KURIOZITETE

KUR U SHPIK GIJOTINA

Gijotina, ky mekanizëm vrastar që u shpik në shekullin XVIII për të ekzekutuar të dënuarit me vdekje, nuk u emërtua kështu për shkak të shpikësit të saj, Joseph-Ignace Guillotin (1738-1814), siç besohet nga shumëkush. Guillotin, që ishte mjek e politikan, vetëm sa hodhi idenë për ndërtimin e një mekanizmi të tillë, me qëllimin, paradoksalisht human, për të përshpejtuar sa më shumë ekzekutimin e atyre të mjerëve të dënuar me vdekje, për t’ua minimizuar vuajtjet e ekzekutimit nga sëpata e xhelatit. Mirëpo me gjithë kundërshtitë e tij, edhe pse projekti i një lloji gijotine i atribohet kirurgut tjetër francez, Antoine Louise (për këtë arsye gijotina është quajtur edhe louisette), emri i saj mbeti gijotinë dhe kjo, sipas shumë supozimeve sepse bënte rimë me fjalën machine. Madje vetë Joseph-Ignace Guillotin rrezikoi seriozisht të përfundonte në gijotinë kur u burgos gjatë revolucionit francez. U lirua nga burgu vetëm pas vdekjes së Robespierre.