Jeta e katërt e President Alfred Moisiut

Burrështetasi 94 vjeçar rrëfen të kaluarën dhe të sotmen, bisedat me Ramën, këshillat për Berishën, nuhatja e fortë politike për zgjedhjet lokale, amanetet dhe trashëgimia e tij Alfred Moisiu është një burrështetas ndryshe nga të tjerët. Po afrohet rreth të 94-ve, por bën një jetë me disiplinë që shumë shtetarë të tjerë do e kishin zili. Në zyrën e tij, ku pasqyrohen shumë relike, foto dhe kujtime nga e kaluara presidenciale, Mosiu kalon kohën e tij duke punuar dhe studjuar, për të vazhduar të japë edhe më tej kontribut për vendin. I qeshur, i përpiktë dhe konseguent, Moisiu tregon se gjatë jetës së tij zyrtare, i ka takuar të dalë tre herë në pension. Herën e parë në vitin 1985, të dytën në vitin 1997 dhe të tretën në 2007. Kjo rrjedhë e jetës nuk e ka penguar që ai të kryejë detyrat përkatëse dhe më në fund t’i shërbejë një institucioni të ri, atij të ish-Presidentit, një model i ngjashëm me Presidentët amerikanë. Me krenari ai thotë se ka qënë President ndryshe, që kur u zgjodh, tryezës politike që e kishte thirrur për të dhënë pëlqimin për kandidaturën i vendosi kushtet e tij, që askush të mos i bëhej pengesë në detyrën më të lartë të shtetit. Ai kujton se si takoi Fatos Nanon, Sali Berishën, Fatmir Mediun dhe Gramoz Ruçin para se të pranonte detyrën e Presidentit në vitin 2002. “Ua thashë që unë kam një trashëgimi familjare dhe një formim professional, që nuk pranoj ndërhyrje në punët e mia. Sigurisht edhe në punët tuaja unë s’mund të ndërhyj. Unë do të veproj vetëm si kërkojnë Kushtetuta, ligjet dhe interesat e Shqipërisë. U ngrit Nano dhe tha, “e morëm mesazhin”. Nuk e di se sa dhe si e morën, pasi më vonë, sikurse dihet, me të dy palët pata probleme. Menduan se unë fola sa për të kaluar radhën, por unë sinqerisht ju thashë se kush isha, dhe nëse mund të kishin ndonjë pishmanllëk mund të reagonin. Dhe mendoj se fjalën e kam mbajtur. Të nesërmen, tek zyra e shoqatës Shqiptare të Atlantikut, tek Pallati i Kongreseve, President i së cilës unë isha në ato kohë, erdhi një gazetar nga televizioni publik dhe me pyeti se si e ndjeja unë veten si President. Ore djalë, i thashë, në jetën time, unë i kam hipur dhe zbritur kalit disa herë. Po më tha, por president nuk keni qenë. Sigurisht që jo, por ama unë njoh shtetin, ligjet, rregullat, kam një edukatë patriotike, kam dashuri ndaj vendit tim. Nuk bëj kompromise”, thotë Moisiu. Natyrshëm biseda kalon në të sotmen ku Presidenti Moisiu të thotë “rinia kërkon të hyjë në politikë por problemi është që nuk hyjnë për t’i shërbyer vendit, por për t’u pasuruar”. Sipas tij, kjo lakmi ndodh se e shohin politikën si biznes dhe jo si detyrë kombëtare. Kurse sipas tij politika është mision, sikurse ata priftërinjtë që në shëkullin e XV-të e më vonë shërbenin nëpër xhunglat e Afrikës në radhët e kanibalëve dhe njerëzëve të egër për t’i ndërgjegjësuar, për t’i shërbyer Zotit. Ai thotë më krenari që jeton në të njëjtin apartament prej 51 vjetësh që e mori dikur nga shteti si ushtarak dhe nuk e ndërroi asnjëherë. “Unë detyrën time e konsiderova të shenjtë. Sepse ndryshe unë s’do rrija në të njejtën shtëpi që prej 50 vitesh, do kisha edhe unë një vilë. Mund ta doja dhe unë por me rrogën 2.5 milionë lekë që kisha si President, nuk mund ta blija”, thotë Moisiu. Presidenti për Berishwn dhe Ramën Pandërshkueshmëria është kthyer në art sot, thotë me shqetësim President Moisiu. Ai rrëfen disa ndodhi në jetën e vetë, gjatë kohës që shërbente në ushtri, duke theksuar se shteti duhet respektuar, ligji duhet zbatuar. “Po lexoja dje se si Sali Berisha nuk shkon në Gjykatë ndonëse e kanë thirrur atje. Është arritje që kishin guxuar t’i thonë që