BUXHETI PA EMËR!

Ndryshe nga ajo që u miratua një vit më parë, buxheti i këtij viti ndryshoi 2 herë gjatë rrugës për shkak të situatës që diktoi kriza e çmimeve të larta si rrjedhojë e konfliktit Rusi – Ukrainë. Vitet e fundit prezantimi i buxhetit nga ana e qeverisë nuk ka patur në thelb asnjë të re, dhe nuk mund t’i vendosësh një emër. Buxheti 2023. A është buxheti i krizës? Jo, për energjinë jepen vetëm 102 milion euro. A mbrohen shtresat në nevojë nga rritja e çmimeve? Nuk ka asnjë politikë të re, por vetëm vazhdim i politikës së rritjes së pensioneve dhe pagave të një pjese të administratës (polici, arsim, shëndetësi) që nisi të zbatohej këtë shtator. Sa forcohet politika për të mbajtur në vend “trurin” dhe shtresën e mesme? Rritja për pagat në sektorin e arsimit kap një fond 15 milion euro, vetëm 0.25% të buxhetit. Nga ana tjetër politikat për rritjen e lindshmërisë janë kufizuar në dhënien e bonusit të bebes, shumë e pamjaftueshme për të suportuar shpenzimet reale të familjeve. Të vetmen lëvizje të dukshme deri diku për shtresën e mesme, mazhoranca po e bën në politikën populiste të uljes së taksimit të pagave deri në 50 mijë lekë. Kjo masë gjithsesi nuk i përgjigjet tërësisht mbrojtjes të kësaj klase, kur në të njëjtën kohë parashikohet futja në skemën e tatimit personal e profesioneve të lira, përfshirë dhe ato që ushtrojnë aktivitet me të ardhura të ulta, tatimi i të dy punësuarve ka tre vjet që po aplikohet, ndërsa lufta ndaj evazionit vitin e ardhshëm do të përqëndrohet më së shumti në deklarimin real të pagës dhe të ardhurave nga burime të tjera. Ku janë projektet madhore? Buxheti këtë herë nuk sjell asnjë projekt të ri në infrastrukturë. Të vetmet që do financohen janë projekte për të cilat ideja është prezantuar vite më parë. Zëri i investimeve publike jep para për vepra që ka nisur ndërtimi prej kohësh dhe mbyll projektin e rindërtimit. Qeveria është treguar sërish bujare me fondet e zhvillimit urban të FShZh, projekte të cilat kanë shërbyer më shumë për të mbushur albumin me foto që kryeministri poston në Facebook. Impakti në zhvillim? Nuk dihet, me përjashtim të dy tre rasteve sporadike si Pazari i Korçës apo fshati Dhërmi që sollën një rritje të turizmit brenda vendit. Dashje pa dashje, pjesën më të madhe të investimeve publike do ta marrin koncesionet, ku pavarësisht kritikave qeveria nuk do të stepet në dhënien e 3 kontratave të reja. Projekti i ri në infrastrukutë është ai i Portit Turistik në Durrës por që çuditërisht në relacionin e buxhetit mungon qoftë edhe një fjali për këtë vepër të madhe dhe efektet që do të ketë në të ardhurat buxhetore apo kontributin që pritet të japë në rritjen ekonomike. Në një vit elektroal dhe në mes të krizës së çmimeve të larta ekzekutivi ka vendosur të mos rëndojë barrën e taksimit drejtpërdrejt për kategori të caktuara por ta shpërndajë atë. Përveç ligjit të ri për “Tatimin e të ardhurave”, taksat kryesore do të vendosen mbi konsumin, ndërsa e vetmja politikë për të frenuar fitimin e çmendur të kompanive nga kriza është taksimi për prodhuesit që eksportojnë energjinë elektrike, duke harruar sektorë të tjerë që po përfitojnë nga kriza si grosistët e naftës, drithrave, vajit, produkteve ushqimore dhe plehrave kimike. Në të kundërt me këtë politikë, prodhuesit vendas të birrës do të kenë një barrë më të lartë fiskale, pasi akciza do të aplikohet për të gjithë sasinë e prodhimit duke shtrenjtuar kostot për ta. Bujqësia, arsimi, shëndetësia Në skemat e bujqësisë ky vit është bujar, por pa ide të reja. Mbështetja e