Beteja e Shkodrës, Kush do ta marrë Rozafën më 6 mars?

Beteja për qendrën më të madhe të Veriut, është më e zjarrta e 6 marsit. Sepse aty janë kreditet e udhëheqësve të Tiranës. Pse ky qytet është kaq i rëndësishëm për Edi Ramën, Sali Berishën, dhe Lulzim Bashën në këto zgjedhje të pjesëshme vendore... Kur i afrohesh Shkodrës, nisin e shquhen totemet për të cilat banorët e qytetit kanë krenari e mburrje, një pjesë jo e pakët edhe pa shkak. Ja ku vjen e plotë kalaja Rozafa. Një kështjellë që ka në gurët e saj shumë shenja rezistence. E fundit që ra në duart e otomanëve, e fundit që iu nënshtrua komunistëve, e vetmja që nuk u mor dot nga socialistët dhe nga rilindasit. Me 6 mars, vendoset fati i një beteje të pahasur më parë në qytet, për ta fituar qendrën më të rëndësishme të Veriut. Kësaj radhe, pretenduesit janë më shumë se zakonisht. Eshtë sërish Edi Rama që tenton mollën e ndaluar. Më anë tjetër, janë dy palët demokrate. Ata të Lulzim Bashës dhe Sali Berishës mes të cilëve do të bëhet lufta e përgjakshme politike, për të treguar se kujt do t’i flasë bastioni. Kujt do t’i thotë “njatjeta”, dega dhe qyteti më i rëndësishëm për PD-në. Kë do të njohë djepi i demokratëve si të parë. Kreun e PD, apo ish-kreun që synon ta largojë drejtuesin, të cilin në fakt as nuk e njeh, e konsideron të shkarkuar me 18 dhjetor, dhe e stigmatizon si Lul Brava i marrë peng nga Rama. Zgjedhjet e pjesshme vendore të javës së parë të marsit, do të zhvillohen në 6 bashki. E Shkodrës, është gara që ka jo vetëm vëmendjen më të madhe publike, por duket se edhe investimin maksimal të liderëve. Eshtë e qartë se këto nuk janë aspak zgjedhje vendore. Pasiqë kushdo që të vijë në krye, bëhet fjalë për një mandat 300 ditësh, derisa të vijë vota e përgjithshme e 2023 për gjithë bashkitë e vendit. Këto janë zgjedhje politike për kreditet e bosëve në Tiranë. Kush merr Shkodrën, duket se do të quhet fituesi i kësaj përplasje, aspak të zakonshme, në një mot të acartë partiak. Atmosfera Deri nga mesi i Shkurtit, asnjë shenjë në qytet nuk tregonte se ka zgjedhje. Sot temperatura elektorale është rritur, dhe sigurisht për këtë kanë ndikuar edhe udhëheqësit e mbërritur nga Tirana, sidomos Sali Berisha. Vetëm një ditë më parë, me 19 shkurt, është çelur zyrtarisht fushata dhe kanë nisur të mbijnë posterat e kandidatëve nëpër pikat kyçe të rrugëve kryesore. Por asnjëherë më parë, afatet dhe datat e KQZ nuk i kanë penguar kandidatët të bëjnë fushatë. Nuk i kanë ndaluar sheshet dhe kthinat të ziejnë. Deri më tani, mëtuesit kanë kryer takime të ngushta, dhe janë shfaqur më së shumti në faqet e tyre në rrjetet sociale. “Një fushatë shumë e vakët, njerëzit janë totalisht indiferentë. Nuk kam parë ndonjë herë më parë si kjo. Ngjan pak me atmosferën e zgjedhjeve njëpartiake të qershorit të 2019. Parashikoj një pjesëmarrje të ulët në votime”, thotë për Newsbomb.al, Simon Shkreli, një prej gazetarëve veteranë të Shkodrës, korespondent i mediave qendrore të Tiranës. Vilsoni, 36 vjeç, ka një biznes të vogël që merret me furnizimin e njësive të ndryshme me makineri kafeje. Ai hyn dhe del në shumë ambjente çdo ditë në Shkodër dhe takon shumë njerëz. Vilsoni shprehet se nuk flitet shumë për këto zgjedhje. Edhe në lokalin e lagjes ku ai pi kafen zakonisht, nuk ka mbërritur ende fushata, dhe ndonjë prej njerëzve të kandidatëve akoma nuk është shfaqur për të kërkuar mbështetje ose votën. Niku është kamarier në një bar të lezetshëm të zonës historike të pedonales në qytet. Kur e pyet nëse do të votojë me 6 mars, pasi dallohet që e ka mbushur moshën, thotë se nuk preferon të merret me politikë. Na sugjeron të flasim me shokun e tij banakier, pasi ai i ka qejf këto gjëra. Aldi, është banakieri. Ai thotë se nuk ka dalluar fushatë kësaj radhe. Pa zhurmë, pa energji, pa tension. Megjithatë, 27 vjeçari është i bindur se sidoqë që të shkojë puna, njëra prej palëve të PD e fiton bashkinë, duke e konsideruar se PS vazhdon të mbetet në minorancë në këtë qytet. Matematika Nëse bëjmë një rrumbullakosje të shifrave elektorale të 4 zgjedhjeve të fundit në Shkodër, del se PD ka të paktën dyfishin e votave në krahasim me PS. Pra nëse me një pjesëmarrje të mirë, PD shkon në 30 mijë vota, PS merr 15 mijë. Me llogjikë, poqese ruhet ky trend historik, i bie që secili kandidat nga dy palët në PD që merr një votë më shumë, del fitues automatikisht. Kjo duke marrë në konsideratë faktin që PSD e Tom Doshit, dhe LSI, në një farë mënyre marrin pak a shumë sasi të përafërt votash, duke i mbajtur ekuilibrat siç janë. Dhe ka dyshime nëse angazhimi i këtyre aktorëve do të jetë maksimal në këto zgjedhje të 6 marsit. Kjo sepse nuk luhet drejtpërdrejt për ta. Zgjedhjet parlamentare 