51 ministrat që Edi Rama u bëri NDERIN E JETËS

Që prej vitit 2013 kur socialistët morën pushtetin, pakkush mund të artikulojë se kujtdo që kontribuoi në fitoren e kësaj force politike, nuk iu dha shanci të shërbente njëherë në funksione të ndryshme. Në një mbledhje në fillim të majit, Edi Rama artikuloi se zgjedhësit jo vetëm socialistë, u bënë këtyre njerëzve “nderin e jetës”. Por si duhet të vlerësohen 51 ministrat socialistë të këtyre 11 viteve qeverisje? Kush janë ministrat më në zë që ndoshta planifikojnë edhe pasardhësin, – nëse Rama vendos të largohet, – dhe të tjerë që hyn e dolën nga qeveria pa e kuptuar fare zyrën ku ishin vendosur dhe punën që duhet të kryenin? Instituti i Studimeve Politike ka bërë analizën e plotë të profilit të njerëzve që qeverisën vendin për tre mandate, shumë prej tyre të akuzuar, të tjerë tërësisht të pazëshëm, e shumë të tjerë pa kurrfarë profili politik apo menaxhues.

“Ne nuk e kemi mundur korrupsionin, aspak. Por jemi futur në mes të një lufte reale. Kush i tradhëton njerëzit e zakonshëm që na kanë dhënë privilegjin të udhëheqim që secilit dhe secilës këtu në këtë sallë i KANE BERE NDERIN E JETES, duke i dhënë mandatin e lartë të përfaqësuesi të një populli, në parlament apo qeveri apo pushtetin vendor, nuk është NE, nuk është as i yni dhe nuk ka asnjë punë me NE. E thënë ndryshe çdo anëtar i kësaj familje politike që bën korrupsion me funksionin është vetëm një tradhëtar i dyfishtë jo vetëm i popullit shqiptar si çdo hajdut me kostum që merr çfarë nuk është e tija po dhe i PS, si çdo parazit që ushqehet me gjakun e trupit ku rritet.