KUR PARTIA BËNTE FESTIVALIN

Në këtë edicion të 61-të të festivalit të këngës në RTSH, ju zbulojmë arkivat për festivalin e 16-të të këngës. Dritëro Agolli dhe poetë të Lidhjes së Shkrimtarëve nuk e marrin seriozisht punën me tekstet, ndërsa Avni Mula shfaqet pak modern në melodi!

Na ishte një herë një emision për fëmijë në Radio Televizionin Shqiptar. Atë e prezantonte teta Pavlina. Ishte një aktore e njohur, më kishte treguar im atë. Për mua një zonjë e bukur, me sy të qeshur që i trajtonte fëmijët si të vegjël me dëshira të rriturish, si Piter Pani. Dëshira ime e fshehur për t’u bërë pjesë e botës televizive duhet të ketë lindur aty. Por, që të dilje në televizor duhet të dije të bëje diçka, të përpiqeshe, sipas mamit tim. Shumica e fëmijëve atë kohë kishin mësuar këngët e festivalit të fundvitit dhe interpretonin. Unë i kisha vërtetuar gjithë fisit se skeçet humorit në spektaklin e fundvitit i mësoja në kohë rekord, por kjo nuk ishte diçka trendi. Në modë ishin këngët. Dhe papritur festivali traditë i tim eti, diçka që s’mund të anashkalohej në shtëpinë tonë, u bë një ditë edhe motivi im për të dalë në ekran.