Beteja e Tiranës, kush do sfidojë Veliajn dhe pushtetin?

Zgjedhjet për bashkitë po vijnë me shpejtësi. Kjo garë elektorale besohet se do të jetë më e forta e këtyre dekadave, sidomos ajo për Bashkinë e Tiranës. Teksa Veliaj është pothuajse i konfirmuar, të gjithë sytë janë nga PD se kush do të jetë sfidanti për këtë luftë që duket se do të jetë përcaktuese për fatin e gjithë politikës. Newsbomb bën një analizë dhe hedh një sy tek profilet e emrave potencialë. Do edhe 6 ose 7 muaj që të mbërrijë periudha elektorale e prill-majit, përcaktuar me Kod si koha kur mbahen zgjedhjet në vend. Mirëpo, kësaj radhe, duket se do ja mbërrijmë pranverës së vitit 2023 më shpejt, prej ritmit të ethshëm që do të sjellin zhvillimet. Zgjedhjet për bashkitë janë në prag, dhe ato me gjasë do të jenë më të rëndësishmet në këto dekada, duke qenë se për herë të parë do të masin forcat aktorët më të fuqishëm të politikës në vend, pas ndryshimeve tektonike që ndodhën në kampin e opozitës. Përballë Edi Ramës që do të jetë në vitin e dytë të mandatit të tretë qeverisës, janë Sali Berisha i rikthyer në krye të PD, dhe Ilir Meta, edhe ai i riardhur në krye të LSI-së së tij, që tanimë quhet Partia e Lirisë. Në mungesën e sondazheve të rregullta e krejt të besueshme, zgjedhjet vendore do të jenë matësi real dhe i pari për të treguar se ku gjenden kuotat e Edi Ramës pas 10 viteve në pushtet si kryeministër, dhe ku ato të Sali Berishës dhe Ilir Metës, me gjasë tashmë sëbashku në koalicion. A është opozita në rrugën për të ardhur më në fund në krye, apo Edi Rama vijon i qetë me rilindjen e tij. Pos kësaj, kemi të bëjmë edhe me ndarjen e parë të pushtetit pas kaq kohësh, ku secilën zyrë të vendit e ka mazhoranca në dorë. Bëhet fjalë për bashki të fuqishme, dhe njësi territoriale që do të ndryshojnë drejtim, edhe nëse ato zmadhohen në numër, siç opozita synon me anë të reformës territoriale. E sigurisht mejdani kryesor është Bashia e Tiranës, përplasjet elektorale për të cilën asnjëherë s’kanë qenë vendore, por thellësisht politike. Tirana, kapitali politik dhe financiar i vendit Bashkia e Tiranës përpos se ka buxhetin më të madh, interesat më të fuqishme financiare, dhe ndikimin sipëran në zhvillimet në vend, tanimë është kthyer edhe në rregullin e pashkruar, si karrikja e pashmangshme për të kapur më tej fronin e madh, atë të Kryeministrit. Këndej kalojnë ata ambiciozët e PS ose PD, që më pas shtiejnë në dorë partitë, bëhen shefa të opozitës, e me pak fat më tej, krerë të qeverisë. Rama ndoqi këtë rrugëtim, nga Kryetar Bashkie për 11 vite, u bë bosi i Opozitës, dhe prej 2013, Kryeministër. Në të njëjtin shteg kaloi edhe Basha. Pas 4 viteve si kryebashkiak, mori drejtimin e Opozitës. Mirëpo, nuk ja doli ta plotësojë ciklin deri në fund, për t’u zgjedhur si shef i ekzekutivit për gjithë vendin. Për këtë kod të pashkruar, kjo bashki ka marrë një rëndësi ekstra. Pasiqë ngjan se ai që merr këtë pushtet, merr më vonë të gjithë pushtetin. Me ndarjen e re territoriale, Tirana si bashki ka rreth 900 mijë banorë, dhe rreth 600 mijë votues, ku mesatarisht 50 përqind paraqiten ditën e zgjedhjeve. Nxjerr numrin më të madh të deputetëve në vend. Kufizohet në Veri me Kamzën, në Perendim me Vorën, në lindje me Bulqizën e Librazhdin, në jug me Elbasanin, Peqinin e Rrogozhinën. Tirana është qendra e biznesit, tregtisë dhe shërbimeve në vend, dhe sigurisht, zemra universitare e kulturore. Veliaj merr garanci Gjithnjë para zgjedhjeve nisin disa debate në publik e fillon një shtjellë që