duhet të vish, ndryshe do të sjellim policë. Kur gjyqi të thërret duhet të shkosh, ndryshe gjyqi është i detyruar të marri masa. Dhe ky rasti me befasoi”, thotë ai. Ndonëse mjaft i hapur dhe dashamirës, zyra e Moisiut nuk para vizitohet nga politikanët. Këtë e konsideron si fatkeqësi që politikanët e sotëm mendojnë se i dijnë te gjitha. Ai veçon Edi Ramën, me të cilin është takuar disa herë. “Disa mendime i ka reflektuar”, thotë ai për Ramën. “Mendoj që të gjithë duhet ta konsiderojnë nder që mund të marrin mendime nga një President i moshuar. Janë shumë të zënë por nuk duhet ta quajnë angari”, shton Moisiu. Por Presidenti nuk lë pa kujtuar mungesën e kujtesës institucionale që ka shteti shqiptar. Kosova,- thotë ai, - edhe pse një shtet ende në konsolidim, si gjithë vendet e tjera europiane ka ligj të posaçëm për trajtimin me respekt ndaj ish presidentëve. Shpesh në emisione ju kujtoj njerëzëve fjalën që : “Çdo brez rritet mbi shpatullat e brezit të kaluar”. Kjo është e rëndësishme për të kuptuar dhe vlerësuar rëndësinë e përvojës dhe të këshillave të moshave të kaluara. Filozofi popull thotë : “Kalliri plot e mban kokën ulur, ndërsa kalliri bosh e mban kokën përpjetë”. Më falni që i përsëris këto postulate popullore, por ato janë shumë të rëndësishmë për këdo që do vërtet të bëjë një punë të mirë për vendin e tij. “Ligji nuk bëhet për individë. Ato bëhen për të mbarështruar rregullat e shtetit dhe të shtetarëve, pavarësishtë se kush janë. Ligji është mbi të gjithë. Me fjalë këtë tek ne e pranojnë, por në fakt nuk e kemi shumë problem ta ndërtojmë dhe ta ndryshojmë ligjin, kur dikujt nuk i pëlqen ose i del problem. Kjo është shumë e dëmshme. Amerika të gjithëve na jep një mësim të mirë, se si duhet ti trajtojmë ligjet. Ajo ka një Kushtetutë 250 vjeçare dhe nuk e ndryshon. Te ne të ndryshosh ligjin ose kushtetutën, nuk e kanë për gjë. Kjo është shumë e dëmshme, pasi edukon paqëndrueshmërinë dhe mungesën e vazhdimësisë, që kanë shumë rëndësi për të krijuar, si tek politikanët ashtu edhe tek qytetarët ndjenjën e respektit dhe kujdesit për të ruajtur dhe respektuar ligjet, pavarësisht se kush është dhe kur. Më ka bërë përshtypje këto ditë, kur po shihja se po i shtohet paga Presidentit aktual. Dhe kjo është e drejtë, politika e pagave që qeveria po synon të bëjë i përgjigjet kohës. Sipas ligjit fillestar, kur shtohet rroga e Presidentit aktual, respektivisht ndryshon edhe pensioni i ish Presdientëve. Por mora vesh që këtë klauzolë e kanë ndryshuar, psenë e dinë vetëm ata që e kanë bërë. E kuptoj pse janë bërë këto paudhësi, janë pasojë e inateve personale. Po si ka mundësi?! I bëjnë gjërat me inat. E shikoni se ku arrijnë politikanët tanë?!” Thotë ai me trishtim. Po pse kjo mungesën e madhe respekti?! Presidenti të përgjigjet me humor të hollë. “E keni dëgjuar besoj Sterjo Spasen. Ai ka bërë një libër 500 faqe që titullohet; “Pse”. (Qesh) Nuk e gjeti dot. Përgjigja ime është si kjo e Sterjo Spases”. Situatën aktuale politike President Moisiu e shpjegon me realizëm, pa i bërë lajka askujt, me vërtetësi siç ka dëshirë ta evidentojë vetë. “Kam folur edhe më herët për këtë dhe kam thënë që Rama ka të meta sa të duash, por ai punon dhe përpiqet, përveç kësaj ka dhe diçka, që ai ka këtë opozitë të shpërbërë përballë” thote ai. Por se çfarë duhet të bëjë opozita të kryejë rrotacionin, Moisiu e ka një këshillë. “Opozita duhet të kuptojë që partia nuk mund të jetë pronë e askujt. Partia është pronë e shoqërisë. Berisha dha dorëheqjen, por kur erdhi puna për të dhënë llogari, e mori sërish partinë për të shpëtuar nga dhënia e llogarisë. Në fillim vuri në krye të partisë Bashën, dhe ai nuk guxonte të bënte asgjë. Pasi në