KURIOZITETE

Pse vaksina ka këtë emër?

Në vitin 1796, kur epidemia e lisë bënte kërdinë në Europë, mjeku britanik Edward Jenner, (1749-1823) kishte konstatuar se fshatarët në zonat ku ai shërbente si mjek, nuk prekeshin nga sëmundja e tmerrshme. Nga studimi i mëtejshëm arriti në përfundimin se fshatarët duke qenë në kontakt të afërt me kafshët shtëpiake, prekeshin nga lia e kafshëve, që është një formë shumë më e lehtë e sëmundjes. Atëherë pati intuitën që të merrte lëngun e fluskave karakteristike të lisë tek lopët e t’ia injektonte një fëmije 8 vjeç me qëllimin që ta sëmurte me variantin e lisë së lopëve, për t’a mbrojtur nga lia virulente e njerëzve. Dhe intuita nuk e gënjeu, sepse fëmija e kaloi fare lehtë. Kështu pra kishte lindur vaksina, e quajtur pikërisht kështu nga vetë Edward Jenner, duke përdorur variantin latin të lopës, që është vacca.