lidhet me kandidatët për Bashkinë e Tiranës. Ata janë si me thënë të përzgjedhurit, të pikuarit, dhëndurët, rreth të cilëve bëhet e gjithë zhurma. Edhe pse është në detyrë, siç ndodhi edhe në qershor të 2019, nuk mungojnë as kësaj radhe ide e pëshpëritje publike, rreth Erjon Veliajt. Eshtë në fakt Edi Rama vetë që duket se i nxit. Si për t’i prishur rehatinë, për ta futur në atë gjendjen se asgjë nuk është e sigurtë. Dhe doemos, për t’i treguar se kush është bosi. Gati ngjan sikur kjo lojë, ky tërmet i vogël dhe tërësisht nën kontroll, e argëton shefin e madh, në një mënyrë diabolike. Ai e di mirë se ç’ndodh tek kandidati, ose kandidatët e mundshëm, kur krijon këtë periudhën e suspancës, se si ndikon kjo edhe në shëndetin e tyre mendor, në sjelljen dhe formën që marrin. Kësodore, çalltis një sherrnajë e vogël. Veliaj duket se merr disa dacka në publik, dhe të krijohet ideja se po bëhet dikush gati nga stoli i qeverisë për të hyrë në fushë, por në fund, e gjitha mbyllet, dhe i besuari i Ramës garantohet se është mëtonjësi për mandatin e tretë. Në fillim të shtatorit u deshën disa deklarata, për të shuar stuhinë, ku më përcaktuesja ngjan ajo e kreut të PS, që u shpreh në një takim, se Lalin këtu e kemi, e këtu do ta kemi. Prej asaj dite, Veliaj duket më i qeshur, gati gati, më i lumtur. Me gjithë kostot dhe pakënaqësitë e krijuara, me gjasë, Ramës nuk i dalin hesapet për të hequr nga gara një njeri tanimë të konsoliduar dhe të lidhur fort me faktorë e grupe interesi që kanë peshën e tyre në rezultatin final. Sfida e madhe për PD, kush do të jetë kandidati? Në këto kushte, të gjithë sytë janë nga PD. Kë do të nxjerrë Opozita në këtë betejë të përgjakshme politike përballë Erjon Veliajt, në këtë garë që duket se përcakton fatin e gjithë establishmetit në lojë, dhe jo vetëm të një njësie gjigande të pushtetit vendor. Mund vetëm të imagjinohet se në rast të një triumfi në Tiranë, çfarë euforie dhe adrenaline do të sillte kjo tek demokratët dhe kampi opozitar, dhe se sa hap domethënës do të ishte drejt ndryshimit të pushtetit, në përplasjen e vitit 2025. Janë pikërisht primaret që do ta bëjnë këtë pagëzim. Anëtarët e PD do të përcaktojnë kandidatët në të gjithë vendin. Ky proces pritet të zhvillohet në tetor, dhe besohet se në nëntor, opozita do të ketë zyrtarisht ekipin për vendoret e 2023. Këto ditë përpara se primaret të mbahen, do të zhfrytëzohen për të konsoliduar koalicionin me PL dhe partitë e tjera, nga ku do të dalin edhe zonat, pra bashkitë që do t’u lihen partnerëve. Burime zyrtare pranë PD, i thanë revistës Newsbomb.al, se edhe në bashkitë që do t’u lihen aleatëve, do të ketë primare. Anëtarët e PD sërish do të japin pëlqimin e tyre me votë, mes disa emrave që do të paraqesë fjala vjen PL, apo subjekte të tjera që do të jenë pjesë e koalicionit. Është e padyshimtë se në kryeqytet, do të kandidojë vetë PD. Gjatë gjithë verës janë ravijëzuar disa figura potenciale, dhe kanë kaluar në analizën e tryezave e ambjenteve ku flitet dhe ndikohet në këtë vendimmarrje. Si më të preferuarit shihen Belind Këlliçi dhe Agron Shehaj. Ndërkohë që nuk ka ngelur pa qarkulluar as emri i Keltis Krujës. Këlliçi dhe Shehaj kanë potencialin për të qenë tërheqës përtej anëtarësisë dhe për të marrë vota nga shtresa gri që në Tiranë është edhe më e madhe dhe determinuese. Deputeti dhe ish-kreu i forumit, ka në favor të profilit të tij edhe moshën, çka mund ta bëjë simpatik për shumë të rinj që votojnë edhe për herë të parë. Nga ana tjetër, ai ka tanimë jo pak