“Gropa” 20 milionë euroshe e inceneratorit të Tiranës

Qindra mijëra fatura fiktive për shërbime të pakryera, dhjetra kompani të kontrolluara nga e njëjta dorë, miliona euro të trasferuara në kompani offshore. Një grup kriminal në shërbim të të cilit ishte vënë i gjithë shteti. Një skemë e madhe pastrami parash e mashtrimi me pasoja të rënda Gjithçka lidhet me aferën e inceneratorit të Tiranës, hetimet për të cilin kanë nisur 4 vite më parë, por ende nuk kanë përfunduar. Në kuadër të këtij hetimi, SPAK së fundmi ka firmosur 8 urdhër arreste të reja, për biznesmenë, gazetarë, apo shtetas të huaj, nën dyshimet se janë pjesë e një grupi kriminal që dyshohet se ka pastruar 20 milionë euro nga paratë e inceneratorit të Tiranës. Urdhër arrestet u firmosën për Ilir Dedjan, administrator i disa kompanive në Zvicër, një biznesmen që më së shumti kujtohet në Shqipëri për shkak të një megaskandali që shpërtheu në Zimbabve; Renardo Nallbanin, Dashamir Ymeraj, administrator i një kompanie fiktive e përfshirë në skemën e evazionit fiskal; Endrit Habilaj, gazetar; Denisa Tollkuçin, një nga drejtueset e “Integrated Energy B.V. SPV” sh.p.k, kompania koncesionare e inceneratorit të Tiranës. SPAK mori miratim në gjykatë edhe për arrestimin e shtetasve të huaj, Giusepe Ciaffaglione, Marc Lapat dhe Michael Druijts. “Aktiviteti kriminal i pastrimit të produkteve të veprës penale rezulton se është kryer në vazhdimësi duke filluar që nga momenti i lidhjes së kontratës koncesionare, duke përdorur mekanizma dhe forma të ndryshme të ngritura nga organizatorët e këtij aktiviteti kriminal, me pjesëmarrës shtetas shqiptar dhe të huaj, të cilët kanë vepruar në bashkëpunim në formën e posaçme të grupit të strukturuar kriminal”, thuhet në njoftimin e SPAK. Prokuroria ka ngritur ndaj tyre akuzat e mashtrimit me pasoja të rënda, “Pastrimi i produkteve të veprës penale ose veprimtarisë kriminale”, kryer në bashkëpunimin e veçantë në kuadër të grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”. Si drejtues të strukturës kriminale, SPAK thotë se kanë vepruar dy biznesmenët kontroversë, Mirel Mërtiri e Klodian Zoto, pronarët faktikë të inceneratorit të Tiranës, një incenerator që nuk ekziston, në një kohë që deri më tani janë paguar mbi 100 milionë euro. Si Mërtiri ashtu edhe Zoto janë të shpallur më herët në kërkim për akuzat e korrupsionit e pastrimit të parave. Urdhër arreste të reja po asnjë në pranga Tirana ziente prej kohësh nga lajmi se për aferën e inceneratorit të Tiranës priteshin urdhër arreste të reja. Madje, në mjediset mediatike kishin nisur të përfliteshin edhe emra, mes të cilëve edhe për zyrtarë të lartë të Bashkisë, nisur nga disa kontrolle që u ushtruan kohët e fundit. Por vetëm më 12 korrik, Gjykata e Posaçme miratoi kërkesat që SPAK i kishte dorëzuar me 29 qershor për caktimin e 8 masave sigurie arrest me burg. Mëngjesin e 13 korrikut, Policia e Shtetit ndërmori një aksion në kryeqytet për të arrestuar qoftë edhe njërin prej të dyshuarve, por do të dilte duarbosh. Të gjithë rezultonin të larguar jashtë vendit. Siç e do zakoni, policia ushtroi kontroll në banesat e disa prej tyre dhe më pas formalisht letrat ia dorëzoi prokurorit të çështjes. Prokuroria e Posaçme njoftoi 3 ditë më vonë, se zbatimi i tetë urdhër arresteve kishte dështuar. “Nënvizojmë se, Policia e Shtetit më datë 15.07.2024, ka vënë në dijeni Prokurorinë e Posaçme, për pamundësinë e ekzekutimit të masave të sigurimit personal ndaj shtetasve