Inva Mula: Unë sopranoja e parë shqiptare në skenat evropiane

Somario: Inva Mula sot ka ndryshuar shumë nga vitet 90, kur shkoi për herë të parë në Francë dhe zgjodhi të qëndrojë atje. Tani, e tërhequr nga skena "aktive" ka gjetur skenën e vet "korçare", ku organizon aktivitete dhe i duket sikur është në Paris. Cila është lidhja me djalin e vajzën dhe rikthimi me dashuri në Korçën e Serenatave Inva Mula: Jeta ime e re… Kritika mbarë botërore do ta cilësonte si një ndër sopranot më të mëdha të botës. Mësimet e para ajo i mori në moshën 5 vjeçare në piano. Pas studimeve në Akademinë e Arteve në Tiranë filloi karrierën si soprano. Fitoi konkursin Tefta Tashko Koço dhe më pas çmimet e saj do të ishin të pafundme. Ishte viti 1992 kur fitoi çmimin “Madame Butterfly” në Barcelonë dhe më pas triumfoi në vitin 1993 me çmimin e parë në konkursin e parë operialë të Placido Domingos dhe më pas suksesi do të kishte vetëm emrin INVA MULA . Është një zonjë shumë e madhe (për fuqinë dhe emrin që mbart mbi supe, qoftë të vetin apo edhe të familjes së saj), por në të njëjtën kohë është edhe një zonjë shumë elegante dhe “petite” që mbart energji shumë pozitive brenda vetes. Dhe e dini pse e them këtë, sepse Inva Mula ka pesë vite që bën bashkë artistë nga e gjithë bota në Korçë. Në Korçën e saj të dashur e cila në vitin 1987 i dha çmimin e parë në konkursin Tefta Tashko Koço dhe 35 vitesh Inva Mula nderohet nga ky qytet me titullin “Qytetare Nderi”. Ndonëse mban tituj shumë të rëndësishëm si “ Kavaliere e penës dhe e artit” dhënë nga shteti francez, “Nderi i Kombit” marrë me meritë nga shteti jonë duket se dhe ky titull i ri po i shijon pamasë artistes së mirënjohur. Unë e takova në Prespë dhe megjithëse duhet të prezantonte “Mik Festival”, të koordinonte punët në backstage, nuk i tha jo intervistës për revistën tonë. Veshur me një fustan të bardhë veror, atlete bojë rozë dhe një kapele , e madhja Inva Mula u bë një, jo vetëm me të ftuarit e saj specialë por edhe me banorët e zonës, që e shihnin me adhurim… MIK FESTIVAL Interesante jeta nganjëherë (ose gjithmonë në fakt) por ne na pëlqen të themi nganjëherë, i tërheq njerëzit aty ku do vetë. Dhe unë jo rastësisht por atëherë kur isha më e re unë mora pjesë në konkursin Tefta Tashko Koço (që më vjen keq) që nuk ekziston më dhe u çudita dhe vet që mora çmimin e parë, pasi s’më njihte njeri dhe kërkesat në artin klasik kanë qenë gjithnjë në maksimumin e vet. Dhe për shumë e shumë vite unë ngaqë nuk jetova më në Shqipëri, kisha shumë vite pa shkelur në Korçë derisa para 5 vitesh u riktheva në këtë qytet. Një mbrëmje të bukur që vetëm në këtë qytet mund të ndodhë të gjithë njerëzit këndonin njëzëri, pasonin kitarën sikur ishin të programuar (kur në fakt çdo gjë ishte spontane) dhe pata një thirrje të brendshme ku thashë ky qytet që këndon vetë, ky qytet që ka nxjerrë shumë artistë, ky qytet meriton të ketë një Festival Internacional. E përjetova aq fortë sa më doli nga shpirti fjala MIK që është “Muzika Internacionale në Korçë”. Nga ana tjetër doli dhe fjala më e bukur në botë MIK që është shumë e dashur dhe që të thërret”, më tregon me çiltërsinë e një fëmije Inva Mula. (Le ta themi mes nesh këtë fakt është kaq komode dhe kaq rehat sa ndërkohë që bashkëbisedojmë ajo është duke provuar edhe gatimet tradicionale të Korçës. Dhe ju e dini se si gatuajnë zonjat korçare). Duke lexuar për jetën dhe dëgjuar intervista të shumta të Inva Mulës, instiktivisht më lind pyetja: A i duket e ngjashme Korça me Parisin?! (Në një rrëfim për emision Blu në korrik të vitit 2003 Inva Mula shprehet se ka qenë gjithnjë e apasionuar pas Parisit, por