Gratë që tradhëtuan “Rilindjen”

Zyrtaret femra që Edi Rama u ka besuar gjithnjë e më shumë pushtet, e kanë tronditur propagandën dhe besimin e tij, në jo pak raste. Pasuria e drejtoreshës që zbuloi pastruesja në fillim të këtij viti, ishte dërrmuese për moralin që rilindja paraqet në publik. Newsbomb, bën një analizë të rasteve më të bujshme të grave që kanë tradhëtuar rilindjen, me abuzimet e tyre. Nga Alda Klosi, tek zëvendësministret e Tirja e pandemisë… Funksionarët e tmerrshëm të mesëm, i ka cilësuar Ismail Kadare në një libër, nëpunësit burokratë të administratës në përgjithësi. Teksa shkon në mesin e mandatit të tretë, Edi Ramës po i dalin disa funksionare, disa rilindase, shumë më të tmerrshme nga sa mendohej. Dhe po ndikojnë në përkeqësimin dramatik të imazhit të qeverisë. Në një kohë të shkurtër, brenda një muaji, tre zyrtare të nivelit të mesëm dhe të lartë janë përfshirë në skandale të rënda e me shumë kosto për mazhorancën. Të treja, me abuzime të rënda me postin që mbanin. Të treja, socialiste, militante të përkushtuara në fushata e në bërje votash. Dhe kjo besohet të jetë themra e Akilit për Ramën, që i dhemb më shumë, duke qenë se nga viti në vit, u ka besuar gjithnjë e më tepër pushtet grave, duke e proklamuar këtë edhe si përpjekje ndaj korrupsionit. Mund të ketë dhjetëra raporte ndërkombëtare që e rendisin Shqipërinë shumë keq për transparencën e integritetin qeverisës, raporte të KLSH-së e denoncime në media. Po ato ngelen letra, statistika, e jo shumë të rrokshme nganjëherë për mendjen e konsumatorit të lajmeve. Asgjë nuk bën më shumë efekt tek njerëzit, nuk i bën ata të kruajnë kokën nga nervozizmi, sesa kur shohin në ekran një vandak me euro që i gjendet një zyrtari. Veçanërisht, edhe më penetruese, edhe më shumë efekt duket se ka kjo histori, kur janë zonjat që kanë përfituar. Pastruesja që zbuloi milionat Rasti më spektakolar, është i një prej bashkëpunëtoreve më të rëndësishme të Arben Ahmetajt në detyrat që ai ka ushtruar vitet e fundit, si ministër e zëvendëskryeministër. Për një rrethanë befasuese, që ende po hetohet, pastruesja e Alda Klosit i zbardhi kësaj të fundit një pjesë të pasurisë, dhe nxori në sy të publikut shuma të majme e një luks të shfrenuar. Të paktën gjysëm milionë euro ju kapën zonjës që i shërbente ish-shefes së kabinetit të Arben Ahmetajt, e shumë bizhuteri të shtrenja, të cilat, siç ajo ka deponuar në polici, i ka marrë nga banesa e Klosit, ku punonte prej vitesh. Opinioni publik është tronditur nga ky rast. Kjo dëshmi brutale, është një denoncim i fortë për gjithë rilindjen dhe mënyrën e qeverisjes. Aq e madhe është revolta në rrjet e kudo, saqë kryeministri Rama, u detyrua të reagojë vetë për ngjarjen, edhe pse ajo është në thelb, një vjedhje banese. Por shuma e madhe që një zyrtare e lartë ruante në kasafortë në shtëpi, një shuk i fryrë me banknota 500 euroshe, që nuk justifikohet dot kurrë me të ardhurat nga puna, ishte një minë, shpërthimi i të cilës, preku padyshim imunitetin tashmë të dobët të qeverisë dhe të Edi Ramës, në vitin e 10 të qeverisjes. I vetmi rast i denoncuar me banknota 500 euroshe, ishte ai i djalit të guvernatorit të Shqipërisë Ardian Fullani, që në festat e veta me shoqërinë, kur ishte vetëm 20 vjeç në vitin 2014, fshinte djersët e ballit me kartëmonedha 500 euroshe. Prej atij momenti, kur monedha 500 euroshe doli për herë të parë në publik në formën e “abuzimit”, nuk ishin parë më në media dhe në opinionin publik kartmonedha të një prerje të tillë të madhe nga fëmijët e zyrtarëve të shtetit, apo nga vetë këta të fundit. Derisa erdhi rasti i