fakt frenat i kishte Berisha”, Marrëdhënia e vështirë me Sali Berishën kur të dy shërbenin në detyra të larta është ende e freskët për Moisiun. Ai tregon se Berisha e sulmoi fort indirekt përmes biznesit të nipave të tij, për ta detyruar të shkarkonte ish Kryeprokurorin Theodhori Sallaku. “Ishte një gjest mafioz ndaj meje. Ishte një lloj rakatimi mafioz, veprim për të më detyruar të dorëzohesha. Unë u thashë bëni ç’të doni se nuk lëviz nga vendimet e mia, pasi kam të drejtë. Dhe ndodhi që kompania u godit rëndë, falimentoi dhe u zëvëndësua me një kompani që drejtohej nga një njeri i Bashës. Kjo u bë problem atëhere edhe tek ndërkombëtarët që shihni se çfarë është ky kryeministër që bën këtë presion ndaj Presidentit. Dëgjoni, populli shqiptar është i zgjuar ndonëse duket sikur fle gjumë. Populli është si uji i lumit. populli nuk fle”, kujton Moisiu. President Moisiu e sheh pa ndonjë emocion rikthimin e Berishës në jetën aktive. Fakti që ai pëlqehet ende nga shumica e demokratëve, e sheh këtë si pjesë e kulturës politike dhe rrethit të madh te Berishës që ka përfituar dikur nga pushteti i tij. “Është edhe çështje kulture. Për fat të keq ne vuajmë shumë nga bajraktarizmi, që nga koha e Zogut, Enver Hoxhës, dhe madje tani”, thotë ai. Për të, Berisha e konsideron partinë si bajrak. Partinë Demokratike zyrtare të drejtuar nga Alibeaj e sheh ende nje filiz të pangjizur. “Nuk e njoh mirë këtë rrymën e re. Janë disa individë të artikuluar. Kam respekt për Jorida Tabakun. Por shoh që janë edhe ata të infektuar dhe duhet të pastrohen nga servilizmi. Nuk duhet ti bëjnë qefin askujt”, thotë Moisiu. Ai shprehet se të rinjte duhet të guxojnë më shumë. Moisiu për Mehmet Shehun: Kryeministër si ai, nuk dihet kur do vijë Nga vetja kujton se dikur pati kundërshtuar ish kryeministrin Mehmet Shehun, sepse besonte tek argumenti i tij. “Mehmeti ka qënë ai që ka qënë. Meriton një intervistë të veçantë. Nuk e kam fjalën për krimet e tia, ato qëndrojnë dhe duhet gjykuar, por po flas për stilin, metodën, ndjekjen e problemeve. E kam thënë edhe herë tjetër që kryeministër si ai nuk e di se kur do i vijë vendit. Flas për mënyrën se si punonte dhe drejtonte. Nuk e gjeje pa një libër përpara dhe nuk e bëntë për të kaluar kohën, por për të gjetur ide, mendime. Kur e thashë një herë këtë në një Tv, mbaj mend që Berisha më dërgoi 50 njerëz nga të përsekutuarit te shtëpia e ime. U ngeli hatri shumë njerëzve. Mehmet Shehu e pranonte kundërshtimin, por me argumente. Po ti jepje argumente ai tërhiqej. Këta tanë sot nuk tërhiqen”, kujton Moisiu. “Unë jam edukuar ti them gjërat ashtu si i mendoj, nuk më bën shumë përshtypje sesi i marrin ato. Pasi mendoj që çdo mendim, në fillim edhe mund të keqkuptohet, kur është diçka që nuk kuptohet me të parën, koha bën që njerëzit të reflektojnë”. Presidenti që parashikoi ndryshimin e Shkodrs Nuhatja politike është ende e fortë tek Moisiu. Tek e pyet për zgjedhjet lokale, ai beson se diferenca do ndodhë në Shkodër. Do jetë një përgjigje e fortë për Berishën, shton ai, duke besuar se Benet Beci do fitojë Shkodrën. “Po ua them unë. Në Shkodër besoj se fiton Benet Beci, është djalë me shumë përvoj dhe me ide interesante. E kam dëgjuar për planet e tij për Shkodrën dhe ai qytet mund të bëhet një perlë i rajonit, i rrethuar me ujëra”, thotë Presidenti, që duket se goditi në shenjtë pasi intervista më të u krye para ditës së zgjedhjeve të 14 majit. Ndryshe nga kushdo që mund të jetë dorëzuar, President Alfred Moisiu frymëzon të kundërtën. Ai ka një ditë te mbushur me aktivitete që nis herët në mëngjes. “Unë vij këtu që në orën 10.00. Do vija më herët por më parë bëj një shëtitje. E bëj nga liqeni. Çdo ditë më pas kam