“FLAMURTARËT” E 9 NËNTORIT

Nga Esiona Konomi Më 9 nëntor, do të votohet për kryetarët e rinj të bashkive Mat, Cërrik, Berat, Tepelenë dhe Vlorë. Karrigia e kryebashkiakut të Tiranës duhet të presë për të kuptuar fatin real të saj. 5 “flamurtarë” nga Partia Socialiste, 5 të pavarur që kanë marrë bekimin mbështetës të Sali Berishës dhe një kandidat i Adriatik Lapajt përbëjnë mozaikun e përballjes së fundvjeshtës. Kryetarët e rinj do të gëzojnë 1 vit e gjysmë mandat, deri në zgjedhjet e rregullta të pranverës së vitit 2027. Të pavarur me “bekimin e Berishës” Entuziazmi i demokratëve pas arrestimit të Erjon Veliajt nuk ishte në të njëjtin nivel me gatishmërinë e tyre për të hyrë në një garë me socialistët për të marrë drejtimin e Bashkisë Tiranë. Një cikël kafesh me partitë e tjera opozitare, dëshmuan se Sali Berisha kishte një plan “B” vec betejës ballë për ballë. Kjo ishte e dukshme qysh kur vetë kryedemokrati nuk shkoi në bisedime, por autorizoi për negociata, Flamur Nokën, Belind Këlliçin dhe Ilir Alimehmetin. Aleatët tradicionale i qëndruan besnikë “kodit të heshtjes”, ndërsa të rinjtë provokuan, herë duke hedhur në publik emrat e propozuar, (siç bëri Agron Shehaj me Ermal Hasimen, Edlira Çepanin dhe Florjan Haçkajn), e herë duke vënë kushte nga studiot televizive, siç bëri Adriatik Lapaj, që tha se do të bashkonte forcat me Berishën, vetëm për të mbështetur një kandidat jo partiak e të pavarur. Nga një mbledhje kryesie, Sali Berisha doli më një konkluzion: “Në të gjitha bashkitë, PD do të mbështesë kandidatë të pavarur dhe nuk do të garojë me emra partiakë”. A ishte ky një dezertim? Pranim i humbjes dhe braktisje e zgjedhjeve? Analistja Jonida Shehu i tha Newsboomb , se në këtë mënyrë, Berisha luajti për të mos humbur, dhe jo për të fituar. “Strategjia e PD-së është një zgjidhje e mirë për situatën ku gjendet partia dhe opozita pas 11 majit. Më ka suprizuar Berisha me zgjedhjen, e mençur dhe me pak dëme për Partinë Demokratike. Në çdo variant të rezultatit, PD-së nuk do t’i faturohet një humbje që s’do ta mbante do më, pas asaj të 11 majit”,- tha gazetarja Shehu. Edhe analisti Lutfi Dervishi e mbështet këtë zgjedhje, si një formë për të testuar masat në këto zgjedhje që janë për një mandat të pjesshëm e jo të plotë. “PD është e fituar edhe nëse humbet. Ajo ruan kohezionin/statuskuone e brendshme. Krijon mundësi për bashkim të votës së ndarë edhe mes demokratëve dhe teston nëse ka vote proteste në Tiranë”,- tha Dervishi për Newsboomb. Për gazetarin Mentor Kikia është e konceptueshme që gara të braktiset, edhe sikur kundërshtari të jetë shumëfish më i fortë. “Duhet që në PD figurat të sakrifikonin dhe të garonin, sepse vetëm përballja të forcon. Po të luante Partizani me Realin, dihet që do të humbasin. Ama ata e zhvillojnë ndeshjen dhe futbollistët e Partizanit do të bënin të pamundurën për të hyrë në fushë përballë edhe një kundërshtari të pathyeshëm. Përballja është dinjitet”,- tha Kikia. Megjithëkëtë, gazetarja Jonida Shehu ngul këmbë se në këtë formë, PD ka minimizuar faturën e këtyre zgjedhjeve. “Të mbështesësh një kandidat të pavarur, është të marrësh meritat për fitoren dhe asnjë kosto për humbjen. Është lëvizje taktike e mençur në rrethanat aspak të favorshme të kohës, përgatitjes, dhe sigurisht të kundërshtarit që ka përballë. Është një nga ato zgjidhjet në minutën e fundit, ku ti luan jo për të fituar, por për të mos humbur”,- argumenton Jonida Shehu. E sigurt është që Partia Demokratike dhe aleatët e saj, që mbështesin kandidatët e pavarur, nuk do ta kenë emrin në fletën e votimit, dhe rrjedhimisht as peshën e kryqeve që vihen mbi letër pro apo kundër tyre. “Emrat e partive politike që e mbështesin politikisht këtë kandidat nuk ka asnjë arsye të jenë në fletën e votimit, pasi kandidati ose është i pavarur (i