të mësipërm”, njoftoi prokuroria. Pikëpyetjet për aksionin mbetën të shumta. Shumë nga kritikët thanë se u dekonspirua, ndërsa opozita akuzoi SPAK se po amniston kryebashkiakun e Tiranës, Erjon Veliaj, i pyetur më herët nga prokurorët e posacëm në lidhje me këtë aferë. E vërteta është se në listën me 8 emra, pjesa dërrmuese e tyre rezultojnë jashtë vendit prej kohësh, ndërsa 1 apo 2 të tjerë që mbeten, duhet hetuar nëse u njoftuan, apo ndjenë frikën e hetimit dhe u larguan jashtë vendit, pa pritur ndonjë sinjalizim. Të arratisurit që “zhvatën” 20 milionë euro Në listën e të kërkuarve bie në sy emri i Ilir Dedjas, një biznesmen thuajse i panjohur për publikun, por me lidhje e njohje të hershme me ish-zv.kryeministrin Arben Ahmetaj që nga koha e fakultetit kur ishte bashkëstudentë në universitetin e gjuhëve të huaja në Tiranë. Dedja, dyshohet se pjesë e grupit kriminal të drejtuar nga Mirel Mërtiri e Klodian Zoto. Nga hetimi rezulton se Dedja ka patur kontrata me kompanitë e inceneratorëve në vlera qindra mijëra euro. Në 2018, ai i bleu Stela Gugalljas, partneres së Mirel Mërtirit, aksionet e kompanisë C.G.C për 500 mijë euro. Një vit më vonë, ai i ktheu mbrapsht këto aksione për 600 mijë euro. Paratë u dërguan në llogarinë e tij në Zvicër. Hetuesit zbuluan se kompania koncesionare “Integratet Energy BV SPV” e inceneratorit të Tiranës trasferoi në llogaritë e kompaninë 3DDD Swiss Trading SA me seli në Lugano të Zvicrës, e kontrolluar nga Ilir Dedja kishte trasferuar edhe shumën prej 500 mijë euro. Tej të tjerash, Dedja rezulton të jetë garantues i jetesës së partneres së Arben Ahmetaj në Zvicër, ku çifti jeton në një nga zonat me luksoze në këtë shtet. SPAK dyshon se pjesë e grupit kriminal janë edhe 3 shtetas të huaj, italiani Giusepe Ciaffaglione, Marc Lappat dhe Michael Druijts. Italiani Giusepe Ciaffaglione është një nga pronarët zyrtarë të inceneratorit të Tiranës me 30 % të aksioneve, i cili është shpallur në kërkim më herët nga SPAK, por tashmë konsiderohet si pjesë e grupit kriminal, që ka pastruar 20 milionë eurot përmes faturave fiktive. Shoqëria koncesionare e inceneratorit të Tiranës “Integrated Energy BV SVP” ka pranuar një faturë dhe ka deklaruar në organet tatimore vlerë punimesh rreth 28 milionë dollarë nga kompania “Integrated Technology Services” e Klodian Zotos. Në një kohë që Zoto nuk ka dhënë asnjë shërbim. Kjo marrëdhënie e kontraktuale e paraqitur mes “Integrated Tecnology Services” dhe shoqërisë koncesionare është fiktive, pasi Zoto dhe Mërtiri janë aksionerët “de facto” të shoqërisë “Integrated Energy BV SVP” që ka fituar kontratën koncesionare. Thënë ndryshe, janë pronarët faktikë të inceneratorit. Biznesmeni Mërtiri bëri çdo përpjekje për ta fshehur lidhjen e tij me inceneratorin e Tiranës. Por disa emaile të Michael Druijts administratori i kompanisë “Goeogenix” në Holandë, kompania mëmë e “Integratet Energy BV SPV”, zbuluan se truri dhe arkitekti i inceneratorit të Tiranës ishte Mirel Mërtiri. Emaili i datës 14 mars të vitit 2022 nga Michael Druijts është nisur në adresën “Limon Mango” dhe për dijeni Marc Lappat, një nga bashkëadiministatorët e Geogenix. Në këtë email Druijts i drejtohet Mirel Mërtirit me “Dear Mirel” (I dashur Mirel). Në fakt, emailet e shkëmbyera mes palëve ndihmuan prokurorinë të zbulojë se pas inceneratorit të Tiranës ishte Mirel Mëriti dhe Klodian Zoto. Ky i fundit, na shfaqet në dosjet hetimore, si njeriu pas kompjuterit pasi rezulton të ketë