në të njëjtën kohë Parisi nga ai që kishte lexuar dhe imagjinuar ishte ndryshe nga ai me të cilin ajo u përball. Dhe madje si çdo turist gjëja e parë që bëri shkoi dhe pa “Kullën Eiffel” ku edhe banonte pranë saj)… Por le të kthehemi tek Korça, a është ky qytet një Paris i vogël? “Jo nuk më ngjan dhe gjithnjë kam pyetur sepse e kanë quajtur Parisi i vogël. Por disa nga përgjigjet që më kanë ardhur spontanisht kanë qenë sepse ndoshta si rrugët e Parisit që hapen pas një rrethi. Por mendoj që Korça është qyteti më frankofon shqiptar, duke qenë se liceu i parë është hapur këtu. Por edhe aristrokacia korçare ka jetuar duke mësuar frengjishten dhe jo anglishten. Prandaj mendoj që është qyteti më frankofon që kemi dhe ndërmjet Luftës së Parë dhe të dytë Botërore është formuar një qeveri franceze këtu. Ka një varr të ushtarëve që kanë ndërruar jetën këtu. Mendoj që Korça nuk ka lidhje vizuale por historike ka patjetër me Parisin. PARISI Një shprehje e njohur thotë se “ një ditë e keqe në Paris, është gjithsesi një ditë më e mirë se kudo tjetër”. Sa ja ndjen mungesën kryeqytetit francez, Inva Mula?! “Parisi është vendi ku pas Tiranës ndihem si në shtëpi. Karriera ime shpërtheu atje dhe kur e kthej kokën pas them si ka mundësi që shpërtheu në vendin më të vështirë për t’u kapur. Por dhe kjo do analizë të thellë, por mendoj pse jo. Pse mos të shpërthente në Paris dhe ndihem shumë krenare për atë që bëra. Megjithatë Parisi është vendi ku kam lindur të dy fëmijët e mi. Atje i kam çuar në kopsht, në shkollë dhe jam e përgjysmuar, pra Inva mes Tiranës dhe Parisit. Një shqiptare në teatrot më të rëndësishme të Botës Në kohët që jetojmë ka shumë artistë që po e lartësojnë dhe po e ngrenë në një tjetër nivel emrin e Shqipërisë. Ama në periudhën kur Inva Mula vendosi të qëndronte në Paris, ishin të paktë personazhet që e zhvillonin karrierën e tyre jashtë shtetit dhe një prej tyre ishte edhe sopranoja e famshme, që kudo ku shkelte e kudo ku këndonte e thoshte me zë të lartë që ishte nga, SHQIPËRIA. “Është një raport që ka patur ndryshimin e vet. Unë kam qenë nga të parat që ika, ose s’mund ta them që ika por që fitova një bursë, shkova për ta bërë atë dhe për t’u kthyer. Por mbaj mend që ishte janari i vitit 1992 dhe kushtet në Shqipëri ishin të paimagjinueshme. Unë mendoja që do mbaroja dhe do kthehesha, por për shkak të situatës në Shqipëri qëndrova në Paris dhe e vijova atje karrierën time. Mirëpo asokohe për Shqipërinë nuk kishte një imazh të mirë. Vendi jonë nuk njihej dhe ndërkohë unë isha shqiptarja e parë që këndoja në operën e Parisit, në La Scala të Milanos në Arenën e Veronës, e në shumë teatro të tjera prestigjoze. Më vjen mirë që i kam shkelur e para këto teatro. Në fillim ata çuditeshin thonin nga vjen ky njeri, ndërkohë që ne po dëgjojmë për eksodin por në fakt këtu paska art dhe artistë të mëdhenj. Unë ndihesha krenare me Kadarenë, se në çdo tavolinë që shtrohej ai ishte referenca kryesore. Por ishte gjithashtu edhe Tedi Papavrami, një nga figurat më të rëndësishme të artit shqiptar që pati dhe ai rrugëtimin e tij. Mos të harrojmë Angjelin Prelocajn që edhe pse kishte ikur shumë i vogël ishte një referëncë shumë e madhe. Ai ishte një nga figurat më të mëdha të koreografisë madje do ta cilësoja historike pasi ta bësh këtë gjë në Operan e Parisit, ku baleti është në majat e botës atëherë ke arritur gjithçka. Fatmirësisht unë nuk isha vetëm në këtë rrugëtim dhe isha shumë e lumtur. Ne na kanë ftuar të flasim për rrënjët tona në mediat më të rëndësishme franceze dhe padashje kemi mbajtur mbi vete edhe hallet e vendit. Këto probleme nuk ishin problem