fermerevë do të bazohet më shumë te dhënia e naftës pa taksa, disa skema mbështetëse të zbatuara që këtë vit, fondi i ujitjes, kullimit apo vaksinimi i bagëtive. Asnjë ide për të sfiduar krizën e ushqimeve që po përball botën, asnjë ide se si fermeri ynë mund të fitojë më shumë nga kriza. Buxheti i bujqësisë dhe për vitin që vjen është marrë i kopjuar me programet e këtij viti, dhe diku kanë shtuar apo pakësuar ndonjë numër. Edhe në arsim njësoj. Vetëm 3.5 % e prodhimit kombëtar. Libra falas, Pakti për Universitetin, rritja e programeve në gjuhë të huaj, rritja e numrit të nxënësve që arsimohen. Pak a shumë klishetë që thuhen çdo vit. Risia në shëndetësi këtë herë është që nuk do të ketë fond për vaksina Covid, por qeveria do të vazhdojë të mbështetë shërbimin parësor, kontrollin bazë përmes koncesionit të Check Up, do të vijojë rimbursimi i një pjese të barnave dhe brenda buxhetit të kësaj ministrie do të ndahet edhe ai i mbrojtjes sociale, ndihma ekonomike, pagesa e papunësisë dhe mbështetja për personat me aftësi të kufizuar. Rritje për këto shtresa nuk parashikohet, ndërsa qeveria trumbeton disa shtesa që bëri me buxhetin e këtij viti për familjet me shumë fëmijë. Borxhi dhe rritja ekonomike Këtë vit qeveria ka vendosur të ulë borxhin në 67% të prodhimit kombëtar nga 70% që është aktualisht, një masë e cila mbetet e pasiguritë për shkak të goditjes që po japin interesat e larta të huamarrjes. Vetëm për vitin që vjen, kostoja e interesave të borxhit rritet me të paktën 90 milion euro. Defiçiti buxhetor arrin në 2.6% të prodhimit kombëtar, ndërsa shumica e tij do të financohet me hua në tregun e brendshëm, dhe 200 milion euro do të merren në tregun e jashtëm ku me shumë gjasa instrumenti që do të zgjidhet është Eurobondi me rinovimin e një pjese të tij dhe marrjen e borxhit publik. Optimiste gjithnjë në parashikimet për rritjen ekonomike, me buxhetin 2023 qeveria ka bërë një parashikim të ngadaltë të saj në 2.6%, ndërsa përballë kësaj tabloje parashikimet e vendeve fqinjë dhe partnere tregtare me ne, janë për një vit në stanjacion në skenarin optimist dhe reçesion në atë real. “Edhe kur rritja të jetë pozitive, do të ndihet si një recesion për shkak të tkurrjes së të ardhurave reale dhe rritjes së çmimeve” tha gjatë takimeve të tetorit drejtorja e FMN-së Kristalina Georgevna. SHPENZIMET Qeveria do të shpenzojë 5.87 miliard euro gjatë vitit të ardhshëm, për paga, pensione, rrugë, shkolla, ujësjellja dhe pagesat e borxheve të marra në vite. Shpenzimet e saj do të rriten me 227 milion euro më shumë se gjatë këtij viti, ku sërish dominojnë shpenzimet operative. 80% e buxhetit do të ndahet për paga për administratën, pensione, ndihmë sociale, mbështetje për bashkitë dhe pagesën e interesave të borxhit. Qeveria ka zgjedhur që 19 milion euro t’i përdorë për rritjen e pagave, dhe me 70 milion euro është shtuar fondi për pagat e administratës. Për indeksimin e inflacionit për pensionistët do të shpenzohen 10 milion euro, të pamjaftueshme për t’iu përgjigjur rritjes reale të çmimeve, por një masë e justifikuar me rritjen 10% të pensioneve në muajin shtator. Pagesat për pensionet kanë rënduar vit pas viti faturën në buxhetin e shtetit, e cila me sa duket nuk është në të njëjtën linjë me taksat që merren nga fondi i sigurimeve shoqërore. Defiçti i skemës së pensioneve për vitin që vjen prashikohet të jetë 500 milion euro. Që prej nisjes së reformës së pensioneve dhe deri më sot defiçiti është thelluar, i ndikuar dhe nga emigracioni i popullatës. Banka e Shqipërisë rekomandoi së