E përçudnuam bustin, edhe vilën e diktatorit, po a iku komunizmi?

E hodhëm bustin 35 vjet më parë në shkurt, po në shkurt 35 vjet më vonë i vëmë flakën vilës ku jetoi Enver Hoxha. A iku komunizmi apo a është diktatura e mendimeve, e veprimeve që nuk na lejon të shkëputemi nga totalitarizmi? 35 vjet pas rënies së diktaturës, Shqipëria ishte sërish në shesh. Veçse sheshi nuk është më i njëjti. Aty ku kishin tërhequr zvarrë statujën e Enver Hoxhës, këtë dimër fryn më shumë erë. Armiku politik është një tjetër, Edi Rama. Berisha vijon ende të kërkojë përçudnimin e një personazhi tjetër që e quan antoganistin e radhës në historinë që do shkruhet pas shumë vitesh, veçse nga ajo kohë, 35 vjet më parë ai është njëlloj, energjik për të dalë në shesh e për të rrëzuar “qelbësirën”. Nuk më ndodh ta kem shkruar ndonjëherë këtë fjalë, por ja që ka një ka gjithnjë një herë të parë. Dhe ekzaktësisht po përdor një nga fjalët më të përdorura në kohën kur unë votoja për herë të parë dhe të fundit. Këtë vit nuk kishte një bust për t’u tërhequr zvarrë, por shtëpia e diktatorit që shndriste me art, ua bëri me sy. Një skenar ishte që vetë kryeministri Rama, i tërhequr nga arti, nga dëshira për t’u ushqyer me art në vend që të ushqehej me të njëjtën betejë politike që kush e di sa herë ia kishte dëgjuar refrenin, me gjasë ishte aty, brenda me artistët. Kështu që mesazhin politik mund ta jepnin te dera e Kryeministrisë (i bie pragut të dëgjojë dera), por veprat mund t’i shihnim të shkëlqenin veç aty, në Vilën 31. Kështu 35 vjet më vonë, pas rrëzimit të bustit, vilës i duhet vënë flaka. Aty është edhe “diktatori” i ditëve tona. Vila dhe nëna parti Mirëpo Vila nuk është e njëjta, ashtu sikurse edhe personazhet e kësaj rrëfenje. Historia e shqiptarëve që enden në trazicion për disa është tashmë historia e shiptarëve që për 35 vjet kanë pasur vetëm këtë zë opozitar. Të tjerë më thonë se shoqëria që është mësuar të ketë një njeri-pushtet-parti për ta idealizuar për 50 vjet, vështirë të mos krijojë një tjetër njeri-pushtet-parti për ta ta idealizuar a besuar verbërisht edhe pas vdekjes së dikujt tjetër. Sepse kështu janë rritur, kështu kanë mësuar të mendojnë, kështu kanë lexuar, kështu kanë jetuar. Për shumë nga ata që kishin nënë partinë, pas viteve ’90 nuk ishte e vështirë ta vishnin demokracinë si babë (po prapë partinë). Mirëpo, demokracia që nuk i lejon këto gabime që e reflektojnë këtë qasje si komunizmi, ndaj thurri një tjetër fabul. Personazhi s’mund të ishte baba, ai ishte doktori. Doktori mund të na shpëtojë Nuk dua të bëj asnjë lloj ironie me këtë nëntitull, ama një farë sarkazme e ndjej sa herë e shoh të ngjitet e të zbresë në të njëjtin ashensor që përdor edhe unë. E kam afër dhe kam dashur gjithnjë ta pyes njëlloj si veten: Pse besojnë kaq shumë njerëzit te një njeri i vetëm, që nuk është vetja. E shoh, serioz me një tabletë në dorë. Mendoj qytetarin digjital që shkruan diçka në atë moment dhe beson vërtet se doktori do ta na shpëtojë edhe njëherë nga një qeveri, e cila po tia numërosh vitet në pushtet me gjasë do të bëhet si ajo që kishin prindërit tanë. Mirëpo, Shqipëria ka ende mjekë të mirë. Dhe gjithmonë ka një doktor, te i cili shpresojmë të gjejmë shërim, ndonëse e dimë fare mirë se ekzaminimin e hershëm që duhet të bëjmë si shoqëri nuk e kemi bërë asnjëherë. Qytetari digjital më fashitet me