Katër shokët doktorë kavajas, që sjellin bukurinë e jetës dhe madhështinë e qytetit

Historia e katër doktorëve që morën titullin “Qytetar Nderi” nga bashkia e Kavajës, është nga ato historitë e vogla, që krijohen nga vetë njeriu, rrinë në heshtje se vetë ata i ndrydhin, del një shkëndijë diku si një foto rastësore e publikuar prej tyre në rrjetet sociale, dhe më pas bëhet virale për t’u kthyer në një trend i ditës dhe javës, me mijëra komente dhe like, e qindra e qindra ndarje nëpër faqe të tjera. Dhe më pas shpërthen. Ata kthehen në “celebrity” të momentit, një titull që e kanë edhe pse nuk e kanë shfaqur sa duhet për publikun. Kështu na ndodhi tek portali Newsbomb.al, kur pasi publikuam foton e tyre dhe sukseset që kishin arritur që nga ’90, morëm me qindra komente nga lexuesit tanë për t’i njohur më shumë katër shokët e Kavajës. Doktorët Drini Bardhi, Arben Rrugia, Agron Sejdini dhe Adriatik Abdurrahmani vijnë në një rrëfim ndryshe për historinë e tyre të mjeksisë. Ata zgjodhën të qëndronin në Shqipëri kur bashkëmoshatarët e tyre vraponin për të gjetur mundësinë e parë për të ikur nga vendi. Diktatura ishte në grahmat e fundit, por largimi nga Shqipëria as që ju shkonte në mendje katër shokëve. Madje, i kishin të qarta synimet. E nisën gjimnazin në vitin 1986 dhe duket se ende pa e nisur mirë, e dinin se çfarë drejtimi do të merrnin në përfundim të tij. Arben Rrugia, Drini Bardhi, Agron Sejdini dhe Adriatik Abdurrahmani janë katër shokët që e mbyllën shkollën e mesme me rezultate të shkëlqyera dhe të katërt vazhduan studimet për Mjekësi. Pasioni për të veshur përparësen e bardhë i mbante të mbërthyer pas ëndrrës që kishin. Nuk mungonin kurrë në leksione e seminare dhe imazhin e tyre në korridoret e Fakultetit të Mjekësisë në Tiranë vështirë se e harrojnë shokët me të cilët ndanin bankat e auditorëve. Vitet kur ndoqën studimet, ishin jo të lehta. Megjithatë katër shokët shikonin shumë larg edhe përse klima në Shqipëri ishte tepër e zymtë. Erdhi dita e shumëpritur e diplomimit. Ndoqën një sërë specializimesh që i fituan me mund pas viteve të tëra studimesh. Kishin qenë të pandarë deri atë ditë kur morën në dorë diplomat, e ashtu zgjodhën të ishin dhe në vazhdim. Ndoqën degë të ndryshme në mjekësi, por që të katërt mbajnë veshur mantelin e bardhë. "Për mësuesit e mi do të kem gjithmonë mirënjohje dhe mirësjellje të merituar. Detyrën time do ta ushtroj me ndërgjegje e dinjitet. Përkushtimi im më i madh do të jetë shëndeti i të sëmurit". Në 1995, katër shokët bënë “Betimin e Hipokratit” dhe që atëherë kanë kuruar mijëra pacientë e kanë qenë duart e para për foshnjat që vinin në këtë jetë. Familjarë të mirë dhe profesionistë në fushën e tyre, u nderuan nga Bashkia e Kavajës me titullin "Qytetar Nderi". Ishte një vlerësim i vonuar për doktor Benin, Drinin, Agronin dhe Tikun, por megjithatë ndonjëherë, siç thotë populli, “më mirë vonë se kurrë”. Qyteti të cilit i dhanë për dy dekada e gjysmë gjithçka dhe vazhdojnë ti japin akoma, i nderoi me titullin më të lartë. Doktor Ben Rrugia e kishte marrë më herët, por nuk mund të mungonte në ceremoninë e tre shokëve. Në Korrik 2022, ai u nderuar nga Presidenti i Republikës me titullin "Mjeshtër i Madh", për patologjitë e infertilitetit dhe një muaj më vonë, në Gusht 2022, Bashkia e Kavajës e bëri Arben Rruginë "Qytetar Nderi" të saj. Arben Rrugia, duart e arta të jetës Telefoni nuk i pushon. Më saktë, të dy telefonat. Sapo nis të flasë, fjalën ja ndërpresin thirrjet e qytetarëve që e pyesin për rastet e tyre. Edhe pse është mbrëmje dhe ai nuk është në zyrë, orarin e punës e ka përfunduar herët, doktor Arben Rrugia nuk nguron të përgjigjet. Flet pak, edhe përse ka shumë për të treguar. "Nuk jam mësuar të flasë për veten", thotë. "Kam lënë përherë punën që të flasë për mua." Por edhe ne nuk është se e lëmë aq rehat, duke e ngacmuar të shprehet për ato qindra e mijëra raste që ka ndjekur. Shërben për më shumë se dy dekada si mjek Obstetër - Gjinekolog dhe ka pritur në krah mijëra foshnja. Arben Rrugia është i vetmi mjek shqiptar që merret me infertilitetin te meshkujt dhe femrat. Kjo ka bërë që në Shqipëri të vijnë çifte nga jashtë, të cilat i kanë dëgjuar sukseset e doktor Benit, siç e thërrasin të gjithë. Sot, me të gjitha pacientët e tij është bërë mik, u ka ndryshuar jetën pas vitesh pritjeje. Këto suksese nuk kanë ardhur rastësisht. Arben Rrugia ka ndjekur një sërë specializimesh brenda dhe jashtë vendit, menjëherë pas diplomimit. Do duheshin faqe të kësaj reviste t'i përshkruaje një nga një, nga Rusia ku u specializua për katër vjet si obstetër gjinekolog, në Itali, ku ka ndjekur disa kurse për kirurgji gjinekologjike. Ndërprerja e studimeve për "njollë në biografi" Katër shokët që sot janë "Qytetarë Nderi" të Kavajës, e nisën bashkë Mjekësinë në Tiranë, por Arben Rrugia u detyrua ta ndërpriste për shkak se regjimi i kohës ashtu në grahmat e fundit, arriti t'ja bënte të keqen. Një telefonatë në Rektorat, përmbajtjen e së cilës ai e mësoi një vit më vonë, kishte kërkuar që të përjashtohej studenti ekselent Arben Rrugia, sepse gjyshin e kishte pasur kulak. Ëndrra që aq shumë e kishte dashur iu këput përpara syve. U detyrua të ndjekë studimet për Ekonomi-Financë në Tiranë, sepse i ati nuk donte ta linte pa shkollë. Megjithëse, edhe ai vetë e shikonte trishtimin në sytë e të birit. Doktor Beni përlotet kur e kujton sot kthimin në Kavajë dhe bashkë me të dhe të atin, që sot nuk jeton më. Por është krenar, sepse bashkë me vëllain, Helidonin, nuk e vunë kurrë në vështirësi dhe e kanë nderuar me arritjet e tyre. Në fakt, edhe Helidon Rrugia mban titullin "Qytetar Nderi" i Durrësit, pasi është një biznesmen i njohur në fushën e shërbimit dhe gjatë rrugëtimit të tij, ka dhënë një ndihmesë të madhe në promovimin e turizmit shqiptar me industrinë e madhe të "Koral Fish" si dhe disa anijeve e fabrikave për përpunimin e peshkut. Doktor Beni donte të bashkohej me shokët, të ndiqte ëndrrën që të katërt bashkë kishin nisur te Mjekësia. Një ditë u kthye në Kavajë ashtu i përlotur dhe i kërkoi babait të bënte diçka. Mësoi se i biri ishte përjashtuar pas një telefonate në Rektorat të Sekretarit të Parë, Foto Çami. Shkak, e shkuara e gjyshit. Pas shumë ndërhyrjes dhe kërkesash, një vit më vonë, ai rikthehet në Fakultetin e Mjekësisë dhe vazhdoi rrugëtimin që sot e ka ngritur në majat e mjekësisë shqiptare. Arben