fundi një rishikim të skemës. “Skemat e sigurimeve shoqërore dhe shëndetësore vijojnë të përbëjnë një barrë të ndjeshme për financat e shtetit. Në këtë kontekst, duke pasur parasysh dhe trendet e pafavorshme demografike, Banka e Shqipërisë sugjeron rishikimin periodik të skemës së pensioneve”, tha gjatë fjalës në Komisionin e Ekonomisë guvernatori Gent Sejko. Eskpertët mendojnë se buxheti nuk është tërësisht i fokusuar në përballimin e krizës dhe zbutjes së efekteve që rritja e çmimeve po i jep shtresës së varfër dhe të mesme. “Ky Buxhet nuk ka arritur të parashikojë të ardhurat dhe shpenzimet e ardhshme sipas zërit qytetar dhe të përcjellë me gjuhën e duhur kërkesat e ekspertizës civile. Për ta thënë thjesht, një buxhet që i planifikon kursimet dhe shpenzimet e ardhshme, si dhe të ardhurat dhe shpenzimet e planifikuara, sipas nevojave politike, duke reaguar në mënyrë të sforcuar ndaj pjesës së përgjegjshme të shoqërisë na tregon se fytyra e qytetarit është pak e dukshme në buxhetin e propozuar për vitin 2023”, thotë Eduart Gjokutaj, ekspert për politikat fiskale pranë Altax. “Një mënyrë e mirë për të arritur realisht subvencionimin e kostos së shtuar të jetesës për shtresat në nevojë, por edhe aktivitetet nevojtare duhet ti referohet kostos për mallrat dhe shërbimet më themelore, pasi rreth tyre lidhen edhe shumë nga funksionet e tij”, shton ai. Buxheti për energjinë Energjia ka patur një peshë të vogël në buxhetin vitit 2023, e cila vlerësohet nga grupet e interesit e pamjaftueshme. Qeveria do të shpenzojë 102 milion euro për blerjet e energjisë në import, ndërsa shpresat varen në përmirësimin e situatës hidrologjike vitin e ardhshëm dhe rritjen e prodhimit vendas. Këtë vit ndihma shtetërore për kompanitë në sektorin elektroenergjitik arriti 240 milion euro, e ndarë në 170 milion mbështetje direkte buxhetore dhe 70 milion euro hua e garantuar nga shteti. Planifikimet për vitin e ardhshëm të KESH nuk janë aq optimiste sa ato të buxhetit. Në skenarin bazë, KESH projekton që nevojat për import të arrijnë 700 milion euro, në atë optimist 460 milion euro dhe në skenarin negativ 780 milion euro. “Fondet buxhetore për mbështetjen e energjisë janë të ulta dhe nuk ka një plan të qartë si do të menaxhohet kriza. Është e pakuptueshme, që nuk ka asnjë parashikim buxhetor për vënien në punë të TEC-it të Vlorës, ndërkohë që parashikohen me qindra milionë euro shpenzim për të njëjtin sasi të prodhimit të energjisë nga anijet e sjella nga Bangladeshi me ndikim shkatërrues mjedisor”, thotë Gjergj Buxhuku, administrator i Konfindustrias. Këshillën për rritjen e fondve rezervë në buxhet për të përballuar krizën e energjisë e dha dhe Banka Qendrore. “Qeveria duhet të shtojë fondet e kontigjencës në buxhet dhe të bëjë monitorimin në vazhdimësi të ecurisë së bilancit financiar të sektorit energjetik shqiptar dhe ndërhyrjen në kohë për të shmangur kostot potenciale që mund të vijnë nga çmimet e larta në tregjet e huaja apo situata e prodhimit të brendshëm”. INVESTIMET PUBLIKE DHE KONCESIONET Qeveria ka vendosur të shtojë me 84 milion euro investimet publike, por i vetmi projekt i ri është zgjerimi i segmentit rrugor Elbasan – Përrenjas – Qafë Thanë dhe lotet e tjera të Unazës së Jashtme të Tiranës. Buxhetin kryesor në rrugë do ta marrë vazhdimi i punimeve të nisura për Tunelin e Llogarasë, By Pass-in e Shkodrës dhe Elbasanit. “Kriza ndërkohë është kaluar tangent me këtë projekt buxhetor, pasi nuk ndihet në asnjë nga zërat e tij, se si realisht do t’i bëjë ballë presionit të shtuar për çmimet