Basti i Ramës me brezin e ri

Edi Rama e dinte shumë mirë se listat e deputetëve për zgjedhjet e 11 majit ishin puna më e vështirë për të gjithë, por jo për të që ia dinte kimetin të gjithëve, xhaketave të vjetra dhe të rinjve të zellshëm gati për të marrë angazhime. Vendimet nuk ishin të lehta. Kush do të qëndronte? Kush do të largohej? Kush do të ishte fytyra e re e PS? Për vite me radhë, ka ndërtuar një ekip që e ka ndjekur besnikërisht. Herë pas herë futi në lojë edhe të rinj duke i dhënë shanse, që të paraqiten vetëm një herë në jetë. Por partia sipas konceptit “ramist” ka nevojë për frymë e energji të reja. Rama u shfaq energjik në mbledhjen e fundit, vendimtare për listat e 11-majit. Pati diskutime të gjata, përplasje mendimesh, dilema. Dikush sugjeroi që lista të kishte më shumë profesionistë jashtë politikës, njerëz me eksperiencë në sektorë të ndryshëm. Ndërkaq, informacionet kishin rrjedhur dhe Erion Braçe ishte ndër ata që shprehu pakënaqësi për mungesën e vendit të sigurtë. Kishte nga ata që e donin karrigen e Kuvendit në tabakanë e artë. Një rifreskim i moderuar dukej si receta shëruese në këtë klimë tensioni të krijuar para zgjedhjeve parlamentare. Mes diskutimesh të shumta, Rama thoshte fjalën e fundit. Disa emra të vjetër ishin ende në lojë. Ua njihte mirë forcën e dobësinë; ca të lodhur e ca ende sfidues. Po të rinjtë? A do të ishin ata të aftë të përballonin trysninë e fushatës dhe, më pas, të qeverisjes? Lista u zbardh më në fund duke u publikuar zyrtarisht para kundërshtarëve. Disa thonë ironikisht që “fëmijët shkojnë të parët në dasmë”, por PS në 12 vite ka treguar se del e fundit nga “banketi”. Për të mbyllurat, surprizat ishin të pakta, veçanërisht në Tiranë, “xhaketat e vjetra” kanë vendin e sigurtë, të rinjtë duhet të tregojnë se vlejnë. Kryeministri mbajti fjalën për kryetarët e qarqeve duke i përfshirë te listat e mbyllura. Ndërsa për listat e hapura, lojtarët e rinj ishin të shumtë. Emra të panjohur më parë në politikë, që vinin nga fusha të ndryshme dhe administrata e që do luftonin për një vend në parlament. Strategjia - rinovim i kujdesshëm politik Dalja e listave të kandidatëve për deputet tregoi se PS nuk ka bërë revolucion, por një riorganizim. Të menduar mirë apo jo, këtë do ta tregojnë votat. Ajo që shihet me sy të lirë është se shumë njerëz janë importuar në PS pa një background politik socialist. Pa u sprovuar në votime partiake; pa u angazhuar në fushata zgjedhore, e pse jo, importuar edhe nga parti të tjera siç ishte rasti i profesoreshës së Vlorës që kishte qenë pjesë e “çadrës së Lulit” te kryeministria. A vlen një përzgjedhje e tillë e dhunshme e përfshirjes së të rinjve në një parti si PS? A e përfaqësojnë këta të rinj të importuar elektoratin besnik të PS? Fermerin? Pensionistët? Të rinjtë? Kontributorët? Eshtë pak, por e sigurt se të gjithë të importuarit që nuk e njohin aktivitetin partiak, nga strukturat socialiste nuk do të përqafohen lehtë duke ndikuar dukshëm në një shkëputje të tyre me bazën dhe rrjedhimisht edhe PS nga popullsia e gjerë. Por, ka edhe raste përjashtimore. Në disa qarqe si Berati dhe Dibra, theksi është vendosur tek të rinjtë me eksperiencë ekonomike dhe teknike, duke sugjeruar një fokus në zhvillimin ekonomik dhe administratën publike. Gjirokastra dhe Lezha, ndërkohë, sjellin një kombinim mes akademikëve dhe profesionistëve të rinj, duke reflektuar një përpjekje për të sjellë një administratë më të kualifikuar. Në qarqe si Vlora dhe Kukësi, vërehet një angazhim për përfaqësimin e komuniteteve të ndryshme dhe përfshirjen e grave dhe të rinjve. Ndërsa në Korçë dhe Shkodër, strategjia ka synuar të sjellë një përzierje të figurave politike të afirmuara me kandidatë të rinj që vijnë nga