Rrugia filloi të bënte atë që dinte më mirë pas kthimit nga Moska dhe specializimeve në Itali. Manteli i bardhë i shkonte shumë, por edhe i rrinte ngushtë. Sot bën të paktën 30-40 vizita në ditë dhe orët i ndan mes Kavajës dhe Tiranës. Kudo që të shkojë, qytetin ku hodhi hapat e parë nuk e tradhton. Për të, ashtu si për tre kolegët e tjerë, asnjë vend nuk është më i mirë se Kavaja dhe askund nuk mund të gjesh si kavajsit. Transformimi i Maternitetit "Koço Gliozheni" Një ndër hapat e rëndësishëm që shënjojnë karrierën e doktor Benit është dhe puna si drejtor në Maternitetin "Koço Gliozheni". Jo vetëm mjekët brenda spitalit, por edhe në qarqet shëndetësore publike e private, madje edhe në stafin drejtues të Ministrisë së Shëndetësisë, flitej për drejtim me efiçencë e profesionalizëm prej Dr. Arben Rrugia. Kjo e kishte një arsye. Doktor Beni nuk synonte komandimin si një burokrat i rëndomtë, por donte të linte gjurmë duke transformuar tërësisht organizimin e "Koço Gliozhenit" dhe shërbimin ndaj qytetarëve. I njihte mirë ato "plagë" dhe në "kurën" e kishte në xhep para se t'i besohej posti. Transformimi i maternitetit u pa shpejt. Qytetarët nuk kishin nevojë "të shtynin derën me këmbë për të hyrë brenda", por recepsioni ishte në gatishmëri 24/7 për të koordinuar oraret e tyre me mjekët. Kështu, askush nuk kishte përse të priste në radhë apo të sorollatej vërdallë. Shërbimi kishte arritur nivele të tjera. Por edhe kjo nuk e kënaqte Arben Rruginë. Shpejt nisi të mendonte për një shërbim të ri dhe arriti ta konkretizonte. Filloi Patronazhimi në spitalet e rretheve. Burreli ishte i pari dhe për të rritur besimin e qytetarëve se cilësia ishte e njëjtë me Tiranën, doktor Beni shkoi vetë atje për konsultat e para. Bashkë me kolegët asistuan edhe në disa lindje. Patronazhimi filloi dhe në Kavajë. Nuk mund të mungonte qyteti i tij dhe sigurisht aty do të ishte dhe doktor Beni. Transformimi që kishte nisur Arben Rrugia nuk po ju pëlqente të gjithëve në Ministrinë e Shëndetësisë. Shpejt filluan dhe "shkopinjtë në rrota". Si drejtor i Maternitetit "Koço Gliozheni", ai filloi bashkëpunimet dhe me spitalet jashtë vendit. Në një operacion të rrallë, të parin në Shqipëri, doktor Arbeni kërkoi ndihmën e një kolegu italian dhe pasi bëri të gjitha dokumentet e nevojshme, e solli atë në Tiranë. Operacioni i vogëlushit të sapolindur doli me sukses dhe në Ministrinë e Shëndetësisë nisën të krenoheshin me arritjen e doktor Benit dhe stafit të "Koço Gliozhenit". Ishin munduar t'i hapnin probleme para operacionit, duke i kërkuar llogari, edhe përse as që i njihnin procedurat mjekësore, por kur të gjithë e duartrokitën ekipin e mjekëve, "kritikët" donin t'i merrnin vlerësimet vetë. Këto nuk i interesonin aspak Arben Rrugisë, ai donte që të ngrinte sa më lart shërbimin publik. Organizime ndërkombëtare dhe Publikimet Krahas punës së përditshme, nisi dhe promovimin ndërkombëtar të mjekësisë shqiptare. Në vitin 2015 priti për dy ditë me radhë në Durrës mjekë nga më të njohurit në Evropë dhe i bëri ata bashkë me kolegët shqiptarë, në Kongresin e Parë Ndërkombëtar te Riprodhimit Human dhe Andrologjisë. "Vetëm t'i mund të sjellësh kaq shumë mjekë të huaj