SHTETI PA BREKË

Nuk është titull i pahijshëm, apo vulgar në kuptimin gazetaresk. As mungesë respekti për publikun dhe standardet e profesionit. Viti 2021 në Shqipëri do mbahet mend si viti i Zhveshjes Totale të shtetit dhe popullatës. Popullata u zhvesh lart e poshtë nga çdo e dhënë personale. Shteti i kësaj popullate mbeti nga mesi e poshtë, “pa brekë”, në kuptimin digjital literal të fjalës. Në Shqipëri, gjithkush mund të bëjë sot dedektivin privat, vrasësin, kriminelin, gjobaxhiun, hakerin me armë efikase kibernetike që i shpërndau vetë shteti, si dikur në ’97 kur hapi depot e armëve luftarake. Në Shqipëri, sot gjithkush mund të jetë viktimë e abuzimit, lëndimit, shantazhimit dhe mashtrimit pikërisht se shteti shqiptar vendosi që të dhënat personale të shtetasve të vet t’ua japë gjithë botës, t`i nxjerrë në Pazar! Sot, një grua apo vajzë shqiptare është me vulnerabël se kurrë, krahasuar me çdo grua tjetër në botë. Ajo mund të arrihet, të ngacmohet, intimidohet, dhunohet apo mashtrohet nga çdo maskara brenda dhe jashtë Shqipërisë, i cili ka shtënë në duar “armën” që shpërndau vetë shteti shqiptar përgjatë 2021, databazën e të dhënave personale. 12 Prill 2021 doli në rrjete komunikimi social “Data Tirana”, një bazë të dhënash për 910.061 shqiptarë. Një tabelë exeli ndarë në 20 rubrika, ku përveç 9.127 patronazhistëve alias aktivistët politikë të PS-së, mbante të dhënat personale të gati 1 milion banorëve shqiptarë: Nid-i, Emri, Mbiemri, Atësia, Datëlindja, Numri i telefonit, Vendlindja, Kompania/punësimi, Kodi i Banesës, Qendra e votimit. “Data Tirana”mund të përdorej si aplikacion i thjeshtë, ku nëpërmjet Numrit Unik të Identifikimit Kombëtar (NID) u dekonspirua si identitet sensitiv pothuajse gjithë popullsia shqiptare. Kombinacioni i të dhënave të kësaj data baze, mund të arrinte të identifikonte çdo banor apo votues në Shqipëri. 21 Dhjetor 2021 u përhap në rrjetin “Whatsup” një excel tjetër: “Rrogat - Janar 2021”. Kjo tabelë mbante të dhëna për 637.138 qytetarë shqiptarë: Numrin personal, Vendin e punës dhe Pagën. Në 23 Dhjetor u përhap në “Whatsup” -in popullor, një tjetër excel : “Rrogat – Prill 2021” për 694.473 qytetarë shqiptarë. Tabela mbante dhe një databazë tjetër si faqe të dytë: Numrat e telefonit celular për 910.061 qytetarë. Në të njëjtën ditë (23 Dhjetor) u përhap një excel i tretë, me të dhënat mbi “Targat/automjetet” e 591.965 qytetarëve shqiptarë. Shteti u dorëzua me gjithë kryeministrin e tij, brenda një dite kur pa se shakaja me “patronazhistë” nuk mund të bëhej më, sado bukur të tregohej. Të dhënat sensitive të shqiptarëve, po përhapeshin në botën digjitale në formë eksponenciale nga ora në orë. Shteti s’mund të ndalonte asgjë, thjesht filloi të shfajësohej duke pranuar “fajin” për rrjedhjen dhe vjedhjen e rëndë të të dhënave sensitive dhe personale të shtetasve të vet. Shteti kap “fajtorët” Ndjeshmëria popullore për daljen e “rrogave” rezultoi më e madhe se kur të njëjtët “viktima” digjitale lexuan se kush ishte patronazhisti i tyre që, komentonte dhe garantonte votën e fshehtë. Pagat po përpiheshin me kuriozitet të ethshëm, pastaj me seriozitet nga të gjithë pagamarrësit e Janarit dhe Prillit 2021. Dolën ca të vërteta që shteti nuk mund t`i justifikonte si zakonisht. Çështja “paga” mund të ishte një bombë psikosociale me të cilën as armët politike nuk mateshin dot. Ndaj shteti veproi menjëherë dhe… kapi fajtorët me shpejtësi shembullore, nga Krishtlindjet deri në Vit të Ri. Eni Qirjako, Andi Agaraj - punonjës të tatimeve dhe dy biznesmenët Klodian Sota dhe Endri Ikonomi kapen nga shteti dhe nxirren para popullatës që ende nuk po gëlltiste dot të vërtetat “excel” të pagave Janar - Prill 2021. Prokuroria