Luan Zhegu, artisti i palëvizshëm që sfidoi skenat me fëmijët

Luan Zhegu është nga ata këngëtarë që nuk harrohen thjeshtë. Ka disa veçanti: E para se kurrë nuk ka lëvizur në skenë; e dyta, është i pari që ka kënduar me fëmijët në skenën e muzikës dhe idhulli i tij është Vaçe Zela. Në këtë profil të këngëtarit del në pah jeta e sotme prej pensionisti; dashuria që ka për njerëzit që u shërbeu dhe në pushtetin vendor, dhe dëshira e tij për të kënduar një duet të fundit me FLOR MUMAJESIN

Arti cilësor nuk harrohet kollaj prandaj dhe ne i kthehemi shpesh personazheve që kanë shënjuar fëmijërinë tonë me super hite, (edhe pse shpesh ata e kanë jo me qejf të na përgjigjen). Në një nga mbrëmjet e shumta të diskotekave në Tiranë, Dj Sardi vendosi një natë një nga hitet e pas viteve ’90. “E doni dashurinë” kënga me tekst të Jorgo Papangjit dhe muzikë të Osman Mulës, ku protagonistë kishte dy artistë Luan Zhegun (këngëtarin e hiteve të mëdha) dhe Ledina Çelo që u afirmua në skenën shqiptare pikërisht me këtë duet. Artisti që nuk lëvizi kurrë në skenë, ama që na bën të kërcejmë me këngët e tij edhe pas 27 viteve…

“Nuk ka gëzim më të madh për një artist kur të gjithë e sidomos brezi i ri, di përmendësh tekstin e këngëve të tij”, thotë kantautori Luan Zhegu pasi i kam treguar për këtë episod në diskotekë. Po si lindi “E doni dashurinë” (ç’është e vërteta, vdes të di për prapaskenat e këngëve të mia të preferuara).