mbështetur nga zgjedhësit), ose i mbështetur nga një parti politik apo koalicion” , shpjegoi për Newsboomb kreu i KQZ-së, Ilirjan Celibashi. “Beteja e ngrirë” për Tiranën Më 12 shtator, nga Asambleja e Partisë Socialiste, teksa në njërën fjali “i qante hallin” Veliajt, në tjetrën, Edi Rama i jepte grushtin e fundit. “Tirana nuk mund të presë as 7 ditë, jo më 7 muaj pa kryetar bashkie”,- tha kryeministri. Pasuesja ishte gati. Ogerta Manastirliu. Këshilli Bashkiak u urdhërua të gjejë rrugën për ta shkarkuar, operacion, që edhe pse mes disave shkaktonte dhimbje, u realizua pa rezistencë. Menjëherë Edi Rama firmosi shkarkimin sipas propozimit të këshillit, dhe Presidenti u njoftua se edhe në Tiranë duhej një datë zgjedhjeje. Bajram Begaj nuk u frenua nga një padi që kishte bërë Veliaj në Gjykatë Kushtetuese ku kundërshtonte shkarkimin, dhe dekretoi 9 nëntorin si datë edhe për kryeqytetin. Pak ditë më vonë, Gjykata Kushtetuese ju dha një shuplakë dy krerëve të shtetit, duke pezulluar zgjedhjet në Tiranë derisa të japë një verdikt në 31 tetor. Ato do të zhvillohen vetëm nëse Gjykata del me vendim përfundimtar se shkarkimi i kryebashkiakut ishte i ligjshëm, e për këtë, të gjithë duhet të presin. Kjo lëvizje e forte zgjat mbajtjen ndezur të Ogerta Manastrirliut, e cila po vijon fushatën sikur zgjedhjet të mbahen nesër. “Ajo është një administratore e sprovuar dhe një figurë e investuar në PS, që gjithmonë ka pasur besimin e kryetarit të partisë dhe është një profil i përshtatshëm fiks për këtë moment që është bashkia nga socialistët. Pas Veliajt dhe protagonizmit të tij në bashki, apo pas lidhjes së ngushtë të figurës së tij me kryeqytetin, Ogerta vjen si për të thënë se bashkia është e Partisë dhe jo e individit,”- shprehet Jonida Shehu. “PS do të mobilizohet, sidomos në Tiranë - për të "rrëzuar" fushatën e PD për manipulimin dhe lojën e pabarabarte në 11 Maj, por edhe për të treguar se Veliaj ishte individ dhe jo faktor me peshë brenda PS-së”,- analizon Lutfi Dervishi. Sali Berisha pati në tryezë emra të ndryshëm. Agron Shehaj propozoi emrin më protagonist të fushatës, Ermal Hasimjan; ndërsa Fatmir Mediu hodhi në treg emrin e Edlira Çepanit. Por Doktori ju tha gazetarëve se “ ata që propozohen nga partitë, janë gjysmë të pavarur, dhe se të pavarurit e vërtetë janë ata që vetëshpallen”. Në mbrëmjen e asaj dite, aktori dhe humoristi Florjan Binaj, pjesë e një emisioni investigativ që transmetohet në televizionin e vetëm opozitar e që shpesh lidhet me familjen “Berisha”, shpalli kandidaturën. I pari që e mbështeti ishte Adriatik Lapaj, i cili e kishte pasur në krah të djathtë në nisje të lëvizjes “Shqipëria bëhet”, por që rrugët u ndanë pa shpjegime. Më pas e mbështeti Berisha, dhe në fund, edhe Agron Shehaj, e cili e akuzoi PD-në për tradhti, por pavarësisht kësaj, “Mundësia nuk do të bëhej opozitë e opozitës” . Me ngrirjen e datës së zgjedhjeve në Tiranë, Binaj është treguar më i përmbajtur. Më pak shfaqje në televizion, ai deklaron fushatë pa Berishën në krah, ndërsa u largua nga drejtimi i emisionit “Piranjat”. Ergys Mërtiri, përtej vlerësimeve për Forian Binajn, thotë se “ ai nuk është politikan dhe nuk ka mundësi të prodhojë dot as model e as ndonjë korrent politik. Pikërisht prandaj Berisha përzgjodhi atë, sepse nuk ka asnjë mundësi të krijojë ndonjë reaksion që mund ta eklipsojë sadopak”. Analisti Mërtiri mendon se Ermal Hasimja kishte potencialin të prodhonte gravitacion. “Sigurisht, në kushtet ku është opozita, as Binaj e as Hasimja nuk do të fitojnë dot. Por Hasimja kish mundësi të ofrojë një vizion politik ndryshe dhe një korrent të ri në shkretëtirën e opozitës. Ai po hynte në garë për ti dhënë jetë një projekti që do të vijonte edhe pas saj. Pikërisht kjo e penalizoi”,- deklaron Mërtiri. Lutfi Dervishi gjithsesi e sheh