në 7 Janar 2022, një ditë para datës finale të “zbythjes” nga zyra të Lulzim Bashës dhe të tijve, doli në një konferencë për shtyp për të lançuar suksesin e kapjes së fajtorëve. Punonjësi i tatimeve Agaraj ia kishte shitur për 20 mijë – 30 mijë lekë databazën “excel” disa herë “përmbaruesve privatë” Sota dhe Ikonomi. Të dhënat mediatike dhe të prokurorisë u përplasën për dy emrat e biznesmenëve “përmbarues” që kishin blerë databazat dhe më pas i kishin nxjerrë për publikun. Nuk u tregua arsyeja apo qëllimi i tyre për këtë shpërndarje. Në të njëjtën ditë, Dhoma e Përmbaruesve akuzoi prokurorinë dhe median për prishje të “imazhit”, duke deklaruar se Klodian Sota dhe Endri Ikonomi, nuk ishin përmbarues por mashtrues që merreshin me mikrokredi. Të dhënat e publikuara në të njëjtën ditë nga media të ndryshme hodhën dritë mbi fakte interesante që prokuroria nuk i preku: Endri Ikonomi kishte qenë deri në shtator 2021 administrator i kompanisë “Credit 2 ALL” sh.p.k. Kompania “Credit 2 ALL” ishte krijuar në vitin 2017 për konsulencë dhe aktivitet mbi sistemet e informacionit. Kompania ishte blerë nga një miliarder rus, i quajtur Oleg Boiko, pronar i një grupi financiar, me qendër në Zvicër. Miliarderi rus Oleg Boiko akuzohej nga një raport i kongresit amerikan si person i lidhur me ndërhyrjet ruse në zgjedhjet amerikane. Endri Ikonomi kishte krijuar dhe një kompani tjetër, të quajtur “PRO 3VT”sh.p.k. në qershor 2020. Kjo kompani në QKB ishte regjistruar si Institucion mikrokredie, por në Regjistrin e Bankës së Shqipërisë kompania nuk dilte si e licensuar. Nga ana tjetër, biznesmeni Klodian Sota, personi që blinte për 20-30 mijë lekë excel -et me të dhëna nga Andi Agaraj, kishte krijuar kompaninë “SMART COLLECTION” sh.p.k. për mbledhje borxhesh. Kompania sipas përmbaruesve në denoncimin e tyre publik ishte një “Barakë Financiare” si disa të tjera të kësaj natyre, që mblidhte borxhe duke shantazhuar dhe mashtruar qytetarët. Si u arrestuan me bujë të madhe, të katër “fajtorët” u liruan nga Gjykata e Tiranës. Gjykata vendosi masën e sigurisë “arrest shtëpie” për Klodian Sotën, Endri Ikonomin dhe Andi Agarajn, ndërsa Eni Qirjaku u la në masën e sigurisë “detyrim paraqitje”. Akuzat ndaj 4 “fajtorëve” që shkaktuan tërmetin publik, u shfrynë në gjykatë, ashtu si akuzat e të gjithë të arrestuarve për sulmin me “tokmak” të godinës së PD-së në 8 Janar 2021. Të gjithë u lejuan të shkojnë nëpër shtëpitë e tyre. Hetimi në Shqipëri si ngaherë gjen “fajtorët” por nuk e vërteton dot fajin e tyre para gjykatës. Fabula e hedhur në publik nga letrat që “i rrëshqasin” si përherë sekretit hetimor, tregoi një histori diletantësh ordinerë që kishin bashkëpunuar me njëri - tjetrin sikur kishin vjedhur dhe shitur një biçikletë në një qytet periferik. Eni Qirjako i kishte dhënë me e-mail sa herë ia kërkonte tabelat e pagave shokut të punës në Drejtorinë e Tatimeve, Andi Agaraj. Ky nga ana e tij, megjithëse në gjykatë u mbrojt se i kërkonte për “qëllime studimore” u vërtetua nga hetimi që i kishte shitur tek Klodian Sota për 20-mijë lekë. Klodiani nga ana e tij i shiste për 30-mijë tek Endri Ikonomi. Nuk dihet ende se si ky i fundit ia shiti popullatës mbarë dhe për sa para. Hetimi vazhdon… Drejtesia e zhveshur nga “whatsupi” Kur excel -i i fundit doli në pazarin digjital, u cënua rëndë jo vetëm siguria e qytetarit shqiptar por dhe ajo e sigurisë kombëtare. Disa link-e ekseli të paorganizuara në “whatsup”, sollën një përçarje të fortë popullore. Sikur këto të dhëna të studiohen, analizohen dhe kryqëzohen nga individë, grupe apo struktura me synime jo të mira, apo ato kriminale, me siguri që do linte pa gjumë edhe vetë autoritetet e shtetit bashkë me strukturat që