KURIOZITETE

Pse një ndeshje futbolli ndërmjet dy skuadrave të një qyteti quhet derby?

Në fakt, sado paradoksale që mund të duket, ky term nuk ka lindur nga ndeshjet e futbollit, por shumë kohë më parë se të lindte zyrtarisht ky sport kaq popullor. Ndonëse hipotezat lidhur me këtë janë disa, më e besueshmja është ajo që e lidh këtë me garat e hipizmit që zhvilloheshin në shekullin XVII në qytetin anglez Derby, në kontenë Derbyshire. Që këtej pra edhe termi derby. Më vonë, me popullarizimin në rritje të futbollit, sidomos kur në qytetet e mëdha u krijuan më shumë se një skuadër për qytet, ndeshjet midis dy skuadrave të të njëjtit qytet, për shkak të tifozerive të zjarrta respektive u quajtën derby. Nuk kaloi shumë dhe ky term u ndërkombëtarizua gradualisht në të gjithë botën. Në vende të ndryshme derby është emërtuar sipas simboleve të qyteteve përkatëse. Kështu në Itali, derby Inter-Milan njihet si il derby della Madonnina, (simboli i qytetit të Milanos), Juventus-Torini, il derby della Mole (Mole Antonelliana) kupola simbol e Torinos. etj. Për shkak të rivaliteteve shumë të mëdha derby quhen edhe ndeshje ndërmjet dy skuadrave të një qyteti, por të një njëjtës zonë gjeografike. Kështu, ndeshjet Juventus_Inter e anasjelltas quhen i derby d’Italia.