shkruar qindra emaile, të ketë bërë rezervime biletash hoteli e avioni, për veten, ortakun e tij Mirel Mërtiri, apo njerëz të politikës si Arben Ahmetaj apo Damian Gjiknuri. Në ndihmë të pronarëve faktikë të inceneratorit të Tiranës, sipas SPAK kanë ardhur edhe të dyshuarit e tjerë, Dashamir Ymeraj, që rezulton të jetë pronari i një kompanie fiktive e përfshirë në skemën e evazionit fiskal; Denisa Tollkuçi, nga drejtueset e “Integrated Energy B.V. SPV” sh.p.k. SPAK dyshon si pjesë të grupit edhe Endrit Habilaj, drejtues i një kompanie mediatike dhe Renardo Nallbani që lidhet më së shumti me marrëveshjen e depozitimit të dherave në landfill. Miliona të hedhura, por nuk ka incenerator Më shumë se 100 milionë euro iu ka kushtuar deri më tani taksapaguesve shqiptarë, projekti koncesionar i inceneratorit të Tiranës. Në një kohë që inceneratori nuk ekziston. Pavarësisht se qeveria dhe media të caktuara janë përpjekur nga 2020 të thonë se në Sharrë është ndërtuar një vepër e madhe. Në lidhje me këtë aferë dhjetorin e 2023 Gjykata e Posaçme caktoi 15 masa sigurie për zyrtarë dhe biznesmenë të dyshuar si të përfshirë, nga ish-ministri i Mjedisit, Lefter Koka, ish- deputeti socialist, Alqi Bllako dhe drejtori i Punëve Publike në Bashkinë e Tiranës, Taulant Tusha, apo zyrtari tjetër i Bashkisë Namik Simixhiu. Ndërsa më herët, në gusht të vitit të kaluar, SPAK vendosi sekuestro mbi kompaninë e inceneratorit të Tiranës, pasi nga hetimet rezultoi se pronarë faktikë ishin biznesmenët Mirel Mërtiri e Klodian Zoto. Të dy ata ishin ndërkohë në kërkim për korrupsion aktiv dhe pastrim parash për dy incineratorët e tjerë, Elbasanin dhe Fierin. SPAK më herët në dosjen hetimore që dërgoi në Kuvend kur kërkoi leje për arrestimin e ish-zv.kryeministrit Arben Ahmetaj - tashmë në arrati - theksonte ndër të tjera se projekti koncesionar i trajtimit të mbetjeve në Tiranë, mori jetë pasi kryebashkiaku Veliaj i dërgoi qeverisë në janar të vitit 2016 një studim fizibiliteti të IFC-së për zgjerimin e landfillit të Sharrës bashkë me propozimin për mundësinë e përfshirjes së sektorit privat në fushën e menaxhimit dhe trajtimit të mbetjeve urbane në kryeqytet. Arben Ahmetaj gjatë një interviste nga arratia ka ngritur akuza të forta, duke aluduar se pronari i vërtetë i inceneratorit të Tiranës është Erjon Veliaj. SPAK e ka pyetur z.Veliaj, të cilit po i heton edhe pasurinë, por deri më tani ndaj zyrtarit të lartë nuk ka një masë sigurie. Pyetja që shtrohet është: a mundet që një aferë kaq e madhe të bëhet pa bekimin e politikës? A janë të arrestuarit e deritanishëm apo ata në kërkim përgjegjësit e vetëm për këtë aferë, apo përgjegjësia shkon lart?

“Gropa” 20 milionë euroshe e inceneratorit të Tiranës

Nga Klodiana Lala

Artikuj të ngjashëm Artikuj

Përtej Zvërnecit

PROTESTA E MEMEVE TË TALLESH NË ZGRIPIN E PAMUNDËSISË

35 vjet PS po sto pa m’thuhej si je?

Zvërneci, investimi që do ndryshojë historinë e turizmit shqiptar

Historia e protestave nga ’90: Çdo brez, revoltën e vet

3 italianët e protestës së PD: Qëlluam policinë me patate, për solidaritet!

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Vajzat e humbura

Lufta me Bulevardin

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

PROTESTA E MEMEVE TË TALLESH NË ZGRIPIN E PAMUNDËSISË

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

“Gropa” 20 milionë euroshe e inceneratorit të Tiranës

Nga Klodiana Lala

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?