“GOGOLI” McGonigal dhe vullkani i ndezur i Ballkanit

A do të ketë prezencë të Kryeministrit shqiptar në hetimet e kongresit amerikan për çështjen “McGonigal”? Diplomatja Edith Harxhi, ish-zv,ministre e jashtme e PD, thotë se “Po”. Harxhi në këtë analizë të zhvillimeve në Ballkan shkruan se nga mediat amerikane provohet se Edi Rama ka lobuar pranë FBI për të shpallur “non grata” Sali Berishën nga sekretari amerikan i shtetit. Edi Rama nga ana e tij e ka thënë disa herë publikisht se nuk ka lidhje me lobimin ndaj PD apo shpalljen non grata të liderit të saj, duke dhënë argumentet se pse e ka pritur McGonigal në zyrën e tij. Por kjo çështje ka shkaktuar tension në Shqipëri. Harxhi analizon se gjithë Ballkani është në kriza parlamentare dhe zgjedhore dhe se komuniteti ndërkombëtar, – Departamenti i Shtetit apo Bashkimi Evropian, – kanë dështuar derimëtani në përpjekjet e tyre për një rajon stabil. Harxhi parashikon se qeveria e Shqipërisë do të bjerë dhe vendi do të kalojë në zgjedhje të parakoshme

Skandali “McGonigal – Rama Gate” do të hyjë në analet diplomatike në Shqipëri dhe Amerikë si skandali më i madh i të gjitha kohërave në këto marrëdhënie. Për nga përmasat dhe impakti që ky skandal i ka dhënë skenës politike në Shqipëri mund të krahasohet me dështimin e operacionit të forcave aleate CIA dhe MI6 në vitet ’50 kur Kim Filbi tradhtoi për llogari të Rusisë operacionin për shpëtimin e Shqipërisë nga diktatura e sapo nisur e Enver Hoxhës.