gjithë portretet që me siguri do has gjatë ditës. E rëndësishme është të shkojmë edhe një herë te doktori, edhe pse e dimë që 35 vjet simptomat nuk janë zbehur me kurën që na kanë dhënë. U dogj pak vila, po pastaj? Po ta marrësh si një akt proteste s’ka asgjë të keqe, madje duket edhe e veshur disi me nota artistike. Fundja Vila 31 që sipas protestuesve përkthehet si Vila e Enverit, përjetoi atë ditë pikërisht atë i duhej, një spektakël molotovësh që përfundimisht do ta kategorizonin atë jo më si Vila e ish – diktatorit. Fatmirësisht, nuk kishte të lënduar dhe artistët që kanë vendosur punishten e tyre aty sidomos të huajt, tanimë kanë panoramën më të qartë të Shqipërisë. Brenda një mbrëmjeje ato kanë përjetuar anën tjetër të shqiptarëve, atë të revoltës. Se të njohësh vetëm bllokun, nuk e ke njohur tërësisht Shqipërinë. Ndaj mendova se, Rama do të mund ta përkthente njëlloj si kënga Ermal Metës: “non mi avvete fatto niente” dhe ta shihte këtë akt si një vepër arti që s’i ka pëlqyer. Ishte vila e ish-diktatorit. Tani ajo mund të quhej ish-vila e diktatorit. Mjafton të luante pak me fjalën ISH dhe pak me flakët e molotovit. Të nesërmen unë prisja që kryeministri Rama ta konsideronte këtë si një tjetër vepër të Berishës. Që estetikisht mund të mos i jetë dukur e bukur, si vepër, por që gjithësesi ishte një vepër e bërë jo nga një artist, por nga një doktor dhe politikan i përjetshëm. Mirëpo, Edi Rama nuk e bëri këtë. Edi Rama me mbesën e Hysni Kapos Edi Rama me mbesën e Hysni Kapos derdhin lot për vilën e Enver Hoxhës. Ky ishte një nga titujt e atij 24-orëshi, ku të gjithë flisnin, jepnin mendime për molotovët në oborrin e ndërtesës, ndërsa vetë artistët që ishin brenda kishin kyçur gojën. Po vazhdoj me një nga postimet që pashë atë ditë duke e cituar: “Rama e quajti sulmin “ një turp shumë të madh ” dhe “ një plagë të hapur në fytyrën e Shqipërisë së re ”, duke theksuar se rezidenca tashmë përfaqëson një destinacion kulturor që i jep vlerë Tiranës dhe vendit. Rama “qan për vilën e diktatorit”, ndërsa vendi përballet me probleme të tjera sociale e ekonomike”. Po çfarë tha Bisej Kapo atë ditë dhe një javë më pas kur e telefonova? Atë ditë në krah të Edi Ramës, që duhet thënë njëlloj siç e thotë Berisha, djali i Kristaq Ramës, mbesa e Hysni Kapos e rrëfente kështu ngjarjen, nën rolin e drejtueses së Art Explora, rrjedhimisht edhe gjithë aktivitetit artistik në rezidencat e vendosura në vilën 31. “Nuk ka skuzim për atë që bënë” Bisej Kapo : Praktikisht dje ishim qetë në rezidencë me program publik ku kemi pasur 100 veta që kanë hyrë në vilë gjatë paradites dhe në darkë vetëm kur dëgjojmë shpërthimet. Ne ishim vetëm sipër, pikërisht tek ai ballkon që e pa gjithë Shqipëria që u duk sikur morëm flakë faktikisht. Dhe në moment artistët u futën në korridorin që është më i mbrojturi, morën fikëset e zjarrit dhe u munduan që të mos na ndodhte ndonjë gjë sepse vila në vetvete është e gjitha prej druri. Zyra është e gjitha dru dhe mund të kishte eskaluar e gjithë situata në një fraksion sekondi. Për mua fakti që nuk e dinin që është rezidenca e arteve, nuk është fare skuzim, madje më duket e turpshme që ta përdorësh si një element që padija të justifikojë veprimin. Një javë më vonë… Një javë më vonë, ekzaktësisht 10 ditë më vonë, duke marrë parasysh gjithë tmerrin që panë me sy artistët dhe Bisej, duke besuar çdo fjalë të Ramës, duke respektuar të shtatat që kemi ne si shoqëri, vendosa t’i shkoj për vizitë në Vilë artistëve. Telefonoj Bisej Kapon dhe i them që dua të vij, t’ju dëgjoj. 