“Rraja casting”, 53 sekondat që shkrinë një komisariat, një deputet dhe një Ministër

Videoja që shokoi Shqipërinë dhe mori kokën e të ‘padiskutueshmit’ Bled Çuçi. Çfarë fshihet pas ngjarjes së Borizanës, dhe si janë sot korentet politike brenda kampit të rilindjes. Ç’ministër do të jetë Balla, endrra e të cilit u realizua nga hunjtë e Rrajave. Një raport i plotë i Revistës “Newsbomb” Në kushte normale, duhet shumë kohë, mund, përpjekje, për të sjellë një ndryshim të madh në vendin tonë, siç mund të jetë largimi i një Ministri të Brendshëm, i një deputeti, apo dhe shkrirja e një Komisariati policie. Lypsen kombinim rrethanash, investim i përditshëm, dhe suksesi ende nuk është i garantuar. Por fundjavën e 8 korrikut, të gjitha këto ndodhen falë një zhvillimi që zgjati 53 sekonda. Aq ishte videoja e hedhur nga treg nga klani Rraja, që e tronditi aq shumë shoqërinë, sa solli dorëheqjen e deputetit, largimin e Bled Çuçit, dhe mbylljen e komisariatit të Krujës. Të enjten e 6 korrikut televizionet po përcillin me titra e me dembeli një njoftim të thatë policie për një sherr diku në afërsi të Thumanës, pa e ditur se aty fshihej një ngjarje që 24 orë më vonë do të sillte një prej tërmeteve më të forta në polici, politikë dhe qeveri. Titrat me iniciale njerëzish të përfshirë në sherr, kronika të përditshme këto tek ne, po mbulonin pa dashje shpërthimin e minave në një gurore, shpërthim që solli shkrirjen e një komisariati, largimin e një deputeti, shkarkimin e Ministrit të Bredshëm. Një ditë më pas, të premten me 7 korrik, u pa qartë se çfarë kishte ndodhur në atë lokal buzë rrugës që lidh Thumanën me Fushë-Krujën. Fisi i deputetit Rrahman Rraja bën për spital dy kushërinj, të fisit Maja, që ishin ankuar se gurorja e njerëzve të ligjvënësit nga Nikla, po u prishte banesat. Një protestë që fshatarët e Borizanës e kishin nisur që në Maj, dhe rezistenca e tyre u shfaq dhe në televizionet e Tiranës. Brutaliteti, agresiviteti, primitiviteti, barbaria e atij dhunimi, nga vëllezërit, djali, dhe nipat e deputetit Rraja, shokoi të madh e të vogël. Plandosja në tokë e njërit prej protestuesve, mbajtja e një pistolete mbi kokë, goditja e tij me shkopa bejzbolli e ristela, edhe pasi ishte në gjendje alivanie ku nuk merrte e nuk jepte, ulërimat dhe të sharat, do të ngelen gjatë në memorien e njerëzve. Të gjitha këto produkt i grupimit të besuar të Edi Ramës në atë zonë, e shtabit të tij elektoral sa herë që ka zgjedhje. Të premten, çdo shqiptar po fliste për atë skenë. E gjitha u filmua nga vetë banda dhunuese, e cila duket se është kujdesur të ketë një person edhe për PR. Videoja më pas është shpërndarë. Me gjasë, ajo ka shkuar në më shumë duar se duhet, dhe doli më tej edhe në media. Aq u desh. Ato 53 sekonda, hodhën në tokë çdo propagandë të Ramës për shtet, për barazi para ligjit, për policinë që duam. Ato 53 sekonda, i hoqën çdo lavdi dhe turit ballkanik që lideri rajonal po zhvillonte në ndërkohë, një lëvizje që po mbahej me sforco e me pompë si sukses i shefit të rilindjes, në mediat kryesore në vend. Lakmia që derdhi gotën Klani Rraja ka gjithçka nën kontroll në zonën e Krujës dhe Fushë-Krujës. Forca e tyre vjen jo vetëm se janë një fis i ashpër dhe i madh, por sidomos prej pushtetit dhe lidhjeve me qeverinë. Në mandatin e dytë si ligjvënës i Republikës, më parë kryetar komune, Rrahman Rraja dhe njerëzit e tij ja kishin dalë ta kthenin këtë territor gjysëm ore larg Kryeqytetit dhe 15 minuta larg Aeroportit Ndërkombëtar, “Nënë Tereza” në një çiflig personal. Banorë dhe njohës të zonës tregojnë se për çdo hall që dikush mund të kishte në atë zonë, nga arsimi