angazhime. Më ftojnë edhe në vende të tjera për të dhënë leksione ose biseda të ndryshme. Përgjithësisht nuk jap shumë intervista. Këto rrjetet sociale me duken abusive. Unë nuk i lexoj por shoh njerëzit e mi që i lexojnë e më thonë”, tregon ai. Alfred Moisiu i rikthehet edhe njëherë LANÇ-it Ndjek më vëmendje debatet te ndryshme për historinë, e në veçanti për luftën. “Jam kundër kujdo që flet kundër luftës tonë për çlirim. Unë shtroj problemin a mos bënë gabim shqiptarët që luftuan kundër pushtuesëve. E gjithë Europa përparimtare luftoi kundër nazizmit dhe fashizmit. Kudo kishte nga ata që ishin në luftë kundër pushtuesëve, por pat dhe nga ata që bashkëpunuan me armikun. Pas luftës në të gtjithë Europën u bënë gjyqe ndaj bashkëpunëtorëve të pushtuesëve. Secilit ju dha aq sa u takonte dhe u mbyll kjo punë. Tek ne lufta ka 79 vite që ka mbaruar dhe ende vazhdojmë dhe flasim me gjuhën e luftës. Këtë e ka bërë politika për qëllimet e saja elektorale dhe e mban popullin të ndarë vetëm për vota. Lufta nuk është vetëm e Enver Hoxhës. Luftën nuk e bënin vetëm komunistët. Ata ishin vetëm 2 % dhe pjesa tjetër ishin shqiptarë të tjerë që nuk kuptonin nga komunizmi. Luftoi një popull i tërë. Nëse dikush ka gabuar, ai të përgjigjet. Por kjo nuk do të thotë se kam gabuar edhe unë. Enver Hoxha bëri një gabim shumë të rëndë që ishte lufta e klasave. Ky ishte një gabim i madh. Ç’faj ke ti të përgjigjesh për fajn që ka bërë gjyshi yt. Unë tani jam me 8 stërnipa e stërmbesa. Çfarë kanë ato nëse unë mund të kem bërë ndonjë faj?! Ata kanë një krenari të ligjshme që kanë një stërgjysh që ka bërë diçka për këtë vend”, thotë ai. Dhe në fund... presidenti po kërkon një vend të fundit Në moshën e tij, President Moisiu punon ende për trashëgiminë e emrit të familjes së tij, që nga aktori i madh Aleksandër Moisiu, i ati, Gjeneral Spiro Moisiu. Tregon se një ditë takoi kryetarin e Bashkisë së Tiranës Erion Veliajn për t’i kërkuar mundësinë që të ketë nje varrezë dinjitoze. “I vajta një ditë Kryetarit të Bashkisë dhe i thashë; ku do varrosem unë?! (qesh) . E kam menduar këtë gjë sepse kam dëshirë të kemi një varrezë familjare, sikurse e kanë kudo në Europën e qytetëruar. Të jemi të gjithë atje. Se kur shkon atje, janë ca andej, ca këtej, jo ku gruaja, jo ku djali. Do përpiqem ta bëj, të jemi bashkë”. Dhe ai u tregua i gatshëm ti përgjigjet kërkesës time. Shikon orën dhe vëren se orari i intervistës ka mbaruar. Presidentin e pret një angazhim tjetër. Natyrshëm pyetja e fundit është se çfarë e motivon ende Presidentin Moisiu. “Më motivon shumë edukata ime. Si qytetar i këtij vendi që të shërbej qoftë sado pak, të bëj diçka pozitive”.

Jeta e katërt e President Alfred Moisiut

Nga Anta Muçaku

Artikuj të ngjashëm Artikuj

50 vjet nga Revolta/ SPAÇI – Burgu i komunizmit dhe demokracisë

Gentiana Sula – Një grua përballë 50 viteve sekretesh të diktaturës

TË FSHETAT E ZGJEDHJEVE 2023: ROLI I FISEVE, OLIGARKËVE, PARTIVE DHE ODIHR

Katër shokët doktorë kavajas, që sjellin bukurinë e jetës dhe madhështinë e qytetit

Të pathënat e ekzekutimit të biznesmenit nga turisti-vrasës

Rajmonda Bulku, si ditën e parë…

Artikujt më të lexuar

SONDAZHI/ Si ndahen votat për Tiranën e Shqipërinë

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Shpellat e jugut, monumente të braktisura dhe të harruara nga shteti

50 vjet nga Revolta/ SPAÇI – Burgu i komunizmit dhe demokracisë

Të pathënat e ekzekutimit të biznesmenit nga turisti-vrasës

Banka Botërore, “dhuratë” qeverisë para zgjedhjeve

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Jeta e katërt e President Alfred Moisiut

Nga Anta Muçaku

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?