Rifirmosja e JP

Mes dritave, muzikës së zgjedhur plot shije, pasqyrave që gjithmonë “thonë” të vërtetën, Joni Peçi edhe një herë, vendos standarde të pakontestueshme në botën e modës, me koleksionin e tij “Prive Collection – Haute Couture Tribute”, nën moton “Tirana Kryeqytet i modës”. Në këtë koleksion i pamë “të gjitha”; bazuar në zanafillën e të bukurës dhe hijeshisë në veshjet madhështore, që sot çdo grua dhe burrë i shoqërisë tonë ka privilegjin e lirshmërinë t’i veshë… E kundërta, nga disa dekada më parë ku shumë copa dhe prerje, mbeteshin ëndrra të pluhrosura në sirtare… Në një mbrëmje spektakolare, ku të pranishëm ishin më shumë se 600 të ftuar vendas dhe të huaj, mes tyre edhe fotografi me famë botërore Alan Gelati, që shijuan koleksionin e ri ekskluziv, të vendosur brenda një kubi të zi “të firmosur” me emrin e tij. “JONI PECI STORE ®”, ky brand që tashmë ka nisur të bëjë histori në industrinë e modës MADE IN ALBANIA, rifirmos për të disatën herë se kur pasionin e kthen në profesion dhe ëndrrat e klientëve besnik por jo vetëm në realitet, sukseset do të jenë të njëpasnjëshme si shpërblimi më i bukur.