2021 PS 15.848 vota PD 29.893 vota PSD 9.808 vota LSI 7.880 vota Zgjedhjet vendore 2019 (vota për partinë) PS 12.335 PSD 2.638 PD-LSI Bojkot Zgjedhjet parlamentare 2017 PS 20.195 vota PD 25.559 vota LSI 8.891 vota PSD 7.930 vota Zgjedhjet vendore 2015 (vota për partinë) PS 10.884 PD 25,353 LSI 11.790 PR 2.273 Spahia, mjeku që tenton bashkinë Bardh Spahia është një personalitet i rritur në PD mund të thuhet. Që i ri i angazhuar me forumin, më tej ka patur detyra të rëndësishme në Tiranë si zv-ministër shëndetësie, dhe po ashtu deputet në legjislaturën e vitit 2017. Pikat e forta janë grinta që paraqet dhe ambicia e fortë politike. Spahia ka ruajtur kontaktet me strukturat e PD, e sidomos me të rinjtë. Ai ka dhe trashëgiminë e mirë që ka lënë i ati, Ali Spahia, mjaft i njohur në Shkodër. Spahia është mjek në profesion. Në këto zgjedhje, Bardh Spahia është propozuar nga grupi i rithemelimit të PD-së dhe garon nën siglën e koalicionit “Shtëpia e Lirisë”. Dhe nuk është e pakuptimtë, në të gjitha zgjedhjet e fundit, edhe në parti, Bardh Spahia, njeriu i kontributeve të mëdha në dekadën e fundit në PD, u la në harresë nga kryetari i PD, Lulzim Basha. Bushati, biznesmeni me reputacion të mirë Xhemal Bushati gëzon po ashtu një reputacion të mirë në qytet. Ai ka qenë një lojtar lokal, por aktiv. Vjen nga një derë e madhe e qytetit dhe në përgjithësi është marrë me biznes, por nga viti 2007 ka qenë edhe pjesë e pushtetit vendor, një herë si këshilltar, e më tej si kryetar i Këshillit Bashkiak. Me profesion ekonomist, Bushati duket se do të përqendrohet tek njohjet personale, më shumë se sa tek një fushatë e zjarrtë. Një pikë e dobët për të, është se strukturat e PD në Shkodër janë dëmtuar rëndë, pasi Berisha nisi foltoren, duke kaluar pjesa më e madhe me liderin historik. Xhemal Bushati është përzgjedhja e Lulzim Bashës për të marrë bashkinë e Shkodrës por që ka edhe dy pika të forta kundër: Largimin nga drejtimi i qarkut të deputetit Helidon Bushati dhe emërimin në vend të tij të Enkelejd Alibeajt, si dhe votën kundër të kryebashkiakes së deritanishme Voltana Ademi. Angoni, vajza e Jubanëve dhe maskave veneciane Majlinda Angoni, vjen nga një familje e njohur në Shkodër, që janë Jubanët. Ajo është një e majtë në orientim politik, por nuk ka qenë pjesë e styrukturave të PS, derisa Rama e emëroi Prefekte. Para kësaj detyre, ka qenë aktiviste në shoqërinë civile. Ekonomiste me profesion, ka spikatur në sipërmarrjen për maskat veneciane. Angoni ka në favor mbështetjen e madhe shtetërore, dhe shpreson se përçarja e demokratëve do të bëjë të mundur që ndoshta për herë të parë që nga ardhja e pluralizmit, zgjedhjet në Shkodër t’i fitojë e majta. Madje, edhe pse mendon se nuk është një sfidë e thjeshtë, do të shfrytëzojë mbiemrin e saj të vajzërisë dhe impenjimin e strukturave të qeverisë për të fituar për herë të pare një bashki si Shkodra, që duhet thënë se nuk është qeverisur ndonjëherë nga e majta. Shkodra me hallet e veta Shkodra në këto ditë shkurti ngjan e zënë me hallet e veta, me kokën ulur në përditshmërinë e saj me lëvizjet kaotike në qytet. Dallon nga larg se kemi të bëjmë me një popull që nuk jeton në luks, dhe rreket të sigurojë fundin e muajit pa rënë në gropa të mëdha borxhi. Si gjithnjë, nuk mungon vargu i gjatë i grave me biçikleta që feks si gjerdani i përhershëm i metropolit të Veriut. Baret përcjellin atmosferën e kafe-rakisë, e të batutave hidh e prit që prodhojnë të qeshura pareshtur. Në Tiranë e duan shumë kësaj radhe pushtetin e kufizuar lokal të kësaj bashkie. Sikur të fitonte Rama, ai do të kishte më në fund të realizuar një ambicie të shpallur prej kohësh, dhe me gjasë do të ishte rasti që ai të nisë me ato projektet që ka patur gjithnjë në mendje. Po të ndodhë që të triumfojë kandidati i Berishës, do të ishte një tërmet jo i vogël, duke qenë se i kontestuari i madh merr një mbështetje popullore, e veçanërisht nga e djathta historike e vendit. Basha nga ana tjetër, nëse ngadhënjen njeriu i tij, do të konfirmohej në kursin që ka nisur pas 9 shtatorit, do të merrte kohë dhe kredite të fuqishme për të vijuar atë që e ka pagëzuar si luftën ndaj trekëndëshit të Bermudës. Duket kjo arsyeja ndoshta, pse shkodranët nuk janë zhytur kësaj radhe me pasionin që i karakterizon në këtë sherrnajë. Sepse interesat e mëdha janë tjetër kundë, janë në kryeqytet. Kjo përshtypje të qendron si më e konsoliduara në kokë, teksa lë pas Urën e Drinit ku një tabelë shkruan emrat e qyteteve të rëndësishme të kontinentit të vjetër, si Berlin, Vjenë, Pragë, Grac,. Një tabelë kryeneqe e mendjemadhe, që sikur rreket të dëshmojë se në të djathtë të asaj krahine shtrihet Europa, të cilës ky qytet i përket.

