Emra të rinj, lojë e vjetër/ Si votuan shqiptarët në zgjedhjet e 11 majit

Parlamenti i ri 2025-2029? Kur qytetarët votojnë shpresojnë se do të zgjedhin një parlament, një qeveri dhe një deputet më cilësor, më të aftë, më të përgjegjshëm, më të ndershëm sesa në të kaluarën, dikë që të mbaj premtimet dhe të ndikojë pozitivisht në jetën e tyre. Referuar retorikës elektorale të fituesit, parlamenti i ri do të duhet ta drejtojë vendin drejt BE duke siguruar përmbushjen e kritereve më 2027 dhe pranimin e plotë pas ratifikimit të vendeve anëtare 2028-2030. Që të përmbushë këto pritshmëri atëherë supozohet se parlamenti i ri do të ketë legjitimitet të fortë, përbërje cilësore, agjendë reformash dhe kapacitete lidershipi, cilësi që sistemi ynë kushtetues ia njeh parlamentit.

Ne tashmë e dimë se cili do të jetë parlamenti i ri. Individët më të votuar janë krejtësisht të panjohur në publik dhe produkte të grupeve informale, individë nën hetim zyrtar nga SPAK, të rrëzuar nga Gjykata Kushtetuese, “non grata” nga SHBA, apo të larguar nga vetingu do të jenë gjithashtu pjesë e parlamentit të ri. Janë të dhëna (jo vetëm) simbolike për të kuptuar hendekun e thellë midis asaj që kemi shpresuar, votuar, mbështetur dhe që mund të kemi në vitet e ardhshme. Gjithsesi parlamenti është legjitim dhe brenda tij individët krijojnë nuanca, por vendimmarrjet janë çështje grupi, reformat janë çështje vizioni dhe lidershipi dhe bilanci i parlamentit matet kryesisht nga performanca e përgjithshme dhe aftësia për të përmbushur katër funksionet kushtetuese, – funksionin ligjvënës, funksionin mbikëqyrës, funksionin zgjedhor dhe funksionin përfaqësues.