kandidaturën të përshtatshme me rrethanat. “ Zgjedhjet plotësuese edhe në bastione si rregull i ka fituar partia në pushtet. Opozita ka gjetur një mënyrë për të testuar këtë dhuratë (Tiranën) me kandidatë të pavarur”,- i tha ai revistës Newsboomb. Dyluftimet e tjera.... E sigurt është se më 9 nëntor, rreth 300 mijë votues, qytetarë të Vlorës, Tepelenës, Beratit, Cërrikut dhe Matit, do të zgjedhin kryetarin e ri të bashkisë. Socialistët bënë një mbledhje të shkurtër kryesie, jo më shumë se 20 minuta dhe më pas shpallën “kalorësit” e tyre të betejës. Ndërsa demokratët studiuan terrenin dhe deklaruan mbështetjen e kandidatëve të pavarur në çdo bashki. Në Vlorë, aq sa Ermal Dredha suprizoi me dorëheqjen, aq edhe Edi Rama suprizoi duke kandiduar deputeten e sapo zgjedhur, Brunilda Mersini. Është hera e parë që një grua synon drejtimin e kësaj bashkie. Drejtoresha historike e spitalit rajonal, duhet të lërë mandatin, pa e shijuar as 2 muaj parlamentin, për të ndjekur rrugën e të parës së Vlorës. Përballë saj, opozita ka vendosur aktivistin Dionis Sota. Një emër që u njoftua së pari nga Adriatik Lapaj e më pas u mbështet edhe nga Partia Demokratike. Sali Berisha “mbyti” zërat e Bujar Leskajt, i cili paralel zhvillonte plane për një kandidat nga radhët e partisë. Sot rezulton të mos ketë një përvojë politike, as në nivel lokal. Ai ka qenë ndër vite aktivist për ngjarjet në qytetin bregdetar si drejtues i shoqatës turistike “Arta”. Në Cërrik, beteja është mes 3 kandidatëve, pasi këtu, Lapaj ka dalë me një kandidat të tijin. Socialistët, garojnë me Florenc Dokën, një jurist i cili po drejton përkohësisht këtë bashki, teksa Andis Salla, kryebashkiaku i mëparshëm u bë ministër i Bujqësisë. Ai ka mbajtur poste të ndryshme më herët, përfshirë edhe drejtimin e burgut të Peqinit. PD mbështet Amarildo Hoxhën, një mjek i ekipit të futbollit të Elbasanit, i cili do të regjistrohet si kandidat i pavarur. Partia “Shqipëria Bëhet” synon të ndikojë në garë me Eligert Himën, një kriminolog i sapokthyer nga Italia. Tepelena përball një ish-drejtues me një arkitekt. Pas fitores së mandatit të deputetit nga Tërmet Peçi, socialistët futën në lojë një peshë të rëndë, si Gramoz Sako. Ai drejtoi Gardën e Republikës, komandat i saj për 11 vjet, deri në vitin 2024 kur u dorëhoq për t’u marrë me biznes. Përballë tij, demokratët mbështesin një djalë të ri me profesion arkitekt. Gabriel Guma, një 26-vjeçar i kthyer në vendlindje, synon të sjellë frymë të re në qeverisjen lokale. Në Mat, financieri Altin Bojni, pasi ka drejtuar disa institucione lokale, nga posta tek shëndeti publik e burgjet, synon drejtimin e bashkisë, në vendin e lënë bosh nga Agron Malaj që u bë deputet. Demokratët i kanë vënë përballë si të pavarur, Eduart Brahlikën, një avokat me reputacion të mirë në zonë. Kur Ervin Demo iku nga Bashkia e Beratit për tu bërë deputet, ja la çelësat e bashkisë, Ervin Cecës, ekonomist me profesion që ka qenë i angazhuar në politikën lokale. Atij i besohet tashmë gara nën siglën e PS. Përballë tij do të jetë ne kampin opozitar biznesmeni Pavlo Shkarpa, që po kërkon ndryshim në drejtimin lokal.

“FLAMURTARËT” E 9 NËNTORIT

Esiona Konomi

Artikuj të ngjashëm Artikuj

Lufta me Bulevardin

“ALBANIAN FILES”: 4 çështjet e debatueshme

Vajzat e humbura

Librazhdi, qyteti që nuk njihni, me bujtina dhe aventura që ju lënë pa mend

Mariglen Disha, njeriu pas vizionit të ri për Librazhdin!

PROTESTA E MEMEVE TË TALLESH NË ZGRIPIN E PAMUNDËSISË

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

Gjiri i Kakomesë, “Bukuroshja” e braktisur bëhet gati për TURIZËM

PROTESTA E MEMEVE TË TALLESH NË ZGRIPIN E PAMUNDËSISË

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

“FLAMURTARËT” E 9 NËNTORIT

Esiona Konomi

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?