Alda Klosit, në janar të 2023, pra 9 vite më vonë. Më tej në media u zbardhën edhe anomali të tjera të kësaj zyrtareje. Sipas formularëve të deklarimit të pasurive, kur ishte angazhuar në administratë, Klosi kishte patur një shtëpi modeste, 47 metra katrorë. Ndërsa sot, rezulton se është pronare e 5 apartamenteve. Lehtësia e madhe me të cilën e kanë vënë pasurinë, dhe kurajoja për të qëndruar mbi ligjin, janë të pabesueshme. Në çdo rast, drejtoresha si këto, me zullume jo të pakta, do të duhej të kishin pak frikë nga ligji dhe prokuroria. Drejtoreshë në Bashki, seksere në Ministri 10 ditë para se të shpërthente në publik ky skandal, sërish një tjetër rilindase solli acarim e protestë në sferën publike, kur u arrestua për mashtrim, pasi kishte marrë qindra mijë euro në disa individë, duke u premtuar atyre se do t’u siguronte fonde e projekte në Ministrinë e Bujqësisë. Drejtoreshë e rëndësishme në Bashkinë e Tiranës, Vjola Sterjo, u mësua nga disa publikime në media e portale se ishte edhe patronazhiste dhe në vijën e parë të fushatave të PS. Policia zbuloi më tej arsyen zyrtare të arrestimit. Nga hetimet e kryera rezulton se në periudhën mars-nëntor 2020, nëpërmjet mashtrimit, Vjola Sterjo dyshohet se ka përfituar në qytetin e Korçës, një shumë të konsiderueshme monetare, me qëllim ndikimin e saj në institucione shtetërore, që qytetarë të ndryshëm të përfitonin fonde monetare nga shteti”. Ndalimi i saj u bë pasi, Gjykata e Shkallës së Parë Korçë, me vendimin e datës 26 dhjetor, ka caktuar për këtë shtetase masën e sigurisë “Arrest në burg”, për veprën penale “Mashtrimi”, me pasoja të rënda. Nuk ishte thjesht një ish-drejtoreshë e Bashkisë. Viola njihet nga të gjithë si një kontributore edhe në shuma monetare te lista e donatorëve të PS, në listat zyrtare të publikuara nga Komisioni Qendror i Zgjedhjeve që në vitin 2013. E më pas, një komisionere e devotshme votash. Një person i dashur me të gjithë, e dashur nga gjithë zyrtarët e lartë të PS, punoi sa te ministria e turizmit, aq edhe te bashkia e Tiranës. Derisa tani, në një moment të rëndësishëm të jetës së saj, po kalon ditët në qeli në pritje të gjykimit për mashtrimet e mëdha me shuma po aq të mëdha monetare. Paradite shefe në AKSH, pasdite trafikante droge Edhe sot nëse kërkon në google, të del në profilin e saj në Linkedin, se është shefe e sektorit të IT pranë, AKSH-it. Agjensia kombëtare e Shoqërisë së Informacionit, një njësi me perceptim mjaft të goditur ndërkohë, prej kolapsit që pësoi sistemi nga sulmi i hakerave iranianë. Por në radhë gjatë kërkimit, janë lajmet mbi arrestimin e Erisa Feros, të cilës ju gjetën në bagazh thasë me lëndë narkotike. Mbi 50 kilogramë kanabis po trafikonte e reja me 30 dhjetor, kur u ndalua, e cila për shkak të funksionit kishte siguruar lehtësi në qarkullimin me automjet. Mediat zbuluan më tej pasionet e saj në qitje, praninë e shpeshtë në poligone, e po ashtu devocionin për PS. Madje ishte një prej komisionereve të shumicës, e kallëzuar nga KQZ për falsifikim në procesin e numërimit të votave. Hetimet e ndjekura nga oficerët e policisë së Korçës dhe prokuroria e Pogradecit, kanë zbuluar se Erisa Fero, kryente rolin e korrieres në këtë grup, pasi drejtonte mjetet ku ndodhej lënda narkotike. Ajo i shmangej patrullave të policisë, duke paraqitur dokumente si punonjëse e ministrive të ndryshme në vend. Fotot e ekzagjeruara të Erisa Feros, me puro të ndezura në klubet e natës në Tiranë, me dekolte të zgjeruara jo të denja për një zyrtare të administratës, shqetësuan këdo nga zyrtarët që e kishin punësuar, apo edhe ata që e ndiqnin këtë