Dosja e drogës/ Policë, kryepleqë e trafikantë, të gjithë në tregtinë e hashashit

Vrej se mos t’ha skilja pulat! Kodet e trafikantëve për aksionet e policisë. Këto janë biseda të përgjuara të trafikantëve të canabisit në fshatrat e Krujës, që vunë në lëvizje SPAK dhe policinë për të gjetur, asgjesuar dhe arrestuar elementë të dy grupeve që kishin kontroll mbi plantacionet e Hashashit. Por si përfshihej policia në këto aksione dhe si garantonte mbarëvajtjen e rritjes e kultivimit të drogës. Revista Newsbomb.al zbardh fashikullin hetimor të SPAK-ut për mënyrën sesi operonin trafikantët, policët e kryepleqtë, që kishin hequr dorë nga telefonat nga frika e përgjimeve, dhe kishin kaluar tek radiot. Por edhe këto të fundit u përgjuan. Dhe nga bisedat e tyre, kuptohet skema sesi funksiononin…

Bujar Sefa ishte i bindur që nuk vëzhgohej. Ishte i sigurtë që “miqtë” në polici do ta ndihmonin. Jo vetëm kur bashkëpuntorët e tij në rolin e kujdestarëve të hashashit çmontonin çadrat e kthyera në baza ruajtjeje, por dhe kur ai do t’u jepte një dorë oficerëve për parcelat që duhet të asgjësoheshin dhe që duhet të fotografoheshin si prova teksa po digjeshin në turrë. Në vend të kësaj pune kriminalistike policeske që duhet ta kryenin punonjësit, Sefa bënte “policin” e rremë duke urdhëruar që në katër pika fikse t’u vihej flaka shkurreve të prera sikur ishin rrënjë hashashi dhe që të krijonin sa më shumë tym. Sipas një plani të biseduar më herët, policia duhet të shkonte në vendngjarje, me drogën që nuk ishte asgjësuar dhe do të duhej të raportonte se kishte kapur mijëra rrënjë canabiss sativa që më pas e kishte asgjësuar përmes djegies.