përgjigjen për sigurinë kombëtare. Dekonsipirimi i të dhënave, të identiteteve të punonjësve të shtetit në çdo strukturë dhe i familjarëve, veçanërisht atyre të sistemit të drejtësisë, prokurori, gjykata, polici, shërbim informativ, pa lënë pas shërbimin ushtarak, tatimet, doganat, do i kthejnë punonjësit që mbajnë këto detyra, në shënjestra të lehta të krimit brenda dhe jashtë vendit. Rreziku elektronik është sot problem për shumë vende të zhvilluara të nivelit Gjermani, Itali, USA. Imagjinohet Shqipëria pas kësaj rrjedhje totale informacioni konfidencial dhe sensitiv. Ndoshta kjo mund të jetë dhe një nga arsyet ose shkaqet që vetë SPAK nuk veproi në Prill 2021 kur rreth 160 qytetarë denoncuan vjedhjen e të dhënave personale nga Patronazhistët. Prova që s’kishin nevojë për një hetim të mirëfilltë profesional vërtetonin se numrat e telefonit të qytetarëve ishin marrë apo vjedhur nga portali e-Albania, kur këta kishin hapur llogari të detyrueshme për të përfituar nga shërbimet online. Portali e-Albania, në administrim të AKSHI-t, si pika e vetme e kontaktit, që mundëson aksesin për aplikim në shërbimet elektronike online të ofruara nga administrata publike, sipas kategorive të ndryshme, është jo vetëm provë e pakundërshtueshme, por tashmë ky portal mbetet një minë me sahat që mund të plasë më fort se në dhjetor 2021 po nuk u mor në kontroll shtetëror. Kontrolli shtetëror nga ana e tij është i ekspozuar keq pas daljes së ekselëve me të dhëna sensistive numrash telefoni, identitetesh, adresash, targash të punonjësve apo familjarëve të tyre të “SPAK”, “BKH”, “DPPP”, “DPT”, etj. Imagjinohet se një invasion psikologjik ka filluar të ndjehet tek këto struktura thjesht për faktin se ata njihen tashmë publikisht, dihet sa paguhen dhe detajet e kryqëzuara të informacionit mbi ta, do i bënin këto struktura krejt të padobishme për misionin që janë ngarkuar të kryejnë. Drejt Evropës me transparencë dhe “lakuriqësi” Duke filluar nga Kushtetuta e Shqipërisë që nuk lejon të bëhen publike të dhënat personale pa pëlqim vetjak (neni 35) në legjislacionin tonë penal gjendet një korpus i tërë nenesh që dënojnë veprat penale në këtë drejtim. Sipas avokatëve penalistë, Kodi Penal ka shtatë nene që dënojnë seriozisht konsumimin e këtyre veprave penale (nenin 122, nenin 143/a/2, nenin 293/a, nenin 293/ç, nenin 294, nenin 295, nenin 295/a). Asnjë prej këtyre neneve nuk u përdor për rastin e hetuar të patronazhistëve nga SPAK , apo të katër “fajtorëve” që nxorrën linqet e “pagave” dhe “targave” nga Prokuroria e Tiranës. Kjo është një pikëpyetje juridike dhe teknike po aq sa edhe natyrale, kur kujtohet se çfarë të bën Evropa apo USA kur ju nxjerr të dhënat pa leje shtetërore. Ata i quajnë “liking data” dhe protagonistët “tradhëtarë të kombit”. Rasti Eduard Snoweden është më kuptimploti në këtë drejtim. Shqipëria ka një ligj për mbrojtjen e të dhënave personale. Ligjin me nr. 9887, të vitit 2008. Zyrtari që mbron të dhënat e qyetarëve quhet Komisioneri për “Mbrojtjen e të Dhënave Personale dhe të Drejtën e Informimit”. Kjo zyrë me një staf që paguhet goxha mirë për të na ruajtur ne dhe “veten” nga rrjedhje të tilla si ajo e vitit 2021, u ekspozua më shumë se sa keq në rastin e patronazhistëve kur doli me një vendim administrativ proqeveritar. Mungesa e pavarësisë së plotë që deklaroi kjo zyrë në këtë situatë kaq flagrante, tregoi anën komike sa dhe unike të funksionimit të shtetit shqiptar. Për rastin e “pagave” kjo zyrë me siguri po pret hetimet e prokurorisë, para se të shprehet me rekomandimet e radhës proqeveritare përkundër ekspozimit kriminal të të dhënave sensitive dhe personale të të gjithë qytetarëve të Shqipërisë. Agjencia Kombëtare e Shërbimit të