“Mbreti” Ilir, gjeniu me stofin prej Kampioni

“Si mundet ju të Tiranës ta largoni një trajner si Ilir Daja”? Kjo është pyetja pa përgjigje e presidentit të Suharekës, por profesori vetëm qesh. Si ka qenë karriera e deritanishme e tironsit që po ngjit në futbollin evropian ekipin e Ballkanit. Pse kishte aq shumë skepticizëm për Dajën në Shqipëri dhe fati që po i buzëqesh në Kosovë. I lindur për të qenë i pari…

Nuk e di çfarë ndiente përbrenda, por Ilir Daja shfaqej i lumtur në fundin e ndeshjes me kampionët e Rumanisë, Cluj. Ndeshja inaguruese në fazën e grupeve të “Conference League për një klub kosovar, duhej të ishte një fitore e padiskutueshme, pasi e tillë ishte ndeshja e luajtur nga minuta e parë dhe deri në të 91-tën, kur fati i bëri bashkë të gjitha gabimet që mund të bëhen në një moment të vetëm, për të çuar topin për dëshpërimin e të gjithëve në fundin e rrjetës. Megjithatë ajo goditje, heqja nga duart e tri pikëve dhe një zarfi me një çek me vlerën e 500.000 EURO, i bëri bashkë të gjithë të pranishmit në stadiumin “Fadil Vokrri” për të dhuruar duartrokitje dhe përcjellë mirënjohje për të gjithë protagonistët, veçmas për trajnerin Ilir Daja, që buzëqeshte dhe i kthente përshëndetjet të gjithëve. Kjo lirshmëri dhe entuziasëm ishte në kontrast të fortë, me atë çfarë ndodhte në përballjen deçisive kundër Shkupit, vëllazëroren dhe ndeshjen më miqësore që është luajtur në tribuna në historinë e kupave të Europës.