KURIOZITETE

Pse cappuccino, pija e ngrohtë ka këtë emër?

Ka shumë legjenda që qarkullojnë lidhur me emrin disi të çuditshëm të pijes së famshme që siç dihet është thjesht kafe me qumësht. Ajo që dihet thuajse me siguri të plotë është se emri i saj lidhet kryesisht me ngjyrën karakteristike që merr kjo llojë kafeje kur i hidhet pak qumësht, ngjyrë kafe e hapur që të kujton pikërisht atë të veladonit të fretërve kapuçinë. Duket se termi cappuccino e ka marrë origjinën nga frati i urdhrit të kapuçinëve, Marco da Aviano, i cili në vitin 1683 qe i dërguari i papës në Vjenë me misionin për të bindur fuqitë e mëdha të Europës për t’u bashkuar në një koalicion kundër turqve që po rrethonin kryeqytetin austriak. Kështu gjatë qëndrimit në Vjenë frati hyri në një kafene, që në atë kohë ishin shumë të përhapura, për të pirë një kafe dhe duke qenë se kafeja iu duk shumë e forte, i kërkoi kamerierit t’i hidhte diçka për ta zbutur. Kamarieri nga ana e tij i hodhi pak qumësht dhe kur pa ngjyrën që mori tha “kapuziner”. Pak a shumë kjo është legjenda më e hapur e cappuccino-s, që origjinën e ka në Vjenë, por famën e ka marrë nga Italia.