10 ditë thonë se presim edhe nga institucionet kur duam të marrim një përgjigje me shkrim ne gazetarët. Mirëpo, shoku nga ngjarja akoma s’kishte kaluar. Bisej ma pret shkurt, pa më lënë shumë të shpjegohem, ndonëse i them se është më e pastër të rrëfehet kjo histori nga ana e artistëve se nga ana e politikanëve, qoftë kjo nga ana e Ramës, Berishës, Ylli Manjanit, portaleve apo nga vetë ti. Mirëpo, ajo u përgjigj nga ana tjetër e telefonit: “ As mos kontakto fare me artistët se janë të shokuar. Mirë do ishte të na lini ta komplentojmë pak në jetë këtë që ndodhi ”. Ndonëse përpiqem t’ju shpjegoj situatën, më kërkon ende kohë. Kështu mbyllet biseda dhe reagimet e vetme që kemi janë më pas ato të Ministrisë së Kulturës, Turizmit dhe Sportit që nga një panair jashtë shtetit po prezanton anën më të bukur të Shqipërisë, atë anën artistike, që ne gazetarëve shpesh na kërkojnë t’i ndjekim me kronika lajmesh, ndonjëherë pa kuptuar se rezidenca apo ekspozita e radhës në Vilën 31 nuk është se kanë rëndësi më shumë apo më pak për mua si gazetare se sa ky lajm edhe pas 10 ditësh ia vlen ta flasësh. E bindur se si gazetare mund të marr më shpejt një njoftim për ekspozitën e radhës nga Art Explora, se sa për ndjesitë e artistëve që përjetojnë molotivin në pranë studios së tyre të punës, unë pres… kur të jetë gati paria… As Gentën, as Jonilën, zgjedh Bisej Kapon dhe Nita Dedën Bisej Kapo është mbesa e Hysni Kapos. Po pse u zgjodh ajo në krye të drejtimit të Art Explora dhe cilat ishin idetë që prej një dekade artikuloheshin nga ato që kanë si mision të zbardhin disa të vërteta? Gjatë regjimit komunist, Vila 31 ishte simboli i pushtetit absolut. Ajo ishte një rezidencë luksoze për kohën dhe vendi ku merreshin vendime që shënonin fatet e miliona shqiptarëve. E rrethuar nga roje të armatosura dhe mister, Vila 31 u bë sinonim i paranojës dhe kontrollit të hekurt që karakterizoi regjimin e Hoxhës. Pas rrëzimit të komunizmit, në vitet ‘90, Vila 31 humbi statusin e saj duke u kthyer në një objekt kureshtjeje dhe debati. Disa mendonin se ajo duhej shkatërruar, si një kujtesë e dhimbshme e së kaluarës. Idetë e zonjave që “bërtasin” për të vërtetat Mirëëpo dy zonja që merreshin me të shkuarën dhe hapjen e dosjeve në shërbim të së vërtetave, Jonila Godole e Gentiana Sula kishin mendime të tjera. Ndonëse nuk i sheh shumë bashkë edhe për shkak të politikave se si janë zhvilluar në këtë vend, disa herë qasja e tyre ndaj vilës ka nota të përbashkëta vizioni. Vila do të duhej të tregonte të vërteta që ishin mbajtur fsherazi, fate njerëzish dhe familjesh shqiptare që janë shkatërruar nga fjalët e mbajtura shënim apo shqiptuar në ato korridore. Madje një nga edicionet e Ditëve të Kujtesës një manifestim i krijuar nga Jonila Godole, u hap po aty në Vilën 31. E mbaj mend pasi atë ditë intrigohesha të vizitoja edhe vendet nëntokë të asaj vile, por nuk e pashë dot të gjithën aso kohe. Ishte ndoshta 7 vjet më parë, 5 vjet më parë se Vila të merrte formën dhe misionin që ka tani. Mirëpo, plani i kryeministrit Rama shkonte disi me idenë e ekspozimit, ndonëse nuk ishte disi tronditëse të shihje portretet e Beqir Ballukut, Mehmet