BERISHA/ Rënia e një miti

A është arrestimi i Sali Berishës fundi i një epoke dhe mbarimi i karrierës së tij? Një udhëtim i pashembullt politik që nisi në dhjetor ‘90 me pardesynë e bardhë mes studentëve, e sosi 33 vite më pas me izolimin në banesë. Çfarë ndodh mes demokratëve dhe kush janë pasojat e ndalimit të doktorit. Një raport i plotë i revistës NewsBomb, përtej asaj që shihet çdo ditë në ekran. Dhjetor 1990. Një doktor i njohur zemre bashkohet me studentët në lëvizjen që rrëzoi regjimin komunist dhe solli pluralizmin në vend. E bardhë pardesyja, si e disa intelektualëve të tjerë që u bënë pjesë e revolucionit, e bardhë e ardhmja. U krijua Partia Demokratike. Sali Berisha spikati dhe u imponua që herët edhe pse konkurrentët për të shkuar në krye ishin pesha të rënda. 33 vite më pas, ishte sërish dhjetor kur për doktorin fryu një erë e akullt. Gjykata Kundër Krimit dhe Korrupsionit e vendosi në arrest shtëpie. Akuza; korrupsion. Për më shumë se 3 dekada, demokratët janë mësuar ta shohin liderin e tyre në zyrë, në studio televizive, në sheshe, në foltore. Janë më të pakët kësaj radhe, dhe prej 30 dhjetorit e ndjekin nga një dritare e vogël e katit të 8 të banesës së tij, ku ka improvizuar një foni, dhe i përshëndet me duart që valëvit pa harruar asnjëherë 2 gishtat. “Rruga e Salës”, siç njihej deri më tani, një prej lokacioneve vezulluese të bareve dhe jetës së qejfit në Tiranë, prej ditësh tanimë është kthyer në golgotë dhe frontin e rezistencës opozitare, ku mbështetësit takohen rregullisht, protestojnë, brohorasin liderin që shfaqet në një parvaz në të njëjtën orë. Nuk mungojnë angazhimet për liri e demokraci, ka fjalime dhe thirrje për rrëzimin e regjimit të Edi Ramës. Të vetmit që janë duke vuajtur, janë bizneset e rrugës. Baret dhe restorantet. Që nga dita e fillimit të arrestit shtëpiak për Sali Berishën, asnjë nuk afrohet atyreanëve për të gjerbur ndonjë kafe apo për të pirë ndonjë birrë orëve të vona të natës. Protesta e opozitarëve, u ka shuar punën bizneseve të zonës. Si erdhi vendimi i arrestit Përpara vendimit të GJKKO për arrest për Sali Berishën, në kapërxyell të viteve, SPAK kërkoi detyrim paraqitje dhe ndalimin e lëvizjes jashtë shtetit. Një masë kjo që u pranua gjërësisht, se prekte lirinë. Tjetër gjë që u kontestua, ishte se kjo kërkesë, nuk u dërgua në Parlament për të marrë autorizim, siç ka ndodhur më parë dhe siç parashikon Kushtetuta, në rastin e një deputeti. Si të tillë, si në kundërshtim me Kushtetutën e cilësoi Berisha, dhe nuk iu përgjigj këtij akti të drejtësisë, e refuzoi atë. 3 herë nuk u paraqit ish-Kryeministri në Prokurori, ashtu siç kërkoi masa e sigurisë. Në këto kushte, SPAK, në zbatim të procedurës së parashikuar, kaloi në një shkallë tjetër. Duke e ashpërsuar masën, në arrest shtëpie. Kërkesë e prokurorit Arben Kraja që u miratua nga Gjykatësja Irena Gjoka. Të dy këta të denoncuar fort nga PD dhe të vënë në shënjestër të një fushate disa mujore. Sipas asaj që është zbardhur në media, motivi i gjykatës për të mbërritur tek ky vendim, është se ish-Kryeministri ka pushtetin për të dëmtuar prova apo dëshmi, sfidimi që i ka bërë autoritetit të drejtësisë, dhe vepra penale, pra, korrupsioni që në Kod, dënohet deri në 12 vite burg. Megjithatë, lideri demokrat shpall çdo ditë se në të vërtetë pas persekutimit e goditjes së tij, është Edi Rama dhe se ky është një proces politik për të gjunjëzuar opozitën. Izolim, por jo "mute" Vendimi i Gjykatës, siç edhe pritej, po respektohet pjesërisht. Organi i drejtësisë së re i ka kërkuar Sali Berishës izolim të plotë, në kuptimin e komunikimit. Pra, ka shkruar toga e zezë që lideri demokrat të kalojë në gjendjen "mute", e të ketë kontakt vetëm me familjarë. Sali Berisha është prej 20 ditësh në një kufizim lëvizje, pra gjendet i mbyllur në banesë. Por aspak i izoluar. Ai përdor rrjetin social dhe u drejtohet çdo ditë qindra pasuesve të tij përmes një mikrofoni, dhe e gjitha kjo shkon kudo, në eterin e transmetimit live në disa ekrane. Eksponentë të PS dhe media të njohura si anti-Berishë shprehin shqetësimin për thyerjen e vendimit të gjykatës. Por, kjo nuk ka ndaluar aspak këtë lidhje të re që doktori ka vendosur me demokratët. Vetëm se mungesa e një dritareje të përshtatshme në banesën e tij në kat të 4, e ka detyruar të ngjitet në të 8-tin, brenda të njëjtës shkallë, ku jeton vajza e tij Argita me Jamarbër Malltezin, prej nga ku përshendet e u drejtohet çdo ditë me mesazh mbështetësve