në Shqipëri, në një organizim të tillë", i thonin kolegët, dhe me të drejtë, pasi Shqipëria nuk kishte parë ngjarje të tilla, pa asnjë mbështetje nga shteti. Tre vite më vonë, doktor Arben Rrugia organizoi në Durrës për tre ditë me radhë Kongresin e Dytë Ndërkombëtar të Shëndetit Perinatal. Ky bashkëpunim do të vazhdojë dhe këtë vit. Në datat 19-20 Maj 2023, në qytetin bregdetar do të mblidhen mjekë të njohur, të huaj e shqiptarë, për të marrë pjesë në Kongresin e Tretë Ndërkombëtar te Riprodhimit Human, Andrologjisë dhe Shëndetit Perinatal. Organizator dhe President është Arben Rrugia. Ai është pjesëmarrës aktiv në Kongrese e Konferenca Kombëtare e Ndërkombëtare, autor i disa publikimeve në Revista Shkencore Shqiptare, të Maqedonisë së Veriut dhe Kosovës, si dhe autor i publikimeve të huaja bashkë me kolegët e Maternitetit "Mbretëresha Geraldinë". Bashkë me mjekun Elton Peçi janë autorë të librit Ekografia në Obstetrikë dhe Gjinekologji. Patologjitë e infertilitetit dhe shkëlqimi i Doktor Benit Në krahët e tij ka pritur me mijëra fëmijë, kushedi sesa herë është emocionuar bashkë me çiftet që janë bekuar me vogëlushët e tyre falë ndihmës së tij. Mirëpo, ardhja në jetë e vajzës së tij pak vite më parë, do ta shkundte fort emocionalisht. "E kupton rolin e mjekut kur je pacient vetë", na thotë me zërin e dridhur, i emocionuar si ditën e parë kur mbajti në krah të bijën. Për të, ishte ndjesia me e veçantë dhe njëkohësisht më e çuditshme në botë. "Si ka mundësi të më ndodhë mua?!", thoshte me vete atë ditë. "Unë kam pritur në këto krahë mijëra vogëlush." Gati nuk e besonte. Aty i kuptoi edhe më mirë emocionet e prindërve që asiston prej vitesh. Doktor Beni na tregon shkurtimisht rastin e një çifti të ri që prej gjashtë vitesh përpiqej të bëhej me fëmijë. Pas katër muajsh ndjekje nga vetë ai, shtatzënia shkoi mirë dhe në jetë erdhën tre vogëlush si drita. Ishin tre djem që gëzonin shëndet të plotë dhe sot janë gëzimi më i madh i dy prindërve. Është i kujdesshëm që të mos tregojë më shumë seç duhet, emra apo detaje as që bëhet fjalë. Raste të tjera janë qindra. Thotë se ka çifte që kanë pritur më shumë se 10 apo 15 vjet për të pasur një fëmijë. Një rast të ngjashëm e ka pasur dhe aktori i njohur Salsano Rrapi dhe partnerja e tij. Një histori publike mirënjohje e aktorit për Arben Rruginë. "Ne kemi pasur shumë vështirësi për t'u bërë me fëmijë, për të pasur një fëmijë. Beni është ai që me shumë qetësi e shumë kujdes, bëri Erjona të bëhet nënë dhe unë të bëhem baba. Është djalë i shkëlqyer. Jemi bërë miq, edhe vajzën time të dytë ai e ka pritur", është shprehur aktori Salsano Rrapi dy vite më parë në RTSH. Ashtu si shumë e shumë raste të tjera, që pasi çiftet bekohen me fëmijë, doktor Beni nuk është më për ta thjesht një doktor, por mik i mirë. "Unë këtë vlerësoj, por besoj dhe kolegët e mi. Për ne leku nuk është asgjë, respekti është ai që vlen", shprehet ai. Drini Bardhi, kardiologu që të forcon zemrën Doktor Drinit i pëlqen të flasë më shumë dhe mban mend gjithçka me detaje. Tregon se me Benin kanë qenë shokë që në 9 vjeçare, kurse në gjimnaz janë njohur me Adriatikun e Agronin dhe historia e tyre ka vazhduar e pandarë deri