GJERMANI – SHQIPËRI, Një marrëdhënie e veçantë?

Që nga tetori 1987 kur Ambasada Gjermane u vendos në një suitë të veçantë të Hotel Dajtit, ka pasur shumë trysni gjermane mbi Shqipërinë. Ish-kryeministri Nano mbahet mend për batutën se asfalti gjerman në dalje të Lezhës drejt Shkodrës, ishte nga të paktat rrugë nacionale që nuk kishte nevojë për ndërhyrje… Ndërsa sot në vend, operojnë të paktën katër fondacione gjermane mbi jetën publike dhe politike. Pse Gjermania vendos gjithmonë theksin tek ndarja me të shkuarën komuniste dhe cili është shkaku që investimet gjermane në Shqipëri nuk janë në nivelin e duhur? Procesi i Berlinit apo Ballkani i hapur? Cilat ishin idetë e artikuluara nga Presidendi gjerman në vizitën e tij në Shqipëri në fillim të dhjetorit…

Më 2022 Shqipëria pati disa aktivitete të rëndësishme që lidhen me 100 vjetorin e marrëdhënieve diplomatike me SHBA, Britaninë e Madhe, Francën, Hungarinë, Austrinë, Çekinë (Çekosllovakinë), etj, por është interesant fakti se kur bëhet fjalë për Gjermaninë, pikënisje nuk merren vitet ’20, por viti 1987. Pala gjermane është kujdesur vazhdimisht të mënjanojë nga kujtesa dhe çdo formë nderimi periudhën që kulmoi me pushtimin e Shqipërisë nga Gjermania naziste, siç është kujdesur gjithashtu të tregojë vetpërmbajtje ndaj festimeve të tepruara dhe butaforike që bëhen çdo vit në Shqipëri për të kujtuar fitoren e luftës mbi Gjermaninë, pavarësisht faktit se prej vitit 1944 vijon debati jo rreth çlirimit, por mbi detajet kohore se kur iku gjermani i fundit, mesnatën e 28 nëntorit apo në orët e para të 29 nëntorit 1944.