strukturat e partisë dhe administrata vendore. Për PS-në, ky është një test për të matur gatishmërinë e elektoratit për të përqafuar një brez të ri politikanësh. Të rinjtë në listë nuk janë aty vetëm për të mbushur kuota. Ata përfaqësojnë një mundësi për të ndryshuar mënyrën sesi funksionon politika. Megjithatë, mbetet për t’u parë nëse ky brez i ri do të arrijë të imponohet në një skenë politike që vazhdon të dominohet nga figurat tradicionale. Dibra dhe Berati, brezi me profil ekonomik Në Dibër dhe Berat, PS ka zgjedhur një trend të ri: të rinjtë me sfond ekonomik dhe menaxherial po marrin një rol kryesor në skenën politike. Në Dibër, listat e kandidatëve reflektojnë këtë frymë të re. Në listën e mbyllur, një nga emrat kryesor është Blendi Klosi me përvojën shumëvjeçare në PS, ndërsa krahas tij qëndron edhe Alma Selami, një ekonomiste e re që sjell një perspektivë të freskët në këtë garë. Nga ana tjetër, në listën e hapur, shfaqen të rinj të sapodiplomuar ose me eksperiencë të hershme profesionale. Murat Dani, një student i sapodiplomuar në inxhinieri elektronike; Danjel Gjura dhe Dritan Selishta, të dy ekonomistë të rinj, vijnë me ambicie për të aplikuar dijet e tyre në zhvillimin ekonomik të zonës. Ndërkohë, Valentina Haliti, një mësuese e re, sjell një perspektivë të rëndësishme mbi arsimin dhe rolin e tij në komunitet. E njëjta prirje vërehet edhe në Berat. Në listën e mbyllur, spikat kryebashkiaku Ervin Demo, ndërsa krahas tij është edhe Enriketa Jaho, një mjeke e re. Lista e hapur përmban emra të tjerë si: Matea Rexhepi, një koordinatore për rininë, ndërsa Julian Zyla, si analist politik, ofron një qasje të informuar dhe analitike mbi sfidat politike dhe ekonomike. Ardian Islami, një inxhinier i ri, dhe Hysen Buzali, nga fusha e shkencave mjekësore, përfaqësojnë prurjet e reja nga sektori teknik dhe shëndetësor, duke reflektuar një diversitet të nevojshëm në përfaqësimin politik. Gjirokastra dhe Lezha, ekspertiza akademike vs sipërmarrja e re Në Gjirokastër dhe Lezhë, lista e PS pasqyron ekuilibër mes ekspertizës akademike dhe prurjeve të reja nga sipërmarrja dhe fushat ekonomike. Në Gjirokastër, lista e mbyllur kryesohet nga Mirela Kumbaro, ndërsa lista e hapur përfshin emra që sjellin një frymë të re. Anila Dhimitri, një eksperte e re në menaxhimin publik, dhe Pirro Dhima, i sapoangazhuar në PS, përfaqësojnë një brez të ri në politikë. Ndërkohë, Shyqeri Hysi, një profesor i angazhuar në platformën "Deputeti që Duam", sjell një prurje nga bota akademike. Në Lezhë, lista e mbyllur përfshin “ustain” Ulsi Manjën dhe punëtorin e papërtuar Ermal Pacajn, ish-kryetar i FRESSH dhe pjesë e platformës "Deputeti që Duam". Ndërkohë, në listën e hapur dominojnë të rinjtë me prapavijë ekonomike dhe teknologjike. Admir Kadeli, djali i deputetit veteran të ndjerë Gjovalin Kadeli; dhe Andon Gjoni, ekspert i informatikës ekonomike. Klotilda Ndreca nga shkencat sociale dhe Erion Markaj me formim në drejtësi dhe ekonomi përfaqësojnë një brez të ri profesionistësh me një qasje më bashkëkohore. Korça dhe Shkodra, politika rinore dhe përfaqësimi institucional Në Korçë dhe Shkodër, listat e PS reflektojnë një qasje të qartë drejt përfshirjes së të rinjve në politikë dhe forcimit të përfaqësimit institucional. Në Korçë, lista e mbyllur fillon me Niko Peleshin. Por është parë me shumë çudi importimi atje i kryetares së Këshillit Bashkiak të Tiranës Romina Kuko; Spikat edhe Genti Lakollari, një i ri në politikë dhe aktualisht nënkryetar i Bashkisë Devoll. Në listën e hapur, theksi vihet te brezi i ri me ambicie dhe angazhim institucional. Alfons Olldashi, pjesë e platformës "Deputeti që Duam", Eridjon Rustemi, nënkryetar i Bashkisë Maliq, dhe Vinjola Rota, drejtoresha