sot. Kanë qenë në klasa të ndryshme, por kjo nuk i ka penguar të ruanin miqësinë. Shok kanë pasur dhe Presidentin aktual të Shqipërisë, Bajram Begaj. Ka qenë një vit më i madh se ata, por edhe ai ndoqi studimet për Mjekësi dhe janë koleg në profesion. Siç thotë doktor Drini, kur erdhën në Tiranë bënë shokë të rinj nga gjithë Shqipëria, por unitetin që kishin të katërt nuk e prishën asnjëherë. Ishin shumë të hapur dhe bisedonin për gjithçka, edhe kur erdhën në Tiranë dhe në vitin e parë qëndruan bashkë në konvikt. Shokët e quanin "komandant", pasi duke qeshur thonë se ai ishte më i kujdesshmi dhe "raportonte" të familjet në Kavajë nëse ata bënin diçka që nuk duhej. Doktor Drini Bardhi tregon se pasi përfunduan studimet, duhet të bënin specializimin. Kjo, ishte e kushtëzuar nga nevojat dhe ato çfarë kërkonte rrethi. "Megjithatë, unë isha i vendosur që në vitin e parë, kur të mbaroja do të kthehesha në Kavajë", tregon ai. Ëndrra e tij ishte të bëhej kirurg, por Kavaja nuk kishte salla kirurgjie sepse ishte pranë Durrësit dhe ky shërbim ofrohej atje. Doktor Drini detyrohet të zgjidhë kardiologjinë, duke devijuar nga ajo që donte më shumë, por përsëri nuk ishte pishman. Nisi specializimin 4 vjeçar në Tiranë dhe në vitin e dytë kaloi një eksperiencë sa të paharrueshme, aq edhe të rrallë për mjekët e rinj. Ishte korrik, viti 1999, korridoret e spitalit gumëzhinin nga zërat. Në reanimacionin e Kardiologjisë ishte shtruar vetë doktor Shefqet Ndroqi. Ikona e mjekësisë dhe babai i Pneumologjisë shqiptare, ndodhej në pavionin ku Drini Bardhi shërbente si mjek roje. Djersë të ftohta i kullonin ballit, ca nga sikleti, e ca nga përgjegjësia. Përballë kishte personin që deri atë ditë, vetëm e kishin studiuar nëpër librat e Mjekësisë. Pasi mbaroi vizitën dhe i mati parametrat vitalë, doktor Shefqet Ndroqi i kërkoi ashtu me zë të ulët e mirësjellje që t'i vendoste stetoskopin në kurriz, për të dëgjuar mushkëritë. Në fund, i kërkoi doktor Drinit që të jepte opinionin e tij. "E mbaj mend si sot, ishte edemë pulmonare akute, për shkak të shifrave të larta të tensionit arterial", tregon ai. "I thashë për kurën dhe ai pa e menduar, më pa në sy dhe menjëherë e miratoi", vazhdon doktori. Nuk kishte kaluar shumë kohë dhe profesor Ndroqi kishte dalë nga situata kritike. Kishte kërkuar të parin doktor Drini Bardhin. "Mendoja me vete se kisha një tjetër patologji, tromboli pulmonare. Por t'i e gjete më mirë", i kishte thënë duke e përgëzuar. Këmbët mezi më mbanin, tregon sot doktor Drini, dy dekada pas asaj ngjarje ku pati fatin të vizitojë profesorin dhe doktorin e madh Shefqet Ndroqi. Nuk kaluan shumë orë nga dalja nga spitali dhe në derë u shfaq djali i doktorit, Zamir Ndroqi, sot neurolog. "Babai të ka dërguar këtë libër", i tha. Ishte libri monografik "Një jetë për jetën" i profesor Shefqet Ndroqit, me autograf posaçërisht për djaloshin që e kishte vizituar. Doktor Drini na e tregon librin dhe boja e stilografit të të madhit Shefqet Ndroqi duket sikur është ende e freskët mbi fletët e zverdhura nga vitet. Ama mesazhi i profesorit kanë qenë prej 10 korrikut 1999 frymëzim që Drini Bardhi të mos e hiqte kurrë mantelin e bardhë. "Doktor Drini