KURIOZITETE

Pse në Mbretërinë e Bashkuar votohet gjithmonë ditën e enjte?

Në fakt, që prej më shumë se 85 vitesh, në Mbretëtinë e Bashkuar, çdo lloj votimi, si për zgjedhjet parlamentare ashtu edhe për çdo zgjedhje tjetër apo referendum, votimi bëhet gjithmonë të enjten e jo të dielën siç ndodh në shumë vende. Arsyeja? Janë disa interpretime lidhur me këtë por dy janë ato më të besueshmet, që kanë lidhje edhe me njëra tjetrën. Së pari se dita e enjte ka qenë gjithmonë ditë tregu dhe duke qenë se banorët e provincave zbresin nëpër qytete për të shitur produktet e tyre, do të ishin më pranë qëndrave të votimit. Arsyeja e dytë, që besohet edhe si më bindëse, lidhet me ditën e pagave, që në Britaninë e Madhe, tradicionalisht bëhej çdo të premte (pagë javore). Duke qenë se të enjten është dita e fundit e pagës javore, njerëzit nuk do të kishin para në xhep, duke mos pasur kësisoj mundësi të mbushnin pub-et në fundjavë, e për pasojë nën efektin e alkoolit, të harronin të shkonin për të votuar të dielën. Kështu që mbeti dita e enjte si më e përshtatshmja për të siguruar pjesëmarrjen më të madhe.