Silvana Braçe ekonomistja që pushtoi Skenën e Festivaleve

Muzika dje, sot e mot. Rrëfimi i Rajmonda Kondi Reçit, muzikantes së talentuar që i shkëlqejnë sytë kur i përmend koncertet. Kush ishin artistët që vinin në Shqipërinë e izoluar dhe çfarë ndodh me muzikën sot?

“Është e bukur ende sot dhe ka një zë potent, është e mrekullueshme që ditën e parë që e kam parë e ashtu ka mbetur edhe pse vitet kanë kaluar. Në koncertin e parë ishim të dyja të reja. Nuk e mendoja se do ta duartrokisja përsëri pas kaq e kaq vitesh”, më tregonte Rajmonda Kondi Reçi atë mbrëmje në Pallatin e Kongreseve plot emocion. Por shkëlqimin e syve të saj nuk e kam harruar ende edhe pse kanë kaluar disa muaj që nga koncerti i artistëve Marinella e Antonis Remos në Pallatin e Kongreseve.  Ai shkëlqim i syve të saj dhe ato duartrokitje më ulën sot të shkruaj për koncertet e dikurrshme dhe ato që përjeton Tirana sot. Duket e zakonshme sot, por dikur Shqipërinë e izoluar nuk ka qenë edhe aq e thjeshtë. Artistët e huaj që mbërrinin për koncerte numëroheshin me gishtat e njërës dorë dhe sigurisht repertori që do të performonin kontrollohej. Për këtë mendoja teksa ajo duartrokiste dhe kërcente çlirët atë natë. Sepse sidoqoftë edhe lëvizjet e publikut ishin të kontrolluara, edhe duartrokitjet ishin gjithnjë për në fund. Mjaft të kujtojmë performancat e Kozma Dushit, Sherif Merdanit apo Luan Zhegut në festivalet e dikurshme për të kuptuar që jo vetëm artistët nuk ishin të lirë të performonin si duhet, por edhe publiku do të duhej të ishte i kujdesshëm në ekzaltimin që përjetonte.