për kolegët e mi italianë apo gjermanë, por ky ishte proçes që e bëri rrugëtimin e tij dhe mua më pas nuk më pyesin më se nga cili vend vija, pasi tashmë të gjithë e dinin që vija nga Shqipëria. E keni menduar se si do të ishte karriera juaj nëse do të kishit qëndruar në Shqipëri, e pyes unë?! Dhe Inva Mula përgjigjet shumë thjesht. “E kam menduar por nuk mund të përgjigjem, pasi nuk e kam provuar por mendoj se do të gjeja gjithnjë një rrugëzgjidhje për të çarë në art”. FAMA & KARRIERA Kurioze isha të dija gjithashtu se si ka qenë (dhe është) raporti i Inva Mulës me famën. A ka qenë ajo mendjemadhe, a ka ndjerë ajo rivalitet? A e kanë dashur më shumë njerëzit si artisten e madhe apo për njeriun e mirë që ajo ka zgjedhur të jetë në jetë. “S’kam qenë kurrë mendjemadhe. Madje njerëzit që më rrethonin më thonin që je shumë e thjesht bëhu pak më mendjemadhe. Por unë mendoj që kjo vjen nga një edukatë familjare, pasi nëna dhe babai im kanë qenë njerëz mbi të gjitha modestë dhe të përulur. Madje mendoj që kjo ka qenë një nga madhështitë e tyre. Andaj siç janë prindërit ashtu do të bëhen edhe fëmijët sepse në jetë ata kanë qenë shembujt e mi. Unë se kam konsideruar famën si qëllim në vetvete, kam qenë shumë e lumtur që me anë të shembullit tim të tërheq afër vetes njerëz të mirë dhe pozitivë. Nuk e kam konsideruar veten të famshme, por lider dhe kam dashur të kem afër meje njerëz që kanë po të njëjtën energji si unë. Ndihem shumë mirë se kur shoh njerëz që kënaqen dhe them gjithë këto shkëndija lumturie njeriu s’ka fjalë dhe i shpreh ato me buzëqeshje. A ka Inva Mula ndonjë peng nga karriera e saj?! Pengje nuk kam, bëra një karrierë shumë më të rëndësishme nga ç’mund ta kisha imagjinuar dhe ëndërruar dhe në këtë drejtim nuk kam asnjë peng. Qëllimi i jetës sime është të gëzojë jetën dhe të tjerët, nëpërmjet artit dhe muzikës dhe tashmë ky është stili im i jetësës. Nuk më intereson më të bëj një produksion se kam bërë pafund të tillë, tani dua të bëj miq bashkë dhe të gëzoj me ta. Ajo ka qenë gjithnjë e rrethuar me njerëz të mëdhenj të artit botëror, madje edhe në një nivel me ta. Por a ka patur Inva Mula një idhull botëror? Placido Domingo ka qenë personazhi që kam adhuruar dhe që e takova shumë thjesht pa planifikuar që do ta takoja. Unë fitova edhe konkursin e tij si dhe konkursin tim të parë në Paris që hapi më pas dhe dyert e karrierës sime. FËMIJËRIA E INVA MULËS Në çdo intervistë të sajën sopranoja me famë botërore thotë se ndihet me fat që ka patur në jetë dy prindër si Avni dhe Nina Mula. Nëna e saj ka qenë shumë kërkuese me të dhe motrën e saj të gjitha të ardhurat që ajo fitonte shkonin për kurset e tyre duke filluar që nga pianoja, frëngjishtja, anglishtja, italishtja e deri te rrobaqepësia. Ndërsa Avni Mula ishte një baba më tolerant, por që kishte autoritet si prind dhe artist. Siç mësova lojërat e fëminisë mësova dhe muzikën, pra dashuria për artin ka ardhur në formën më të natyrshme tek unë. Një fëmijë e ka të vështirë të studiojë një instrument. Siç ka thënë edhe Rosini një nga vuajtjet për një fëmijë është që të studiojë një instrument. Në fillim ishin prindërit që më nxitën të mësoja pianon dhe më pas ajo u bë një domosdoshmëri për mua”, kujton Inva Mula. Ju e ruani ende pianon tuaj të parë, a luan sot vajza juaj Nina?! E pyes unë… Jo nuk ka luajtur, piano e parë është piano ku babi im ka shkruar këngët më të bukura dhe i ka shkruar në një piano shumë modeste, që ka qenë instrumenti jonë i vetëm i familjes. Aty është ushtruar nëna ime, motra ime, unë dhe e ruaj si gjënë më të shtrenjtë. NJË NËNË SI INVA MULA Përveç artistes që ne njohim dhe që