lajm në mënyrë të ethshme nga ekranet e televizioneve. Çdo shqetësim qytetar, lidhej me faktin sesi kishte mundësi që një vajzë e përmasave të tilla, të kishte hyrë në administratë, madje, në poste kaq shumë të rëndësishme. Konkluzionet, të gjithë i kishin të njëjta. Të paktën, meritokraci nuk është. Zv-ministrja që mori dhe një arkë peshk Më tepër se sa shuma, apo dhuratat që pranoi ku përfshihej edhe një arkë me peshk të egër, në rastin e zëvendësministres së arrestuar në vitin 2000, binte në sy lehtësia me të cilën trafikohej një vend pune, e lakmia e banaliteti për të marrë gjithçka në këmbim. Rovena Voda, deri kur u kap, ishte edhe një figurë mjaft e zëshme e publike në mbrojtje të mazhorancës edhe nëpër ekrane. U la në arrest shtëpie, pasi doli në përgjime teksa mori 2 mijë euro, një telefon të ri, dhe një arkë me peshk, për të rregulluar dikë në punë. Lajmi shokoi opinionin publik në atë kohë. Dhe nuk u deshën 3 ditë për ta harruar. Ajo u shpall fajtore dhe u dënua me 10 muaj burg. Edhe më herët, Ramës i ka hyrë ujë në anije, edhe prej disa grave të tjera të fuqishme, që ka promovuar ai vetë. Kanë qenë rastet që u zbuluan me fatura shumë të shtrenjta qëndrimi në hotele luksoze të ministreve, konflikti i interesit me bashkëshortët investitorë strategjikë, apo tenderat sekrete në kohën e pandemisë. Por janë abuzimet e shëmtuara që kanë goditur më shumë, në radhë të parë propogandën e qeverisë, sipas të cilës, ata janë të ndershëm e nuk abuzojnë me detyrën. Janë aty vetëm për të shërbyer. Drejtoresha e Uniformave të shtrenjta Një tjetër grua, ka shkaktuar një gropë jo të vogël në imazhin e rilindjes, me aferën e tenderit të Unifromave të Policisë, ku bëhej fjalë për 28 miliardë lekë të vjetra. Doli se rrobat ishin blerë shumë shtrenjtë, dhe se për të njëjtën bluzë apo xhaketë, kishte vlera të ndryshme. Shkelje dhe anomali fëminore, që dëshmonin për nxitimin për t’ja dhënë dikujt këtë bonus, e për të përfituar sakaq, më anë tjetër. 3 vite më parë, u dënuan 8 zyrtarë, por në krye qendronte Drejtoresha e Blerjeve të Përqendruara në Ministrinë e Brendshme, Edlira Naqellari. Kallëzimi u bë në prokurori në atë kohë nga deputeti Murrizi, i cili e pati të lehtë dhe i erdhi për hosh, të ndërtonte fabulën e tij me stilin popullor, se si ishin paguar çmime sikur, disa veshje të qenë marrë tek Armani. Tirja e pandemisë Në kulmin e pandemisë, në fillim të vitit 2021, kur qeveria e kryeministri po shfaqeshin gjithnjë e më shumë si heronj në front, që po shpëtonin shqiptarët nga ploja e virusit, e armikut të padukshëm, doli në ekran, në sytë e gjithë botës, një rast alarmues. Sanitarja e Sanatoriumit, i kishte marrë një gruaje 8 milionë lekë që të kujdesej për të atin e saj dhe u zbulu se nuk kishte kryer asnjë shërbim domethënës ndaj tij. Këto para ajo i ndante me kolege e infermiere. 4 prej tyre u arrestuan. Edhe pse nëpunëse e ulët, rasti i Tires e dërrmoi propagandën e Ramës, i cili i tregonte qytetarëve gjithë ditën të kundërtën. Por nga ky skandal, u pa se edhe në këtë ditë të fundbotshme, sërish njerëzit e paguanin nën dorë shëndetësinë falas, e shpesh, edhe më shumë se në kohë të zakonshme. Deklarata irrituese që largoi kryebashkiaken Pak ditë pas tërmetit apokaliptik të fundit të nëntorit të vitit 2019, teksa qytetarët dhe opinioni publik ishin në një gjendje tensioni të nderë, e kur Kryeministri shfaqej rrënojave si Jezusi në Golgotë, kryetarja e Bashkisë së Durrësit, aty ku edhe goditja qe më e fortë e humbja më e madhe në njerëz, u shpreh në publik, se ajo ishte e kënaqur me 50 viktima, pasi numri mund të kishte