përvojë politike, duke qënë se ka kaluar pothuajse një dekadë në mes të zhvillimeve të forta jo vetëm në shkallë vendi, por edhe brenda vetë PD-së, ku ka qënë jo pak protagonist. I pakonsumuar, pa barrë nga e kaluara, dhe pa kosto nga qeverisja e mëparshme e PD-së. Po ashtu, prejardhja mbetet një bonus. Ai është tirons, çka nuk është pak në garën për këtë bashki. Shumë prej këtyre rrethanave i ka dhe deputeti Agron Shehaj. Ai ka spikatur në PD si një karakter, që e ka kurajon t’i qëndrojë bindjeve të tij, dhe ka si armë të fortë faktin se është futur në politikë i pasur, e nuk e ka ndërtuar prikën me fonde publike, me tendera, apo me privilegje që burojnë prej politikës këtu. Ka demonstruar forcë denoncuese, dhe konsekuencë në çështjet që ka ngritur. Zor se dikush mund të thotë se është i kapur diku, apo pas një interesi. Mund të jetë ndjellës nga ana tjetër, për një numër jo të vogël votuesish në Tiranë, që janë me origjinë nga zona e Vlorës, nga ku ai e ka prejardhjen. Natyrisht, asnjëri prej kandidatëve potencialë nuk është shprehur në publik se do të jetë, apo se dëshiron të jetë. Por dita po vjen, dhe ky është një moment i pazakontë, një gurë kilometrik, në jetën dhe karrierën e tyre. Kështuqë, vështirë se ndonjëri do të refuzojë t’i nënshtrohet primareve. Tirana, prej vitit 2000 flet për socialistët Prej dy dekadash tashmë, me përjashtim të 4 vjeçarit ku Rama u mund nga Basha, me një garë fare të ngushtë, me një grusht votash, Bashkia e Tiranës ka folur në favor të socialistëve. Në vitin 2011, në koalicion me LSI-në e asaj kohe, PD arriti ta marrë këtë pushtet, dhe votat për kandidatët u ndanë pothuajse në mënyrë të barabartë, 124 mijë e pak secili. Në fillim printe Rama me 10 vota më shumë, por kur u vendos që të numëroheshin edhe ato të hedhura gabimisht në kuti të tjera, rezultati u përmbys në favor të Bashës. 4 vite më vonë, socialistët hodhën në fushë Erjon Veliajn, një i ri ambicioz dhe agresiv politikisht, që pati sukses përballë mjekut të respektuar Halim Kosova. Por, kësaj radhe, PL (ish-LSI) ishte në krah të PS, dhe bashkia ishte zmadhuar shumë duke marrë të gjithë ishkomunat. 160 mijë vota shkuan për Veliajn, ndërsa 116 mijë për Kosovën. PL si subjekt mori rreth 54 mijë vota. Në ato që nuk ishin tamam zgjedhje, në procesin një partiak të qershorit të 2019, Veliaj regjistroi 152 mijë vota në emër të tij, 8 mijë më pak se në 2015. Ndërkohë që, edhe pse nuk kishte garë, 10 mijë vota dolën të pavlefshme, çka besohet se kanë qenë qendrime proteste.

Beteja e Tiranës, kush do sfidojë Veliajn dhe pushtetin?

Artikuj të ngjashëm Artikuj

50 vjet nga Revolta/ SPAÇI – Burgu i komunizmit dhe demokracisë

Jeta e katërt e President Alfred Moisiut

TË FSHETAT E ZGJEDHJEVE 2023: ROLI I FISEVE, OLIGARKËVE, PARTIVE DHE ODIHR

Katër shokët doktorë kavajas, që sjellin bukurinë e jetës dhe madhështinë e qytetit

Të pathënat e ekzekutimit të biznesmenit nga turisti-vrasës

Rajmonda Bulku, si ditën e parë…

Artikujt më të lexuar

SONDAZHI/ Si ndahen votat për Tiranën e Shqipërinë

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Shpellat e jugut, monumente të braktisura dhe të harruara nga shteti

50 vjet nga Revolta/ SPAÇI – Burgu i komunizmit dhe demokracisë

Të pathënat e ekzekutimit të biznesmenit nga turisti-vrasës

Banka Botërore, “dhuratë” qeverisë para zgjedhjeve

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Beteja e Tiranës, kush do sfidojë Veliajn dhe pushtetin?

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?