ALTIN DUMANI, frika e të mbeturit vetëm

Profili i 47 vjeçarit që një muaj më parë mori detyrën e vështirë të drejtuesit të SPAK. Babai i dy vajzave ka mbi vete sytë e gjithë shqiptarëve që presin prej tij rezultate. Kërkojnë prej tij të shkojë tek e vërteta dhe jo të gjejë medoemos viktimat; kërkojnë prej tij t’i shërbejë ligjit dhe jo qëllimeve okulte të palëve të ndryshme; kërkojnë prej tij, t’i qaset detyrës së vet me përulësi dhe ndershmëri. Dhe nëse i ka të gjitha këto cilësi, peshqit e mëdhenj do ta kenë shumë të vështirë t’i shmangen rrjetës së drejtësisë.

Ishte një student i ri i sapodiplomuar kur për herë të parë hyri në një zyrë shteti. Djaloshit të ri nga Shupenza e Dibrës, i qëlloi të ushtronte detyrën e tij të parë publike me ligjin, në qytetin e Sarandës, ku e filloi nga gjërat më të thjeshta, oficer i policisë gjyqësore, në vitin 1999.