“Gazetarja Everest”, si ia doli BETI të ngjisë 5364 metra pa oksigjen

Për t’i shpëtuar zhurmës së Tiranës, lajmeve e debatit të ditës, kafeneve të mbushura plot, thashethemeve e gjullurdisë së madhe të metropolit, ajo ka ditur ku të arratiset. Çdo fundjavë ngjitet nëpër malet e Shqipërisë dhe zbulon një majë të re. Deri tani, në Shqipëri, nuk ka lënë majë pa kapur. Beti Njuma, fytyra e lajmeve në dy dekadat e fundit televizion, këtë herë u ngjit lart, aty ku pakkush ka guxuar, në kampin bazë të Everestit, 5364 metra të lartë. 

Por çfarë e lidh një gazetare të kuruar e të kujdesshme si Beti, me një sport të rrezikshëm si alpinizmi?

“Ngjitja në male është një pasion që e kam zbuluar vonë, që ka fjetur shumë kohë pa e ditur se ishte aty, brenda meje. Ndoshta fakti që babai është alpinist i vjetër i ekipt të 17 Nëntorit/Tiranës ka luajtur një rol të dorës së parë. Jemi rritur me ndjesinë dhe vetëdijen për malin, me ngjitjet e vazhdueshme që im atë kryente duke na bërë shpesh pjesë të aktiviteteve verore nëpër Shqipëri”.