Bashkim Alibali, Artisti i pakohë…

Këtë tetor Bashkim Alibali do të festojë 65 vjetorin. Një këngëtar që flet pak nëpër intervista, por që radhitet i pari ndër ata që arritën të bëjnë koncert recital në kohën e komunizmit. 150 koncerte recitale kam bërë atëkohë dhe paguhesha 150 lekë, rrëfen ai për revistën Newsbomb.al. Dhe vlerësimi më i madh që ka marrë nuk është monetar, duartrokitjet e spektatorëve janë ato që i kanë mbushur zemrën

Intervista ime e parë me Bashkim Alibalin ka qenë në vitin 2019-të dhe ndonëse njiheshim ju siguroj që nuk ishte fort e lehtë ta bindja për këtë rrëfim të plotë e të gjatë për revistën tonë. U takuam rreth orës 10:30 në një nga baret afër lagjes së tij (lagjen nuk ua them) dhe artisti i njohur ishte super korrekt. Që në nisje të bisedës e pyes se cila është formula e rinisë së tij të përjetshme dhe me humorin që e karakterizon (humor shkodran besoj se nuk keni nevojë për më shumë detaje) më thotë se janë genet e mira, por edhe përkujdesja që bashkëshortja e tij Mimoza tregon për të.

Bashkim Alibali është këngëtari që me zërin e tij bëri të madh e të vogël të dashurohej me këngën e nënës me tekstin e Zhuljana Jorganxhi. “Në Duart e Nënës” mori menjëherë dashurinë e spektatorëve, jo vetëm për tekstin kuptimplotë, por edhe për zërin e papërsëritshëm dhe tonalitetin që i dha Bashkimi.