Beteja e Shkodrës, Kush do ta marrë Rozafën më 6 mars?

Newsbomb.al

Artikuj të ngjashëm Artikuj

“Non grata”? Tronditja amerikane për Shqipërinë

Bashkimi i pamundur i PD

S.O.S. Bujqësia! Si po dështon qeveria, hipur lesës së qeve!

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Rinia e një diktatori që s’e donte artin

HISTORIA E GRUAS SHQIPTARE/ Nga perçja te teatri, nga malet tek vota

Artikujt më të lexuar

POLICËT e lënë rrugëve: Pa bukë, të pasiguruar e pa shtesë page jashtë orarit

Zengjinet e qeverisë

Ori Nebiaj për politikën dhe filizat e reja të dashurisë

Grinta prej Grifshe e Gridës

VALENTINA DUKA: Gabimi më i madh në jetë kur i thashë “PO” Lulzim Bashës

Rinia e një diktatori që s’e donte artin

“Non grata”? Tronditja amerikane për Shqipërinë

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Beteja e Shkodrës, Kush do ta marrë Rozafën më 6 mars?

Newsbomb.al

Beteja për qendrën më të madhe të Veriut, është më e zjarrta e 6 marsit. Sepse aty janë kreditet e udhëheqësve të Tiranës. Pse ky qytet është kaq i rëndësishëm për Edi Ramën, Sali Berishën, dhe Lulzim Bashën në këto zgjedhje të pjesëshme vendore…

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?