e deri tek hipoteka, do duhej të faleshin tek ata, tek klani Rraja, për të kryer punë. Por oreksi sa vinte e rritej. Nuk kishin shumë që ishin futur me energji edhe në biznesin e gurores. Dhe arsyeja është se, siç tregojnë disa burime për revistën Newsbomb.al, siguruan një kontratë të majme me ndërtuesin e rrugës Thumanë-Kashar, e cilësuar si një prej më të shtrenjtave që kjo qeveri ka dhënë, një prej koncesioneve më të kritikuara po ashtu. Rrajat do ta furnizonin kompaninë që e ka nisur sakaq punën, me gur, çakull e inerte. Eshtë kjo arsyeja pse ata ishin verbuar dhe shurdhuar, e nuk dëgjonin e nuk shihnin më, asnjë prej pasojave që po shkaktonin me “minierën” e tyre të arit. Duke folur për mediat, një ekspert i fushës, ish-kryetar i Komunës Halil me profesion polic, tha se gjithçka është jashtë kontrollit, pasi në gurore shpërthehet më shumë sasi eksplozivi, nga sa miraton Komisariati. Dyshohet se ka përzierje artizanale, me nitrat e përbërës të tjerë, për të rritur fuqinë e shkatërrimit. Me sa duket, nevoja për ndërtimin e austradës ishte e madhe, dhe fitimi po ashtu. Ndaj, askush nuk po pyeste për ca efekte anësore, siç qe dëmtimi i banesave të banorëve të Borizanës. Rrajat, të zhytur në probleme Edhe pa ndodhur spektakli kafshëror i dhunës së të enjtes së 6 korrikut, Rrajat ishin të zhytur në probleme. Nipat e deputetit akuzohen për vrasje, lidhur me rastin e atenatit ndaj Prokurorit Ndoja, dhe janë të ndaluar. Djali i deputetit ka qënë po ashtu pjesë e kronikës së zezë, pasi qe denoncuar në vitin 2018 për dhunë, nga Xhisiela Maloku. E reja bëri fillimisht denoncim, më pas nga presioni u tërhoq. Po kjo ngjarje edhe pse u mbajt nën kontroll, nuk ja doli dot të mos prodhonte një skandal. Oficeri Nuhu që mori kallëzimin e vajzës, u shpreh në media se ishte kërcënuar nga deputeti, babai i ushtruesit të dhunës, nga vëllai i deputetit, e një tjetër pjestar i fisit. Nuhu tha se ishte kërcënuar në zyrën e tij të punës, me pistoletë në kokë. Oficeri që sot është në azil në Zvicër, u shpreh se e gjitha kjo ndodhi në prani të Taulant Ballës, i cili, për ironi është sot Ministër i Brendshëm, pasi miqtë e tij Rraja, ja dolën të shkaktojnë aq shumë trazira, sa të largohej Bled Çuçi, e më në fund t’i vinte radha kreut të grupit parlamentar të PS, për këtë detyrë që e kishte aspiruar prej vitesh. Mund vetëm të përfytyrohet se çfarë efekti do të kishte pasur nëse ky aksion western asokohe i Rrajave në zyrën e shtetit, të oficerit, të ishte filmuar edhe atëherë, dhe më pas videoja të qe publikuar. E sigurtë është se po të kishte ndodhur kjo, me gjasë do të ishte harruar pas një jave, por ama do ta kishte bërë shumë të vështirë situatën politike. Minat në Borizanë, shpërthimi në Tiranë Bled Çuçi që i pat rezistuar disa skandaleve, si mbytja me skaf e një 6 vjeçareje në Himarë nga një oficer kodosh, Çuçi që ja hodhi pa lagur shumë krimeve të rënda ende pa autor, Ministri që nuk ndjente asnjë përgjegjësi edhe kur brenda në komisariat në kryeqytet, një polic vrau kolegun e tij, ky titullar që kishte kurajon të aktronte para mikrofonit e të këpuste edhe mufka, që shihej si i plotfuqisëm prej lidhjes personale me Ramën, iku papritur një të shtunë korriku, me një shpallje të bosit të tij në rrjetet sociale. Minat e Borizanës e trazuan shumë vendin, dhe shpërthimin kryesor e sollën në Tiranë, në qeveri, me atë ndryshim të paparalajmëruar. Edi Rama nuk mund të pranonte që ajo valë e madhe pakënaqësie e revolte e njerëzve, ajo çmeritje pas publikimit të videos së dhunës nga klani Rraja, të mbërrinte deri tek ai. Masat paraprake që mori, izoluese, që balta e