e Arsimit në Korçë, janë tre emra që përfaqësojnë një brez të ri liderësh në administratën publike. Edhe në Shkodër, ky trend është i dukshëm. Në listën e mbyllur, Marjana Koçeku, e angazhuar në platformën "Deputeti që Duam", dhe Onid Bejleri, një inxhinier i ri që mban postin e nënkryetarit të Bashkisë Shkodër, tregojnë se PS ka nevojë për riformatim në këtë qytet. Lista plotësohet me Xhenis Çelën, vajza e deputetit Agron Çela dhe Bujar Rexhën, figura me ndikim në rajon. Ndërsa në listën e hapur spikat Edona Bilali, krahas Ervin Dodës, një jurist dhe aktivist në Fushë-Arrëz. Përfaqësimi i të rinjve shtrihet edhe në fushën e shëndetësisë me Holta Dudën dhe Kejsi Spahijën, dy mjeke të reja. Vlora dhe Kukësi, komunitet & administratë Në Vlorë dhe Kukës, ka një tendencë për përfaqësimin e komuniteteve dhe përfshirjen e profesionistëve të rinj nga administrata publike. Në Vlorë, lista e mbyllur përfshin emra të njohur si Blendi Çuçi dhe Pirro Vëngu, ndërkohë që pasurohet me një figurë të re si Zamira Sina - dekane dhe Erjona Ismaili- gazetare, që sjellin një perspektivë më të freskët. Në listën e hapur bien në sy Ardit Bido me përvojën e tij në administratë si drejtor i Arkivave të Shtetit dhe Ina Majko, e cila përfaqëson komunitetin rom, duke treguar përkushtimin e PS-së për diversitetin dhe gjithëpërfshirjen. Po ashtu, Brunilda Mersini, drejtoresha e Spitalit të Vlorës, dhe Endi Hysenaj, drejtues i AKU-së në Vlorë, sjellin një përfaqësim të fortë të të rinjve në administratën publike. Në Kukës, lista e mbyllur përfshin vetëm Eduart Shalsin, ndërsa lista e hapur prezanton të rinj me eksperiencë në diplomaci dhe aktivizëm politik. Ali Hallaçi, një diplomat i ri dhe ish-prefekt, sjell ekspertizën e tij në qeverisjen vendore, ndërsa Aristogena Poga Geca, një aktiviste e re nga Has, pjesë e platformës "Deputeti që Duam", përfaqëson një brez të ri me angazhim politik dhe shoqëror. Elbasani dhe Fieri, balanca mes profesionistëve dhe aktivistëve Në Elbasan dhe Fier, listat e Partisë Socialiste reflektojnë një ekuilibër mes profesionistëve me eksperiencë dhe aktivistëve të rinj të angazhuar në politikë. Ky kombinim synon të sjellë ekspertizë dhe energji të re në strukturat vendimmarrëse. Në Elbasan, lista e mbyllur përfshin figura të njohura si Arbian Mazniku, Bora Muzhaqi dhe Evis Kushi. Ndërsa në listën e hapur spikasin profesionistë nga fusha të ndryshme, si Aurona Bylykbashi, juriste dhe pedagoge, dhe Florenc Spaho, një mjek me përvojë. Përfaqësimi i të rinjve vjen me Sara Mile, një e re e profilizuar në shkenca politike, dhe Arlind Kullolli, një mjek i ri nga Librazhdi, pjesë e platformës "Deputeti që Duam", që sjell një perspektivë të freskët në politikën vendore. Në Fier, lista e mbyllur përfshin Belinda Ballukun dhe Petrit Malajn, dy “veteranë” të Partisë Socialiste, ndërsa ajo e hapur është dominuar nga të rinjtë me përvojë në administratë dhe aktivizëm politik. Klevis Jahaj, reformator dhe drejtor I përgjithshëm i ujësjellësit, dhe Zeqine Çaushi, juriste dhe pjesë e platformës "Deputeti që Duam", sjellin një kombinim mes politikës dhe ekspertizës ligjore. Po ashtu, Ramion Kurti, një aktivist i FRESH, dhe Asfroral Haxhiu, një mjek kirurg i ri nga Lushnja, përfaqësojnë një brez që synon të ndikojë në politikë përmes angazhimit të tyre profesional dhe shoqëror. Tirana dhe Durrësi, me prurje të reja Si dy nga qendrat më të rëndësishme politike dhe ekonomike të vendit, Tirana dhe Durrësi pasqyrojnë një kombinim mes figurave me eksperiencë dhe prurjeve të reja në listat e Partisë Socialiste. Tirana prodhon 37 mandate, e Rama doli vetë në krye të fushatës sidomos pas rrethanave të reja me burgosjen e kryebashkiakut Erion Veliaj. Në kohën kur PS e Tiranës