kemi parë të shkëlqejë në skenë, Inva Mula është edhe nënë e dy fëmijëve. Antoni ishte 3 muajsh kur ajo u detyrua ta linte të birin në Paris dhe shkoi të këndonte në Hamburg, Gjermani. Sot ai është 26 vjeç, një djalë shumë trendy dhe stil e që ka tërhequr vëmendjen e të gjithëve në Instagram. (Por nuk është beqar)… “Antoni sa zgjohet në mëngjes luan Chopen dhe kjo është çudia. Ai thotë sa më shumë luaj muzikë klasike aq më shumë e perfeksionoj atë elektronike, sepse figurat më të bukura ritmike që gjenden në muzikën klasike, janë shkolla më e madhe prandaj them sa mirë që ai inspirohet nga muzika klasike”, tregon plot pasion Inva Mula për gëzimin e saj të parë. Ndërsa Nina erdhi si një dhuratë në jetën e saj atëherë kur ajo nuk e priste dhe sot është krah nënës së saj. Nina duket një fëmijë shumë energjik dhe është në krah të nënës edhe në këtë intervistë që jemi duke realizuar. Por nga ndryshon Inva si mami me Antonin dhe Ninën? “Ajo që ndryshon janë fillimisht dy gjenerata me 17 vite diferencë, ajo që nuk ndryshon dhe që mbetet konstante është dashuria e pakufishme që kam për të dy. Sa herë më thotë Nina kë do më shumë?! I them të dy bashkë. Antonin e kam si shok sepse me të mund të diskutojë shumë gjëra, por edhe Nina po më bëhet shoqe. Nina dhe shumë fëmijë të tjerë të pranishëm në MIK Festival këndonin njëzëri këngë “gold” të muzikës shqiptare dhe ky ishte një detaj që më ra në sy. Nina jo vetëm e do shumë muzikën shqiptare por sa herë jemi të dyja në makinë duke bërë udhëtimet tona, të gjata apo qoftë edhe të shkurtra ajo zgjedh të vendosë gjithnjë muzikë shqiptare dhe i këndon me shumë qejf këngët tona”, thotë Inva Mula. PASIONET E REJA TË INVA MULËS Njerëzit e suksesshëm dallohen gjithmonë dhe kudo. Thuhet gjithashtu se ata tregojnë edhe më të rinj nga sa janë në të vërtetë, po marrim këtu shembullin e Sophia Loren, Madonna, etj. Janë energjikë e gazmorë dhe mbi të gjitha optimistë për jetën. E nëse më sipër mora shembuj emrash të huaj, mund të them fare mirë se shembulli tipik shqiptar i një njeriu të suksesshëm është INVA MULA. Ajo ka shijuar çdo sekondë të artit të saj dhe tani është duke zbuluar disa pasione të reja në jetën e saj. “Më pëlqen jeta e fshatit. Prej 4 vitesh shkoj atje dhe prashis, më pëlqen shumë kontakti me natyrën. Dhe jo vetëm për ta parë por edhe për të parë se si funksionon një gjë e tillë. E marr dhe Ninën me vete dhe i them duhet ta shohësh se si realizohet kjo gjë që ne hamë, shiko çfarë mundi është. Më pëlqen shumë edhe jeta e detit, sepse ne jemi njerëz pasionant, jemi gjatë gjithë kohës në lëvizje…”

Inva Mula: Unë sopranoja e parë shqiptare në skenat evropiane

Nga Suada Daci

Artikuj të ngjashëm Artikuj

50 vjet nga Revolta/ SPAÇI – Burgu i komunizmit dhe demokracisë

Jeta e katërt e President Alfred Moisiut

TË FSHETAT E ZGJEDHJEVE 2023: ROLI I FISEVE, OLIGARKËVE, PARTIVE DHE ODIHR

Katër shokët doktorë kavajas, që sjellin bukurinë e jetës dhe madhështinë e qytetit

Të pathënat e ekzekutimit të biznesmenit nga turisti-vrasës

Rajmonda Bulku, si ditën e parë…

Artikujt më të lexuar

SONDAZHI/ Si ndahen votat për Tiranën e Shqipërinë

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

DITARI I NJË NËNE QË VUAN, 22 vjet në kërkim të së vërtetës

Shpellat e jugut, monumente të braktisura dhe të harruara nga shteti

Të pathënat e ekzekutimit të biznesmenit nga turisti-vrasës

Banka Botërore, “dhuratë” qeverisë para zgjedhjeve

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Inva Mula: Unë sopranoja e parë shqiptare në skenat evropiane

Nga Suada Daci

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?