e importit, nuk ka parashikime për rritje të politikave në formë pakete për mallrat dhe shërbimet e brendshme si dhe nuk ka një harmonizim të politikës fiskale me atë monetare”, thotë Eduart Gjokutaj. “Më së shumti ky buxhet është në pritje të ndodhive dhe jo në pararendje të tyre. Ndërkohë, nga studime të shumta duket se shpenzimet me tepri të buxhetit për investime do të kenë pak ose aspak ndikim në inflacion”, thekson ai. TABELE PUNIMET ME FONDET E BUXHETIT Ndërtim Tuneli i Llogarasë; Bypass i Elbasanit; Segmenti i Unazës së Jashtme të Tiranës; Ndërtim By Pass perëndimor Shkodër; Zgjerim i segmentit dalje Elbasan – Përrenjas – Qafë Thanë Buxheti vazhdon mbështetjen e projekteve në partneritet publik- privat për rrugët, të cilat për vitin 2023 do t’i kushtojnë 40 milion euro. TABELE KONTRATAT KONCESIONARE NË RRUGË Kontrata e Koncesionit për “Ndërtimin e Rrugës së Arbrit”; Kontrata e Koncesionit për “Ndërtimin e Rrugës Milot – Morinë”; Kontrata e Koncesionit për “Ndërtimin e Rrugës Orikum – Dukat, By Pass – Porti i Jahteve” *Në total pagesat buxhetore për të gjitha kontratat koncesionare kapin vlerën 115 milion euro, ku pagesat më të mëdha i merr koncesioni i Rrugës së Arbrit, ai i Strelizimit, Laboratorëve, Skanimi në dogana dhe Inceneratori i Tiranës. TABELE PAGESAT PËR KONCESIONET Ndërtimi dhe Operimi i Rrugës së Arbrit 25 milion Euro Ndërtim, Operim dhe Mirëmbajtje e Rrugës Milot-Morinë 6.5 milion Euro Ndertimi dhe Operimi i Porti Jahteve Orikum – Dukat 7.8 milion euro Shërbimi i Skanimit në Dogana 14.3 milion euro Konçesioni/PPP Kontrolli bazë i popullsisë 35-70 vjeç (check up) 7.5 milion euro Konçesioni/PPP (Ofrimi i setit të personalizuar të instrumenteve kirurgjikale, material mjekësor steril njëpërdorimësh në sallat kirurgjikale, trajtimi i mbetjeve biologjike dhe dezinfektimi i sallave kirurgjikale) 15 milion euro Konçesioni/PPP (Ofrimi i sherbimit te dializes ne 5 spitale rajonale) 7.5 milion euro Ofrimi i Shërbimeve laboratorike spitalore 14.5 milion euro Për përmirësimin e infrastrukturës arsimore në Bashkinë Tiranë 6.5 milion euro Për ndërtimin e landfillit, inceneratorit dhe rehabilitimin e venddepozimeve ekzistuese Tiranë dhe prodhimin e energjisë elektrike 10.8 milion euro. TAKSAT- BURIMI I MBUSHJES SË BUXHETIT Kriza e çmimeve, kostoja në rritje e borxhit dhe politikat populiste do të detyrojnë shqiptarët të paguajnë 470 milion euro taksa më shumë në 2023. Qeveria ka zgjedhur një plan ambicioz të vjeljes së taksave vitin e ardhshëm, të cilat synojnë të shtojnë me 470 milion euro pagesën që qytetarët do të paguajnë pranë autoriteteve tatimore. Për herë të parë në historinë e vendit të ardhurat tatimore do të kapin 29% të prodhimit kombëtar, nga 28% që parashikohet të jenë këtë vit dhe 27% në 2021-n. Buxheti i shtetit planifikon që të arkëtojë vitin e ardhshëm 5.4 miliard euro taksa, ndërsa shpenzimet do të jenë 5.87 miliard euro. Diferenca mes asaj që do të shpenzojë qeveria dhe asaj që do të marrë buxheti nga taksat është 470 milion euro, shifër e cila do të plotësohet përmes huamarrjes shtetërore. Logjika e politikave fiskale që po ndiqet në periudhën e krizës është e çalë, e dobët dhe me mungesa idesh thonë ekspertët. “Paketa fiskale duket se ka mirëllogaritur disa modifikime për të përfituar sa më shumë të ardhura në favor të politikës jovizionare fiskale. Nëse do të konsideronim faktin se si është hartuar ligji i tatimit mbi të ardhurat që pritet të miratohet pa lënë kohë dhe hapësirë për analiza shteruese duket se do të krijojë një barrë të