Ergys Verdho: Asnjë panik, KESH do garantojë DRITA 24 orë

Ergys Verdho është i pari që hap derën e institucionit, dhe i fundit që nuk e kursen energjinë duke e mbyllur dritën e zyrës në mesnatë. Jemi në krizë. Qeveria përgatit plane, por KESH duhet t’i zbatojë. Kur flet me ne në këtë intervistë, tek optimizmi i drejtorit të ri, nuk të duket se do kemi dimër të vështirë. Çmime të kripura për një kategori mund të ketë, por mungesë dritash, as që bëhet llaf. Drejtori i Përgjithshëm i KESH sqaron me detaj dhe shumë thjeshtë, popullatën por edhe më skeptikët që po bëjnë gati gjeneratorët, që në këtë dimër, energjia elektrike nuk do të mungojë. E si do të realizohet kjo? Verdho, i ka të gjitha përgjigjet…

Qeveria ka shpallur tashmë planin që parashikon rritjen e çmimit të energjisë elektrike për familjarët dhe bizneset e vogla, nëse e kalojnë fashën 800 kilowat/orë në muaj. Ju duket shpenzim luksi që një familje me 5 ose 6 anëtarë, të harxhojë deri në 1,500-2,000 kilowat/orë në muaj? Duhet të lajnë rrobat e fëmijëve, të pergatisin vaktet e ushqimit, por edhe të ngrohen në dimër. Nuk i arrijnë dot të gjitha me 800 kilowat/orë në muaj. Mund t’u shkojë fatura e energjise elektrike 150-200 mijë lekë të vjetra në muaj. Si do ta përballojnë?