Shehut, Hysni Kapos e të tjerë gjyqtarëve apo hetuesëve që Godole i kish vendosur në cepat e sallonit mikpritës. Të gjithë ndoshta vizitorë një herë në jetë të asaj vile. Mirëpo Rama nuk dëgjoi as Jonila Godolen e as Gentiana Sulën. Secila në misionin e vet duket sikur tha, në momentin kur nisi rikonstruksioni i Vilës 31. Ajo do të kthehej në një rezidencë, njëlloj si ato në të cilat kishte qëndruar Rama kur ishte artist në Paris. Tetor 2023 - Emmanuel Macron në Vilën 31 Në tetor 2023, Ministrja e Kulturës, Elva Margariti, nënshkroi një marrëveshje me fondacionin francez “Art Explora” për realizimin e një projekti të ri, ku Vila 31 do të ishte në shërbim të artistëve dhe të artit. Ceremonia e nënshkrimit u ndoq nga Presidenti francez Emmanuel Macron dhe Kryeministri Edi Rama Atë kohë, ideja ishte e qartë përmes fjalëve të Edi Ramës: “Vila 31, për ta kthyer atë në një hapësirë krijuese për artistët shqiptarë dhe ata ndërkombëtarë, duhet të ruajë elementët autentike dhe dekorin historik të godinës, por të kthehet një qendër që frymëzon dhe sjell sinergji të reja në art” . 16 janar 2025 – Hapet rezidenca, jo më Vila Në ceremoninë e hapjes së rezidencës artistike morën pjesë kryeministri Edi Rama, ministri i Ekonomisë, Kulturës dhe Inovacionit Blendi Gonxhja, si edhe ambasadorja e Francës në Shqipëri. Atë ditë lajmërohej se dy persona janë përzgjedhur për të menaxhuar hapësirën dhe programin e "Vila 31 x Art Explora" në Tiranë: Bisej Kapo dhe Nita Deda. Jo vetëm mbesa e Hysni Kapos Bisej KAPO, drejtuese e Zhvillimit dhe Monitorimit Administrativ është një konsulente e pavarur, me formim të ndryshëm si në sektorin publik ashtu edhe në atë privat. Ajo ka mbajtur postin e shefes së kabinetit dhe këshilltares së ministrit në Ministrinë e Arsimit, Sportit dhe Rinisë. Projektet e saj madhore përfshijnë zhvillimin e Akademi.al, një platformë e-learning, Strategjinë Kombëtare të Arsimit 2020-2025 dhe hapjen e RTSH Shkolla, një kanal televiziv i dedikuar për të mësuar. Përtej punës së saj qeveritare, ka punuar si konsulente e pavarur në iniciativa të ndryshme trajnimi për organizata private, institucione publike dhe OJQ. Ka shërbyer si Asistent Profesore në Universitetin Europian të Tiranës. Ajo është gjithashtu një përkthyese dhe interesat e saj kërkimore aktuale sillen rreth identitetit, ideologjive, analizës së diskursit, analizës vizuale të sferës publike dhe estetikës. Ndaj, edhe këtu duhet të shtoj se po ta pyesësh Bisej për Hysni Kapon, mendimi i saj është larg të qenit e atakuar vetëm se ajo është mbesa e Hysni Kapos. Megjithkëtë, shqiptarët ende vijojnë të shkruajnë për njolla në biografi. E aq më tepër të lexojnë të tilla trakte e në kohë klikimesh, nuk i vë faj edhe portaleve që me titull dalin me mbesën e Hysni Kapos pa rrëfyer anën tjetër të punës dhe misionit të saj. Çka nënkupton edhe një herë se ne ende shquajmë njollat në biografi njëlloj siç bënte besniku i partisë. E dyta u zgjodh Nita Deda si Drejtuese e Programit Kulturor. Ajo njihet në fushën e artit në Kosovë, me 15 vjet përvojë si drejtoreshë festivali, producente filmash, eksperte e komunikimit dhe programuese muzikore. Nita ka mbajtur pozicionin e Drejtoreshës së një prej festivaleve më të rëndësishme në Ballkan, Festivalit Ndërkombëtar të Filmit Dokumentar dhe të Filmit të Shkurtër DokuFest, ku luajti një rol kyç në rritjen