qenë shumë më i lartë. Qytetarët u revoltuan, dhe reagimet ishin shumë negative e të zjarrta. Bash të nesërmen e kësaj deklarate, me 1 dhjetor, Valbona Sako lajmëroi dorëheqjen. Akt që besohet se erdhi, pas qortimeve të ashpra të Kryeministrit. Shija e qendrimit të saj, pa empati, burokratik, e pa ndjeshmëri, vazhdoi gjatë në publik. Lëngata e mandatit të tretë (koment) Një reklamë që ka bombarduar veshët e shqiptarëve prej kaq vitesh, nis me një grua që ankohet për shëndetin, dhe që i lypset të marrë suplement medikamentesh. Ajo thotë: Me kalimin e viteve, gjymtyrët e mia nisën të dobësohen… E njëjta gjë duket se ndodh me qeverinë. Me kalimin e viteve, vitaliteti, forca dhe ndjeshmëria e saj nis e zbehet. Ky është rasti ideal për funksionarët e tmerrshëm të mesëm që të bëjnë para. Aftësia e reagimit të shefit të madh, jo sa duhet. Plogështia ka zënë vendin e sanguines. Në vitin 2014, qeverisja e Ramës sapo kishte nisur. Qe e freskët dhe plot energji e nerva. Kryeministri shkarkoi menjëherë nga detyra një zëvendesministre, për shkak se u zbulua që ishte debitore e dritave. Një shumë qesharake, por si simbolikë binte shumë ndesh me aksionin e tij për energjitiken, e sidomos me propagandën rilindase. Aq më tepër, se gjithë PR-in, për të ardhur në pushtet e për të vijuar më tej, në një farë mënyre Rama e kishte mbështetur në një tezë të fortë, e sakaq të rrezikshme. Se ata, pra socialistët ishin jo vetëm politikisht, por edhe si qënie njerëzore, më të mirë se demokratët. Ky tra ku pat mbështetur ngrehinën, nisi të kalbëzohet shpejt. Dhe rastet si këto më sipër që ka sjellë Newsbomb, që janë vetëm një pjesë e vogël e një statistike të bollshme me abuzime nëpunësish, dëshmuan se rilindasit, nuk janë më të mirë se të tjerët. Janë po aq grykës e përvetësues, lakmitar e ambiciozë për t’u pasuruar e patur privilegje. Eshtë forca e modelit dhe papajtueshmëria që mund t’i mbajë nën fre. Por mandati i tretë s’mund të shërbejë në këtë sens. Morali ka marrë goditje, nuk ka ide të mëdha, dhe s’ka fabul se përse rilindasit e ai vetë duan ta udhëheqin sërish vendin. Grupe të fuqishme brenda shumicës janë konsoliduar e lufta mes tyre, e shndërron garën për pushtet e pasurim, në një betejë të pandalshme. Ndaj, fenomeni i korrupsionit, i abuzimit me detyrën, i garës së grave për më shumë para, banesa e bizhuteri të shtrenjta, do të vijë në rritje. Kalbëzimi është i pashmangshëm. Është kjo arsyeja, pse bota e qytetëruar lejon votën e lirë, dhe gjykimin e pandikuar të sovranit, çka sjell domosdoshmërisht ndryshim e rrotacion. Energji e moral të ri. Të paktën në fillim.

Gratë që tradhëtuan “Rilindjen”

Artikuj të ngjashëm Artikuj

102 kontejnerët me ngarkesën e errët të maskuar nën hijen e portit

Bjeshkët që marrosën turistët: Nga më e bukura Zoj, tek Xhubleta

Shqipëria 49’ nën lupën e CIA-s: Si t’i ndihmojmë grupet e rezistencës!

Silvana Braçe ekonomistja që pushtoi Skenën e Festivaleve

Ne mbushim 3 vite dhe kemi një dhuratë për ju!

51 ministrat që Edi Rama u bëri NDERIN E JETËS

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Inva Mula: Unë sopranoja e parë shqiptare në skenat evropiane

Bjeshkët që marrosën turistët: Nga më e bukura Zoj, tek Xhubleta

102 kontejnerët me ngarkesën e errët të maskuar nën hijen e portit

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Silvana Braçe ekonomistja që pushtoi Skenën e Festivaleve

Kapodistria, kush ishte Gjon Gjika, presidenti i parë i Greqisë

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Gratë që tradhëtuan “Rilindjen”

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?