disbalancuar tatimore”, sqaron eksperti Gjokutaj. Në planin e ministrisë së Financave, shpresat janë që tatimi mbi vlerën e shtuar të sjellë 180 milion euro më shumë në buxhet, e pasuar nga kontributet e sigurimeve shoqërore, tatimi mbi fitimin dhe akcizat. Qeveria i bazon parashikimet për shtimin e të ardhurave nga tvsh te mirëadministrimi fiskal dhe lufta ndaj informalitetit, por benefitet që i solli kriza e çmimeve janë të pamohueshme. Vetëm gjatë këtij viti taksat në buxhetin e shtetit janë rritur me 300 milion euro, ku pjesën e luanit e ka patur tatimi mbi vlerën e shtuar. TVSH e vendosur si një taksë në përqindje rrit arkëtimet sa më shumë që çmimi të rritet. Parashikimet për inflacionin vitin e ardhshëm janë se do të mbetet në nivele pak a shumë të ngjashme, dhe se efektet e tij kanë nisur të japin efekt edhe në shtrenjtimin e produkteve që prodhohen në vend, çka e bën të pashmangshëm inflacionin e lartë edhe për vitin 2023. Ky paralajmërim u bë edhe nga Banka e Shqipërisë gjatë seancës në kuvend për dhënien e mendimit për buxhetin 2023. “Analizat tona sugjerojnë se goditja fillestare nga ambienti i huaj ka filluar të transmetohet në strukturën e kostove të prodhimit në vend dhe në pritjet e operatorëve të brendshëm të ekonomisë për të ardhmen, duke rrezikuar të përkthehet në një periudhë të gjatë me inflacion të lartë”, u shpreh guvernatori Gent Sejko. Ekspertët thonë se sërish barra e krizës nuk rishpërndahet në formë të njëtrajtshme mes biznesit dhe konsumatorit, por konsumatori është ai që do të paguajë shumicën e taksave. “Në dukje paketa e bërë publike, ka përjashtuar ligjin për tatimin mbi të ardhurat prezanton një situatë joreale, sikur barra fiskale është e balancuar dhe e shpërndarë drejt sipas parimit të taskimit të ndershëm. Realisht kjo është e pavërtetë, pasi vetëm fakti që tatimpaguesit më të mëdhenj të vendit derdhin jo më shumë se 38% të të ardhurave tatimore në vend tregon se barra mbahet në masë të konsiderueshme nga konsumatorët dhe të punësuarit. Më pak tatim paguajnë ata individë që zotërojnë kapitale dhe investojnë, si dhe bizneset e mesme dhe të mëdha. Ndërkohë, prania permanente e pandryshuar e nivelit të informalitetit rrit edhe më shumë presionin fiskal mbi qytetarët nëpërmjet rritjes së barrës me taksat e konsumit, veçanërisht në këtë kohë të rritjes së inflacionit”, thotë Gjokutaj. Qeveria pret të arkëtojë më shumë edhe nga kontributetet e sigurimeve shoqërore, ku një pjesë e tyre nuk do të vijnë për shkak të rritjes së numrit të të punësuarve, por të rritjes me 4 mijë lekë të pagës minimale dy herë gjatë këtij viti. Të ardhurat nga sigurimet shoqërore këtë vit u shtuan me 40 milion euro, ndërsa për vitin e ardhshëm qeveria do të marrë nga bizneset dhe të vetëpunësuarit 70 milion euro më shumë për zërin e sigurimeve shoqërore. Ambicia për rritjen e të ardhurave buxhetore bazohet edhe në aksionet e shpallura për të luftuar informalitetin. Një nga shtyllat kryesore të administratës tatimore për vitin e ardhshëm do të jetë edhe deklarimi i pagës reale për të puënsuarit, por dhe pagesa e taksave për shumë individë që bëjnë një jetë luksoze dhe rezultojnë pa të ardhura. Aksioni do të kombinohet edhe me një ligj të ri për “tatimin mbi të ardhurat” i cili tashmë do të futë në skemë një listë të gjatë vetëpunësuarisht, jursitë, avokatë, noterë, ekonomistë, dentistë, që njihen si profesione të lira, për t’u vendosur nëj taksë 9% të të ardhurave që marrin, ose mund të zgjedhin që të paguajnë 12% të fitimit neto. Buxheti i vitit të ardhshëm