Bardhit, si kujtim kët' libër me urimet më të mira dhe mirënjohje për shërbimin e dhënë gjatë shtrimit tim në spital. Tiranë 10/07/1999". Një shënim me shkrim dore, i kuptueshëm për moshën dhe gjendjen në të cilën ishte profesori atë periudhë. E filloi karrierën si mjek familje në vitin 1996 dhe punoi deri në vitin 1998 në Komunën Helmas, në Kavajë. Ndërkohë, sapo kishte nisur specializimin në Tiranë, por nevoja për t'u profilizuar në një drejtim më të qartë, bëri që ai të shkonte në Itali. Përfundoi specializimin për Eko-Kardiografi në Napoli dhe u rikthye në Kavajën e tij. Prej vitit 2002 e në vazhdim është mjek Kardiolog në Poliklinikën e Specialiteteve. Punën e ndan me doktor Adriatik Abdurrahmanin, i cili gjithashtu është mjek Kardiolog dhe punojnë në të njëjtin vend, në Spitalin e Kavajës. Janë krahu i djathtë i njëri-tjetrit. Adriatik Abdurrahmani dhe Agron Sejdini Profesioni që kanë zgjedhur dhe e ushtrojnë prej më shumë se dy dekada, i ka përballur me pacientë me probleme nga më të ndryshmet. Lodhja as që diskutohet në punën e tyre. "Më mirë më pyesni a ke pas mundësi me u çlodh", tregon duke qeshur doktor Adriatiku, një frazë që e përdor shpesh me pacientët kur e pyesin për ditën e punës, apo nëse lodhet. Ai e nisi specializimin dy vite më vonë se doktor Beni dhe e përfundoi me rezultate të larta. Nuk donte të qëndronte në Tiranë, sytë i kishte në vendlindje. Të katërt, atje kanë njerëzit e tyre, nga nëna dhe babi, ndaj janë aq të lidhur me Kavajën. "Na duan shumë se kemi punuar me mish e me shpirt për njerëzit atje", tregon doktor Adriatiku. Madje, i njohin patologjitë e pacientëve sapo shfaqen në derën e spitalit. Menjëherë pas përfundimit të shkollës punoi për katër vjet në Komunën e Golemit dhe një vit në Urgjencë në Spitalin e Kavajës. Konkurroi për specializim në Kardiologji dhe e fitoi. Ishte dy vjet pas doktor Drini Bardhit, por qëkur mbaroi specializimin dhe u kthye në Kavajë punon me të çdo ditë. Gjatë periudhës së pandemisë së Covid-19, doktor Adriatiku ka pasur një rast të veçantë me një pacient i cili ishte paraqitur me urgjencë me infakt miokardi, por njëkohësisht i infektuar me virus. Këtë nuk e dinte as pacienti vetë e as doktori, por u mësua gjatë trajtimit. Sipas rregullit, i sëmuri dërgohet në Spitalin Infektiv në Tiranë. "Fatmirësisht, e kishte kaluar edhe virusin dhe erdhi te unë me fletëdaljen", tregon ai, "por nuk kishte asnjë dokument shoqërues." Teksa ishin duke biseduar në zyrën e tij, pacienti rrëzohet në tokë duke bërë vdekje klinike. "Menjëherë i bëra goditje elektrike dhe e riktheva në jetë. I dhamë ndihmën e parë me stafin dhe e dërguam me urgjencë në QSUT. Kishte bërë mbyllje të një stenti", shpjegon doktor Adratik Abdurrahmani. Ishte një komplikacion i rrallë. Stentet janë tuba të vogla prej rrjete që përdoren shpesh për të trajtuar arteriet koronare të ngushtuara dhe i japin zemrës gjak të pasur me oksigjen. Fat i keq për pacientin që një komplikacion aq i rrallë i kishte ndodhur atij, por nga ana tjetër ishte një mrekulli që u ndodh në spital dhe doktor Adriatiku bëri gjithçka derisa e riktheu në jetë. Puna i ka nxjerr përherë ballëlartë para kavajsve të tyre, por i detyron edhe