ISUF KALO, vdekja e mjekut që skanoi Enverin, Bllokun e Komunizmin

Më 19 janar ndërroi jetë mjeku personal i Enver Hoxhës, Isuf Kalo. Historia e jetës së një prej personazheve më të njohur gjatë regjimit komunist që deklaroi se kishte mjekuar diktatorin, por jo diktaturën. Sekretet e Bllokut që i publikoi në një libër por edhe në intervistat që dha vitet e fundit. Një mjek i kalibrit ndërkombëtar që arriti të bënte edhe një karrierë me detyra të rëndësishme në OBSH. Portret për njeriun që prej 30 vitesh ndante jetën mes Danimarkës dhe Shqipërisë, e preferoi të prehej përfundimisht në fshatin e tij të lindjes, Luzat të Tepelenës. Dhe një rrëfim i nipit të tij, juristin e njohur Përparim Kalo.

Nuk ndodh shpesh që vdekja e një personazhi në Shqipëri ta kalojë me nderime ndaj tij njëkohësisht të socialistëve, demokratëve, komunistëve, mjekëve, gazetarëve, historianëve, studiuesëve etj. Isuf Kalo i bëri bashkë këtë 19 janar teksa dha shpirt në banesën e tij në Kopenhagen ku jetoi prej vitit 1992 dhe ndante jetën mes Danimarkës dhe Shqipërisë. Të gjithë shprehën keqardhjen për këtë vdekje edhe pse për 30 vjet ishte mjeku personal i Enver Hoxhës, ndoshta edhe prej faktit se vetë ai e kishte bërë ndarjen me thënien proverbiale: Unë mjekova pacientin dhe jo diktatorin Enver Hoxha. I bëri bashkë në homazhet më 27 janar në Akademinë e Shkencave në Tiranë ku e nderuan që nga akademiku dhe mjeku i njohur Anesti Kondili që mbajti fjalën, te ministrja e Kulturës Elva Margariti, te deputeti demokrat Tritan Shehu e deri te kryetari i PD-së Sali Berisha. Apo ngushëllimet që nisin që nga kryetari i Partisë së Lirisë, Ilir Meta e tek kryetarja e Kuvendit, Lindita Nikolla. I bëri bashkë më 28 janar edhe në Bashkinë e Tepelenës ku dallonin kurorat me lule që nga presidenti i Republikës Bajram Begaj, te kryeministri Edi Rama, te ministrja e Shëndetësisë Ogerta Manastirliu dhe deri te ministrja e Turizmit dhe Mjedisit Mirela Kumbaro. I bëri bashkë edhe në fshatin Luzat të Tepelenës ku u varros në vendlindjejn e tij teksa vargu i makinave që morën pjesë në atë ceremoni ishte i tillë që nuk kishte parë kurrë më parë as fshati i vogël malor e as Jugu i vendit.