projekton që të marrë 22 milion euro nga këto lëvizje. Një tjetër plan është arkëtimi i të ardhurave nga rihapja e pikave të bastit me një efekt 17 milion euro në buxhet dhe pritshmëritë për të arkëtuar 70 milion të tjera nga tatimi special i prodhuesve të energjisë, zbatueshmëria e kësaj të fundit mbetet për t’u diskutuar pasi për efekt të bilanceve kompanitë mund të rritin shpenzimet ose mund ta shesin energjinë në vend dhe jo ta eksportojnë. Qeveria planfikon që të bëjë ndryshime në akcizën që i vendos biznesit vendas të prodhimit të birrës. Akciza tashmë do të shtrihet për të gjithë sasinë prodhuar. Më parë fasha deri në 200 mijë hektolitra i mbronte tregtarët e nga kjo taksë dhe nxirrte një çmim konkurrues të birrës vednase. “Tashmë 1 litër birrë do të kushtojë 100-150 lekë, çka reflekton një shtrenjtim me 10-15% të çmimit të saj. Kjo do të barazonte çmimin me birrën e importit” thanë përfaqësuesit e kësaj industrie në Komisionin Parlamentar të Ekonomisë. “Me këtë lëvizje kemi dalë edhe nga direktiva e BE dhe praktikisht po godasim biznesin e vogël që prodhon pak në sasi. Fasha për akcizë më të ulët i mbronte dhe tashmë i rrit kostot. Asnjë biznes prodhues birre në Shqipëri nuk prodhon mbi sasinë 200 mijë hektolitra.” thotë Gjergj Buxhuku. Ai shton se kjo masë e kombinuar me dyfishimin e gjobave do të përkeqësojë klimën e të bërit biznes. “Masa të tilla nuk janë ndëshkuese për bizneset dhe nuk korrigjojnë sjelljen e tyre, por i futin në grackën e orvatjeve për të mos marrë gjobën duke bërë pagesa nën dorë dhe duke rritur korrupsionin e inspektorëve tatimorë”. Kërkesat e bëra nga shoqatat e bizneseve nuk janë marrë parasysh. “Ne kërkuam të kishte ulje të barrës fiskale për karburantet dhe gazin që të zbuten pasojat e krizës. Të zgjerohej skema dhe fondet për nxitjen e bizneseve dhe familjeve që të instalojnë pnale diellore, të uleshin taksat për termoizoluesit dhe pajisjet termike që të rriten investimet në këtë fushë dhe të kursehej energjia. Asnjë nga këto nuk u morr parasysh!” përfundon Buxhuku. “Politikëbërësit fiskalë nuk duhet të përkeqësojnë problemin aktual të inflacionit duke rritur kërkesën agregate. Duke pasur parasysh prirjet e ndryshme të shpenzimeve të njerëzve të ndryshëm, duhet t'i kushtohet vëmendje ndikimit të shpërndarjes së çdo ndryshimi në shpenzime ose taksa. Ne nuk duhet të përdorim përvojën e vitit të kaluar si një arsye për të shmangur një përgjigje të fuqishme fiskale ndaj recesionit që mund të nxitet nga kërkesa në të ardhmen. Rënia e thellë dhe e zgjatur në ekonomi mund të nxjerrë një taksë të madhe njerëzore dhe të lërë plagë të qëndrueshme në ecurinë e përgjithshme të ekonomisë”, thotë Gjokutaj.

Nga Ola Xama

Artikuj të ngjashëm Artikuj

Zonjat pas Liderit/ Linda dhe Liria: Eleganca e një pushteti të pazëshëm

Ekonomia që varet nga Importet

Todi e Fatos LUBONJA,13 vitet e burgut pa asnjë takim

Neritan Liçaj, artisti që refuzon të jetë një qytetar që hesht!

Basti i Ramës me brezin e ri

Muzeu i Luftës: Nga MIG-ët te NATO, si ka evoluar ushtria shqiptare!

Artikujt më të lexuar

Zonjat pas Liderit/ Linda dhe Liria: Eleganca e një pushteti të pazëshëm

“Zoja e randë” azil, jeta e re e “yllit” që nuk është vetëm i Shkodrës

Todi e Fatos LUBONJA,13 vitet e burgut pa asnjë takim

Si e (vetë) vranë Vladimir Shehun, ku është letra e fundit???

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Basti i Ramës me brezin e ri

Neritan Liçaj, artisti që refuzon të jetë një qytetar që hesht!

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?