KURIOZITETE

Pse atentatet vetëvrasëse quhen kamikaze?

Në pamje të parë duket një pyetje me përgjigje relativisht të lehtë, pasi çdokush ka dëgjuar për pilotët vetëvrasës japonezë në luftën e dytë botërore, të cilët kishin për mision të lëshoheshin bashkë me avionin që drejtonin mbi anijet luftarake e aeroplanmabajtëset amerikane, duke u shkaktuar atyre dëme shumë të mëdha. .  Por ama pakkush e di se termi kamikaze nuk ka asnjë lidhje me aktin vetëvrasës Kamikaze në gjuhën japoneze është një fjalë e përbërë nga Kami, që do të thotë hyjni, perëndi, dhe kaze që do të thotë erë. Origjina e këtij termi është shumë e vjetër, që në vitin 1274, flota mongole e Kublai Khan, ndërsa sulmonte Japoninë u shkatërrua nga një taifun legjendar, gjë që u përsërit edhe në vitin 1281, kur stuhia e madhe mbyti shumë anije mongole. Për këtë arsye, japonezët e quajtën stuhinë kamikaze, pra “erë hyjnore” që i mbrojti ata nga pushtimi mongol. Prandaj edhe pilotët japonezë në luftën e dytë botërore, për analogji me sa më lart u quajtën kamikaze, me shpresën e besimin për të shkatërruar flotën amerikane. Me kalimin e viteve termi mori edhe kuptimin me të cilin përdoret sot gjerësisht për të treguar atentatet vetëvrasëse.

Pse disa lokale-kafene tipike franceze quhen Bistrot?

Lidhur me këtë për shumë kohë ka qarkulluar një legjendë urbane, sipas të cilës, në origjinë të këtij termi janë oficerët e ushtrisë ruse. Sipas kësaj legjende, oficerët e ushtrisë ruse që hynë në Paris 1814, frekuentonin shumë pijetoret e vogla nëpër lagjet e Parisit, dhe të irrituar nga ngadalësia me të cilën shërbenin kamarierët, u ulëritnin atyre në rusisht: bistro, (быстро!) që do të thotë shpejt. Por që në fakt etimologët e filologët francezë e hedhin poshtë si krejtësisht të pavërtetë, pas lokalet bistrot kanë ekzistuar shumë kohë para se të vinin ushtarakët rusë. Sipas tyre, origjina e këtij termi mund të vijë nga  bistraud  që do të thotë shërbëtor, bistingo (cabaret) apo bistouille (alkol i cilësisë së ulët). Sido që të jetë, ekspertët francezë bien dakord se etimologjia e kësaj fjale është akoma e papërcaktuar, por janë të gjithë të një mendjeje se nuk ka origjinë ruse.