të mos jenë gjithmonë pranë familjes. Familjarët i kuptojnë, është një profesion që e kanë zgjedhur dhe i kanë dedikuar jetën, kurse më te vegjlit ndonjëherë edhe mërziten nga pak. Doktor Agron Sejdini thotë se kjo i ka ndodhur disa herë me të bijën. Duke qenë se mungon shpesh në festa e mbledhje të familjes, për shkak të orareve të punës, ajo ashtu me inatin e një vogëlusheje që ia ndjen mungesën të atit i thotë se nuk do të bëhet kurrë mjeke. "Po si të bëhem më thotë, ti nuk rri njëherë me mua", tregon doktor Agroni. Ashtu në heshtje i jep të drejtë të bijës, e cila edhe përse vetëm në klasën e tretë, ia ka gjetur shpejt pikën e dobët. Ndërsa djali ka trashëguar pasionin e tij për mjekësinë. "Ai po bëhet mjek, është në vitin e gjashtë dhe shkon shumë mirë", na thotë doktori, me sytë që i shkëlqejnë nga kënaqësia e krenaria për rrugën që ka zgjedhur të ndjekë i biri. "Ia kam thënë edhe atij." Doktor Agron Sejdini ka pasur një shkëputje dy vjeçare nga studimet, për shkak të rrethanave familjare, por u kthye shpejt aty ku fati e kishte drejtuar prej kohësh. Përfundoi me rezultate të larta. Kjo e ndihmoi shumë dhe për specializimin. "Dola i pari në shkallë rrethi dhe i 14-ti në shkallë Republike. Kisha dy tre degë në dispozicion, mjek familje, pneumologjia dhe imazheria", thotë ai. Këto rezultate e ndoqën dhe në specializim. E përfundoi në Tiranë në 2003 dhe me mesatare 10.0. Në shtëpinë e tij në Kavajë të gjithë ishin krenarë. Te katër shokët duket se ishte jetëzuar më së miri shprehja "Zgjidhe shokun më të mirë se vetja". Veçse tek ata askush nuk ishte më i mirë se tjetri, por të katër ishin ekselentë dhe frymëzim për të vazhduar më tej. Doktor Drini ndërhyn gjatë bisedës, si për ta theksuar me tepër këtë që sapo pohuam. Ata ishin vërtet katër shokë gjimnazi, por gjatë viteve të shkollës dhe shoqërisë, nuk mbajnë mend të kenë mbajtur mëri. "Ne kishim një ego pozitive, ego që t'ja kalonim njëri-tjetrit në arritjet tona dhe në finish arritëm bashkë", thotë doktor Drini. Të katërt e pohojnë njëzëri, ishim krahu i djathtë i njëri-tjetrit dhe për këtë falenderojnë Zotin që i bëri bashkë në këtë rrugëtim të pandarë prej tre dekadash.

Katër shokët doktorë kavajas, që sjellin bukurinë e jetës dhe madhështinë e qytetit

Nga Ilir Xhafaj

Artikuj të ngjashëm Artikuj

Donald Trump si “patronazhist”, apo “qëndrestar”? Ku po gabojnë politikanët

Who’s next?!

Pensionistët! Për bukën e gojës…

VLORA, “zonja e shtëpisë” për NËNTORIN e FLAMURIT

Çfarë ka Akoma për Rozana RADIN!

ERVIN SALIANJI, politikani që u “burgos” prej fjalës

Artikujt më të lexuar

Çfarë ka Akoma për Rozana RADIN!

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Një minoritet i braktisur rreth Buretos në Përmet

ERVIN SALIANJI, politikani që u “burgos” prej fjalës

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

KUR ARTISTI RRËFEN DHUNËN/ Serbia e ka humbur Kosovën që në 1989-ën

Kapodistria, kush ishte Gjon Gjika, presidenti i parë i Greqisë

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Katër shokët doktorë kavajas, që sjellin bukurinë e jetës dhe madhështinë e qytetit

Nga Ilir Xhafaj

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?