndojës ishte e dukshme pasi siç ka rezultuar nga hetimi gjyqësor vepra është kryer në kuadër të grupit të strukturuar kriminal dhe si rezultat i një shkalle të lartë organizimi” përmendet në vendimin e treshes së gjyqtareve Irena Gjoka, Flora Hajredinaj dhe Flojera Davidhi. Nga viti 2019 Arjan Ndoja vazhdon nën mbrojtje dhe sipas dokumentit të KLP për mbrojtjen e veçantë të tij përmendet jo vetëm atentati në autostradën Tiranë Durrës por edhe dëshmia e tij në seancë . “Nuk i njoh autorët dhe motivet e ngjarjes. Kjo gjë u pranua edhe nga ana e prokurorisë së Posaçme kundër korrupsionit dhe krimit të organizuar” thuhet në dokument. Ndërkohë për këtë atentat ka gjithashtu edhe një hetim të dytë, për persona të shpallur në kërkim dhe të tjerë që janë ekspozuar gjatë përgjimeve dhe në aplikacione të ndryshme për planet në vazhdim për ta goditur prokurorin. I kontaktuar nga Newsbomb , prokurori Arjan Ndoja nuk dha asnjë koment mbi dyshimet e tij për sulmet por theksoi se autoritetet duhet të rivlerësojnë pagesën e çdo truproje në vend.

MBROJTJE me roje e kallash prokurorë e gjyqtarë nën kërcënim

Nga Anila Hoxha

Artikuj të ngjashëm Artikuj

Përtej Zvërnecit

PROTESTA E MEMEVE TË TALLESH NË ZGRIPIN E PAMUNDËSISË

35 vjet PS po sto pa m’thuhej si je?

Zvërneci, investimi që do ndryshojë historinë e turizmit shqiptar

Historia e protestave nga ’90: Çdo brez, revoltën e vet

3 italianët e protestës së PD: Qëlluam policinë me patate, për solidaritet!

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Vajzat e humbura

Lufta me Bulevardin

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

PROTESTA E MEMEVE TË TALLESH NË ZGRIPIN E PAMUNDËSISË

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

MBROJTJE me roje e kallash prokurorë e gjyqtarë nën kërcënim

Nga Anila Hoxha

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?