dhe strukturimin e tij. Ajo vjen nga një përvojë udhëheqjeje në menaxhimin e artit, komunikimit dhe prodhimit të filmit, duke punuar me institucione dhe organizata të rëndësishme, përfshirë Bienalen Manifesta dhe Galerinë Kombëtare të Kosovës. Po çfarë ndodh me Zonjat Godole e Sula? Genta Sula vetëm pak pas prezantimit të Vilës 31 si rezidenca, propozon “organizimin e një ekspozite të përkohshme që eksploron jetën private të Enver Hoxhës dhe Koçi Xoxes në kontekstin e rolit të tyre drejtues dhe urdhërues në survejimin, kontrollin, përndjekjen dhe terrorin e ushtruar nga Sigurimi i Shtetit”; Mbajtja e ëorkshop-eve dhe seminareve mbi ndikimin e diktaturës në kulturën dhe artin shqiptar, duke theksuar propagandën dhe censurën; Krijimin e materialeve informuese për të dhënë një pasqyrë më të plotë të periudhës së komunizmit në Shqipëri; Shtimi i tureve të specializuara, me histori dhe dëshmi të bazuara në dosjet e Sigurimit, për një edukim historik më të thelluar. Mirëpo, kjo nuk ka ndodhur ende. Po të kishte ndodhur, ndoshta do ta skuzonim sulmin e opozitës dhe Jonila Godole nuk do kishte shkruar “Manual rrëzimi”, që me këtë rast ju ftoj ta lexoni për të kuptuar se të gjithë duan të jenë nga pak heronj... po cilët janë heronjtë e vërtetë? Ato që bërtasin, apo ato që përpiqen çdo ditë dhe doktorin që do t’i lehtësojë, por kanë veç veten? Villa 31: Transformimi i Vilës së Enver Hoxhës dhe dhomat sekrete Projekti i rinovimit të Vilës 31 i është besuar Agjencisë së arkitekturës NeM/ arkitektëve Niney dhe Marca. Çfarë mbajtën e çfarë lanë siç e donte Enveri? Teksti nga Lucie Niney and Thibault Marca – NeM Architects Lëmi kulturor dhe ai i trashëgimisë është një nga fushat e saj të privilegjuara të veprimit përmes konceptimit të ndryshimeve të shumta. Kështu NeM ka realizuar transformimin e Bourse de Commerce në një muze të Koleksionit Pinault, si dhe rezidenca artistësh për Cité internationale des arts, gjithashtu ajo ka qenë një nga kuratorët e pavijonit francez për Bienalen e Arkitekturës së Venecias në 2016-ën. Vila 31 ndodhet në Tiranë, ish-shtëpia e diktatorit të Shqipërisë, Enver Hoxha (1908-85) është një nga punët. Ky projekt është para së gjithash një program pasi transformimi i këtij vendi të kujtesës përbën në vetvete një akt të parë të fortë, duke i ftuar artistët të jetojnë në shtëpinë e një diktatori, i cili imponoi censurë të fortë mbi popullsinë shqiptare gjatë dekadave. Ne ishim të bindur se për të bërë të mundur përshtatjen, relizimi i këtij transformimi duhej të fillonte duke vendosur si pikënisje të prekshme një formë të përhershme/të vazhdueshme/të qëndrueshme të realitetit fizik dhe historik të shtëpisë së Enver Hoxhës. Vila 31 ishte një vilë me më shumë se njëqind dhoma dhe e mobiluar në mënyrë të bollshme. E fjetur që nga vdekja e diktatorit, e banuar pjesërisht dhe përkohësisht, ajo kishte mbetur pothuajse tërësisht në gjendjen e lënë nga diktatori dhe gruaja e tij, duke transmetuar një ngarkesë emocionale shumë të fortë, duke risjellë këtu edhe përmes objekteve më të zakonshme përditshmërinë fantazmë të figurës së tmerrshme të E.H., duke ngjallur një ndjenjë kontradiktore, mes zhytjes në kujtesën e humnerave të një pushteti totalitar dhe gjurmëve të intimitetit të diktatorit dhe familjes së tij në banalitetin dhe brishtësinë e tyre të dukshme. Në mënyrë labirintike, shtëpia