drejtohej nga Tahiri, kryeqyteti kishte 34 mandate e PS rrëmbeu 18 deputetë. Tani sfida është më e madhe: duhen më shumë mandate e me kryebashkiakun në burg. Në Tiranë, lista e mbyllur përfshin emra me profil të lartë si pedagogia Iris Luarasi, juristi Erjon Malaj dhe zv.ministrja e Turizmit dhe Mjedisit, Ilva Gjuzi. Ndërkohë, lista e hapur është e pasur me përfaqësues nga administrata publike dhe organizatat rinore. Florian Pullazi, kryetar i Njësisë Administrative Nr.2, Antonela Dedej, ish-kryetare e bashkisë së Rrogozhinës, dhe Blendi Sulaj, ish-nënkryetar i Partisë Republikane, janë disa nga emrat që sjellin eksperiencën e tyre drejtuese. Nga akademia dhe shkencat sociale, përfshihen Edlira Dyrmishaj, psikologe, dhe Glindxhet Madhi nga FRESSH, ndërsa nga sektori mjekësor spikat Halil Koloshi, mjek dhe koordinator politik në Bathore. Po ashtu, arkitektja Persida Shkrepa dhe inxhinierja e mjedisit Julinda Dhame përfaqësojnë një brez të ri me fokus në zhvillimin urban dhe çështjet mjedisore. Në Durrës, lista e mbyllur përfshin shkrimtarin Loer Kume dhe sipërmarrësin Skënder Pashaj, ndërsa lista e hapur prezanton një kombinim mes drejtuesve institucionalë dhe figurave të reja politike. Etleva Budini, drejtoresha e Postës Shqiptare në Durrës, dhe Ani Dyrmishi, drejtor i Spitalit të Durrësit, sjellin ekspertizën e tyre në administratë dhe shëndetësi. Arkitektja Jona Osmani dhe eksperti i teknologjisë Indrit Gjoka përfaqësojnë një qasje më teknike në politikë, ndërsa sipërmarrësi Erjon Xhili dhe aktivistët e rinj si Dorina Laçi dhe Gentian Hila reflektojnë një brez që po hyn në politikë me një mentalitet të ri zhvillimi. Hatërmbetjet e munguara E ndryshe nga PD ku lufta e tërheqjeve dhe largimeve ka filluar, në PS diskutime të tilla as nuk ekzistojnë. Nuk u bënë as në publik, dhe fare pak në forume të mbyllura të partisë. Kishte vetëm një tërheqje publike si një lloj refuzimi, ajo e një “veterani socialist” të orëve të para si Petro Koçi. Gjithë të tjerët iu bindën verdiktit të partisë. Madje edhe Damian Gjiknuri, arkitekti i këtij kodi me lista të hapura e të mbyllura; apo edhe një “kritizeri” të përhershëm si Erion Braçe që është hedhur në fushë për të matur forcat me votat. 44,6 vjeç mosha mesatare, reformim apo stabilitet i Partisë Socialiste? Zgjedhjet e 11 majit po afrohen dhe lista e kandidatëve të Partisë Socialiste tashmë është bërë publike nga kryeministri Edi Rama. Një analizë e detajuar e moshës së 186 kandidatëve në të gjitha qarqet e Shqipërisë tregon një mesatare të përgjithshme prej 44,6 vjeç. Ka një ekuilibër mes brezave, me përfaqësim të fortë si të figurave me përvojë, ashtu edhe të emrave të rinj që synojnë të sjellin një frymë të re në administrimin lokal dhe qendror. Mosha mesatare e kandidatëve të PS-së prej 44,6 vjeç reflekton një balancë mes rinisë dhe eksperiencës. Qarku më i "pjekur" është Gjirokastra me 55 vjeç, ndërsa Lezha dhe Elbasani kanë kandidatët më të rinj mesatarisht. Kjo tregon një tendencë për të ruajtur stabilitetin politik duke përfshirë edhe gjeneratën e re në administratë.

Basti i Ramës me brezin e ri

Nga Retin TOKA

Artikuj të ngjashëm Artikuj

Zonjat pas Liderit/ Linda dhe Liria: Eleganca e një pushteti të pazëshëm

Ekonomia që varet nga Importet

Todi e Fatos LUBONJA,13 vitet e burgut pa asnjë takim

Neritan Liçaj, artisti që refuzon të jetë një qytetar që hesht!

Listë hallesh për 11 Maj, Quo Vadis PD?!

MUNDESIA e Erald Kaprit

Artikujt më të lexuar

Si e (vetë) vranë Vladimir Shehun, ku është letra e fundit???

Zonjat pas Liderit/ Linda dhe Liria: Eleganca e një pushteti të pazëshëm

Todi e Fatos LUBONJA,13 vitet e burgut pa asnjë takim

“Zoja e randë” azil, jeta e re e “yllit” që nuk është vetëm i Shkodrës