Informacionit e qujatur AKSHI, me Ligjin nr. 10 325, datë 23.9.2010 “Për bazat e të dhënave shtetërore” ka patur dhe ka çdo ditë përgjegjësinë direkte që nëpërmjet “Autoritetit Rregullator Koordinues” të sigurojë bazën e të dhënave shtetërore nga çdo problem i mundshëm. Ngjarja e katër “fajtorëve” ku dy prej tyre janë direkt punonjës të AKSHI-t pavarësisht se u referuan si punonjës IT të tatimeve, tregoi “lakuriqësinë” e këtij institucioni. Mosrespektimi i asnjë standardi bashkëkohor si ai ISO/IEC 27001 nga AKSHI, degjeneroi në rrjedhjen e të dhënave pa asnjë pengesë apo bllokim. Katër “fajtorët” janë viktimat e një episodi që u kryqëzuan publikisht por jo ligjërisht. Lehtësia e marrjes apo nxjerrjes së të dhënave nga pajisjet e AKSHI-t në institucionet e shtetit shqiptar, do duhet të futet në analet historike të “pasigurisë kibernetike”, ku me një USB çfarëdo dhe me 200-mijë lekë mund të kesh shtetin të pasqyruar në një telefon smart. Historia e fajit shtetëror është më e madhe se ajo e katër “fajtorëve”. Të gjithë kanë vite që ndjekin në TV, anoncime dhe reklama se si merret një kredi lehtë, online, madje për 7 minuta nga kompani mikrokredie. Shembuj tipikë janë Iutekredit dhe Kredo.al. Këto kompani “përpunojnë” të dhënat personale të çdo personi që paraqitet për të marrë kredi konsumatore për disa minuta. Si mund t’i përpunojnë të dhënat e një individi për pak minuta sa të “besojnë” të japin para këto kompani? Si sigurohen për punësimin, adresën dhe të dhënave të tjera kur qytetari dorëzon vetëm kartën e identitetit personal? Në qendrat e mëdha të biznesit në Shqipëri, po të ndiqet puna rutinë e një shitësi mallrash, kjo mund t’i ofrojë prokurorisë fakte reale të “rrjedhjes” së të dhënave personale të qytetarëve. Të dhënat personale të secilit qytetar sigurisht që janë blerë nga këto biznese me qendra offshore në të njëjtën formë si blerja që po heton prokuroria për katër “fajtorët” që njohu publiku. Ata kanë çdo të dhënë që ju duhet për të “gjetur” më pas qytetarin që nuk paguan mbrapsht borxhin që lindi për shkak të blerjes së një lavatrice, televizori apo sobe me minikredi. Prokuroria aludoi se mund të jetë duke hetuar edhe në këtë drejtim, por nuk përmendi këto kompani. Si do mbrohemi sot, kur në aspektin psikosocial të shoqërisë është hedhur një bombë e tillë pesimizmi – rrogat? Shumë familje dhe individë kanë humbur gjatë vitit të ri 2022, ekuilibrin emocional. Janë dekurajuar shumë të rinj në vetëvlerësimin profesional dhe individual, ndërsa kanë parë nivelin dhe disnivelin e “rrogave”. IT dhe Infermierë nuk mund të presin më asnjë sekondë dhe të punojnë pranë AKSHI-it dhe QSUT-së. Rrjedhja e rëndë abuzive me të dhënat personale të shtetasve shqiptarë, nxorri në këtë dimër të ftohtë pandemik dy trupa lakuriqë, shtetin shqiptar dhe popullatën e tij.

Nga NEWSBOMB.AL

Artikuj të ngjashëm Artikuj

102 kontejnerët me ngarkesën e errët të maskuar nën hijen e portit

Bjeshkët që marrosën turistët: Nga më e bukura Zoj, tek Xhubleta

Shqipëria 49’ nën lupën e CIA-s: Si t’i ndihmojmë grupet e rezistencës!

Silvana Braçe ekonomistja që pushtoi Skenën e Festivaleve

Ne mbushim 3 vite dhe kemi një dhuratë për ju!

51 ministrat që Edi Rama u bëri NDERIN E JETËS

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Inva Mula: Unë sopranoja e parë shqiptare në skenat evropiane

Bjeshkët që marrosën turistët: Nga më e bukura Zoj, tek Xhubleta

102 kontejnerët me ngarkesën e errët të maskuar nën hijen e portit

PORTO PALERMO, Ferri i të internuarve në Kalanë e bukur të Vasiliqisë

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Lojrat Olimpike gradojnë dy rusë në “Kolonelë” shqiptarë

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?