zullumi, ai pisllëk i shpërthimit të lidhjes së krimit me pushtetin e qeverinë e tij, të mos i pëlciste në fytyrë, ishin shkrirja e komisariatit, detyrimi i Rrajës të dorëzonte mandatin, dhe largimi i Ministrit të Brendshëm. Rama ka një termometër të sprovuar tanimë dhe arrin shpejt ta dallojë kur një pakënaqësi diku, mund të shndërrohet në një ortek që i kushton atij vetë. Dhe si në jo pak raste të tjera, ai e ka gjithë lirshmërinë dhe shkujdesjen për të bërë kurban këdo, nëse atij i cenohet qoftë edhe vetëm një fije floku. Aq më tepër ku zhvillimet nga drejtësia, po ja kafshojnë si shkaba, përditë e më shumë mëlçinë politike, duke rrezikuar seriozisht imazhin dhe karrigen e tij, edhe pse në dukje dhe në realitet, Edi Rama sot është më i fuqishëm se asnjëherë tjetër. Tualanti kërkonte një ministri Edhe pse e mbajtur nën një heshtje shembullore, edhe pse e pashpallur, aspirata e ambicia e Taulant Ballës për t’u bërë ministër, sidomos i brendshëm, ka qënë ulëritëse. Ai duroi me përulësi shumë prej rasteve që iknin, shumë prej shanseve që digjeshin. Dhe punëtori i palodhur i partisë, ai që mbante shpatën kryesore në kryqëzatën me PD, ishte përherë e më larg kabinetit qeveritar. Dhe fiks kur askush nuk e priste, teksa qe internuar nga Elbasani në Fier, kur i qe hequr edhe posti kryesor partiak, erdhi shpërblesa për Taulant Ballën. Po ç’ministër do të jetë Balla, kur akuzat më të ashpra në publik, nga opozita kryesisht, ndaj tij, janë për lidhje me bandat më të rrezikshme në vend? A është parë nga Edi Rama si një mundësi për menaxhimin e butë të tyre, në mënyrë që të shmangen shpërthime si ato të Rrajave, që i fundosin atij imazhin? Apo besohet se Taulanti do të ndryshojë aq shumë, sa mund të shndërrohet nga mik i të fortëve, në xhelat të tyre? Në aspektin mirëfilli politik, dhe partiak, promovimi i Ballës është një gjë e vonuar. Brenda socialistëve, ai është nga më punëtorët, dhe një prej më gjakatarëve kundër Berishës e demokratëve. Po ashtu, më i votuari në Republikë, në zgjedhjet e fundit parlamentare. Nuk ka asnjë kriter partiak, që Taulant Balla nuk e plotëson. Por posti i Ministrit të Brendshëm është shumë delikat, dhe kërkon patjetër një figurë që të gëzojë një farë konsensusi edhe të shoqërisë, edhe përtej radhëve të militantëve. Një person që do të mund të komunikojë edhe me opozitën, në rast tensionesh. Nuk dihet me saktësi cilat janë analizat dhe kalkulimet e Ramës për caktimin e Ballës në postin kyç. Tani me gjasë, një fluks tjetër brenda rilindjes po konsolidohet e po rritet, pas atij të Veliaj e të Ballukut. Nëse nuk do të ketë ndonjë surprizë, zgjedhjet e ardhëshme në vend, do të bëhen me Ministër të Brendshëm, Taulant Ballën. Dhe një prej problemeve më të mëdha që kanë zgjedhjet tek ne, janë aktivizimi i bandave. Çfarë lajmi apo oguri është ky, mbetet ta shohim në vijim.

“Rraja casting”, 53 sekondat që shkrinë një komisariat, një deputet dhe një Ministër

Nga Newsbomb.al

Artikuj të ngjashëm Artikuj

Përtej Zvërnecit

PROTESTA E MEMEVE TË TALLESH NË ZGRIPIN E PAMUNDËSISË

35 vjet PS po sto pa m’thuhej si je?

Zvërneci, investimi që do ndryshojë historinë e turizmit shqiptar

Historia e protestave nga ’90: Çdo brez, revoltën e vet

3 italianët e protestës së PD: Qëlluam policinë me patate, për solidaritet!

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gjiri i Kakomesë, “Bukuroshja” e braktisur bëhet gati për TURIZËM

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

“Rraja casting”, 53 sekondat që shkrinë një komisariat, një deputet dhe një Ministër

Nga Newsbomb.al

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?