na u shfaq ashtu siç e zbuluam, si një metaforë për labirintet dredha-dredha të mendjes së diktatorit. Dekorimi i saj, i krijuar në vitet 1970, ishte një përzierje eklektike frymëzimi nga pallati i Zogut I, mbreti i parë i fundit i Shqipërisë, mobilje të bëra me porosi për funksionet më simbolike, objekte të viteve 1930 të nxjerra në mënyrë të rastësishme nga pronat shtetërore, mobilie të prodhimit në masë që mund të përshkruhen si kitsch. Një tërësi heterogjene, e pasur me përplasje vizuale, prandaj logjika dhe funksioni kryesor mbetet megjithatë përfaqësimi i fuqisë. Fillimisht bëmë një rinovim sistematik. Sipas parimeve të Kartës së Venecias: gjithçka që mund të ruhej u ruajt, në bazë të teknikës së zëvendësimit sipas vendeve të dedikuara fillimisht, pjesa më e madhe e ngjyrave, mobiljeve dhe pajisjeve sanitare. Ndërkohë muret u rilyen, mobiliet u riparuan, qilimat u pastruan, restaurimi ishte gjithashtu hapi i parë për neutralizimin e ngarkesës dramatike të vendit. Në këtë ansambël të ruajtur ne kemi ndërthurur ndarjen e re të studiove të artistëve në organizimin e vjetër familjar. Në këtë mjedis të rifreskuar, më pas i ndikuar nga një organizim i ri hapësinor, u materializua një nivel i ri funksional përmes përzgjedhjes së një mobilimi të ri. Mobiliet e dizenjuara nga dizajner të kombësive dhe kulturave të ndryshme kanë të përbashkët një formë logjike të linjës dhe konceptit, dhe një kontrast të fortë me bollëkun vizual të vendit historik. Kjo shtesë mobiliesh funksionon si një distancim nga rëndësia formale e shtëpisë, duke e prerë realitetin e saj si për ta izoluar atë, duke e zbuluar atë nga një këndvështrim i ri. Ajo çka është shtuar këtu është qartësisht e identifikueshme dhe ky parim i thjeshtë, i përsëritur dhe radikal u lejon banorëve një përshtatje më të qetë dhe më të distancuar nga pjesa tjetër e shtëpisë, pa i shkëputur ata nga historia e saj dhe nga çka ajo përfaqëson. Restaurimi i vilës 31 ka përfunduar, por ajo që ekspozohet sot nuk është aq transformimi në vetvete, por mjeti i transformimit. Kjo do të arrihet tërësisht me praninë e artistëve. Përvetësimi i artistëve do të ndodhë në përballjen me realitetin fizik të përfaqësimit të pushtetit, në aspektet e tij më simbolike apo më të padëmshme. Hapësira fizike dhe mendore e rezidencës, e emancipuar kështu nga zhvillimet e reja, përbën një vend që favorizon introspeksionin dhe krijimtarinë, duke i vendosur artistët në pozitën e aktorëve të vërtetë të transformimit social dhe historik. Fotot : © Philipp Funke 18 Rezidencat artistike Tirana - Vila

E përçudnuam bustin, edhe vilën e diktatorit, po a iku komunizmi?

Luela Myftari

Artikuj të ngjashëm Artikuj

Lufta me Bulevardin

“ALBANIAN FILES”: 4 çështjet e debatueshme

Vajzat e humbura

Librazhdi, qyteti që nuk njihni, me bujtina dhe aventura që ju lënë pa mend

Mariglen Disha, njeriu pas vizionit të ri për Librazhdin!

PROTESTA E MEMEVE TË TALLESH NË ZGRIPIN E PAMUNDËSISË

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Vajzat e humbura

Lufta me Bulevardin

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

PROTESTA E MEMEVE TË TALLESH NË ZGRIPIN E PAMUNDËSISË

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

E përçudnuam bustin, edhe vilën e diktatorit, po a iku komunizmi?

Luela Myftari

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?