Eleganca e përjetshme e Valentina Leskajt

74 vitet duken shumë pak kur ulesh me Valin që me pasion, me ide përherë të reja, aspak e mpakur dhe e kuruar deri në detaj në fisnikërinë e vet, të bën të ëndërrosh se një ditë do të jesh si Vali. Gruaja që hyri në politikë si një vlerë e shtuar e të majtës dhe doli nga politika kur e pa se nuk kishte ç’të jepte më në një ambient si ai. Por, populli thotë se kur mbyllet një derë, hapet një dritare: dhe Valentina Leskajn e kërkuan direkt nga komiteti amerikano-izraelit për të qenë në bordin e një organizate nga më influentet në botë. Për këtë zgjedhje, për politikën që do të donte, për punën e parreshtur në shoqërinë civile e për familjen, Valentina Leskaj “zbërthehet” në këtë bashkëbisedim. Ah, mos kërkoni emra politikanësh në këtë rrëfim, sepse për Valin, vlerë kanë parimet, idetë… njerëzit shkojnë e vijnë….

Valentina Leskaj mund të kishte zgjedhur ndryshe. Politikania shqiptare njihet gjerësisht në gjeneratën e saj si një zonjë e kuruar, modeste e matur, e që bëri beteja të forta politike. Por në kulmin e saj të karrierës politike, vendosi të tërhiqet për të nisur diçka tjetër. Modeli i Vali Leskajt kërkohet sot në jetën publike shqiptare tek një klasë politike e konsumuar që nuk gjen kurajo ta mbyllë ciklin e vet. Sharmi dhe eleganca e Valit kujtohet ende.