GRAMSHI/ Zambakët që “çelën” qytetin

“Vetëm uji me kripë mungon, të gjitha të tjerat mund t’i gjesh në Gramsh”. Kështu më tha një mikja ime me buzët që i shkonin vesh më vesh nga kënaqësia, dhe me sytë që po i shkëlqenin si diell kur po më ftonte të kalonim një ditë në qytetin e saj të vogël në metra katrorë, por, siç më tregoi ajo duke hiperbolizuar e madje duke e treguar me duart e hapura deri mbi kokë si të ishim akoma në shkollën fillore, “me bukuri përrallore”. Jam mësuar të mos u bishtnoj këtyre lloj kureshtjeve. Në momentin kur e dëgjova nuk e kuptova se çfarë donte të më thoshte saktësisht, por pasi sytë e mi panë mrekullinë që qyteti dhe fshatrat përreth të ofronin, thashë me vete: “Pati të drejtë!”.

Ndryshe nga qytetet e tjera, që i joshin vizitorët përmes resorteve luksoze e jo vetëm, në Gramsh bukuria e virgjër e paeksploruar e luginave, kodrave, apo rrugëve me kalldrëm që po investohen fuqishëm këto kohë, të fton për ta parë me kuriozitetin e dikujt që kërkon të eksplorojë dhe të ketë edhe aventurën që të kënaq gjithë familjen.