që çdo buzëmbrëmje mblidhen në atë që e kanë pagëzuar si Rruga e Rezistencës. A është ky fundi politik i Sali Berishës? I ndarë është opinioni në këtë pikë. Disa mendojnë se procesi i ngritjes së akuzës për korrupsion, më tej masa e sigurisë, dhe vijimi në gjykim, janë si të thuash të paracaktuara. Eshtë marrë një vendim për ta dënuar Sali Berishën, për ta larguar atë nga skena, dhe këto që po ndodhin janë akte të një skenari. E gjitha ka nisur me shpalljen non-grata, e me përplasjen e fortë që doktori pati me Ambasadën Amerikane këtu në Tiranë. Jo pak të tjerë, besojnë se pas kësaj qëndron Edi Rama, dhe flitet dendur për ndikimin e tij tek drejtësia e re. Vetë Kryeministri ka shtruar terren për këtë tezë, ku në disa komunikime është shprehur se SPAK është produkt i tij, pra i PS, dhe jo i partnerëve. Ka një teori tjetër se nevoja jetike e vendit për të luftuar korrupsionin e për të zhdukur pandëshkueshmërinë, kërkon kurbanët e mëdhenj. Kërkon blatime të forta. Dhe më sipërani nga këto të sakrifikuar, do të ishte Sali Berisha. Versione të tilla janë nxitur edhe sepse, nuk është treguar qartazi, me prova e me fakte shpërdorimi i detyrës nga ish-Kryeministri. Ngjan se po procedohet qeverisja e tij me perceptimin se ka pasur korrupsion. Dhe prova kryesore, është pasurimi i dhëndrrit të tij. Po a do të sjellë ky moment, fundin politik të doktorit? Në aspektin juridik, patjetër që masa e sigurisë apo edhe dënimi i pritshëm final, do të jenë një ndalim i karrierës së Sali Berishës. Madje, ndalim i dhunshëm. Por ndërsa procesi kërkon dhe do të marrë kohë, doktori duket se do të vijojë të udhëheqë demokratët dhe beteja vendimtare politike është pas një viti kur do të mbahen zgjedhjet politike. Nëse arrestimi i tij shtëpiak nuk do ta martirizojë dhe nuk do t'i rrisë kuotat në publik, e sigurtë është se as nuk do ta dobësojë. Berisha do të vazhdojë të marrë vendime e do ta drejtojë PD-në e tij, deri në fund, edhe sikur ligji, kodi, gjykata ta detyrojnë të mos kandidojë, të mos jetë në listë, apo të mos dalë nga pallati. S'ka dyshim ama se kjo nuk është pa kosto. Miti i papërkulshmërisë së doktorit që i ka prirë jetës dhe aksionit të tij politik, ka marrë një goditje jo të vogël, kur edhe më fanatikët shohin kokën e tij nga një dritare e katit të 8, e gjithnjë e më shumë do të kuptojnë se nuk e takojnë dot më, e nuk do të bëjnë dot një selfie me të. Nuk e ndihmon këtë gjendje as ajo që po ndodh ndërkohë në PD apo në kampin opozitar. Ajo që shihet si bashkim po merr kohë. Grupimi i Gazment Bardhit nuk po shkrihet me demokratët dhe formula e një unifikimi ende s'ka dhënë rezultate konkrete. Nervozizmi ngjan se po i zë vendin durimit e logjikës. Shenjat e para janë shfaqur. Tensionet mes përkrahësve të Berishës dhe atyre të Bardhit në mbledhjet e përbashkëta të grupit parlamentar kanë shpërthyer. Koha nuk po punon për asnjërin grupim. Indiferenca e Tiranës dhe si mbaron? Si edhe për zhvillime të tjera, të forta e tronditëse, Tirana duket se qëndron e palëkundur në indiferencën e saj. Me lëkurë të trashur dhe e zhytur në punët dhe egon e tij, qyteti duket se nuk ka edhe kësaj here një reagim. Aferat e rënda korruptive të qeverisë dhe arrestimi i liderit të opozitës s'kanë ndikuar në rutinën mendjemadhe të metropolit, e nuk ja kanë prishur terezinë. Mbështetësit që po mbajnë gjallë zjarrin e rezistencës poshtë banesës së doktorit janë kryesisht të organizuar. Eshte kjo arsyeja pse drejtuesit kryesorë të PD dhe deputetët janë caktuar të gjithë nëpër degët e kryeqytetit për të nxitur mobilizim. Ka nisur vërtetë një aksion politik te rruga e Salës, por nuk është aspak e lehtë. Sa do të zgjasë kjo? Procesi gjyqësor mund të marrë muaj, vite. Si do të mbahet ajo protestë, e mbi të gjitha, si do të dilet prej saj? Këto janë disa mundime e tortura të tjera për udhëheqësit demokratë në këto ditë aspak të mira për Partinë Demokratike.

Nga Newsbomb.al

Artikuj të ngjashëm Artikuj

Lufta me Bulevardin

“ALBANIAN FILES”: 4 çështjet e debatueshme

Vajzat e humbura

Librazhdi, qyteti që nuk njihni, me bujtina dhe aventura që ju lënë pa mend

Mariglen Disha, njeriu pas vizionit të ri për Librazhdin!

PROTESTA E MEMEVE TË TALLESH NË ZGRIPIN E PAMUNDËSISË

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

Gjiri i Kakomesë, “Bukuroshja” e braktisur bëhet gati për TURIZËM

PROTESTA E MEMEVE TË TALLESH NË ZGRIPIN E PAMUNDËSISË

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?