NUREDIN DUMANI, hajduti dibran që u bë killer me pagesë

Sot 35 vjeçar dhe me eksperiencë kriminale 20 vjeçare, policia e ka pasur gjithmonë para syve, por nuk i kushtoi asnjëherë rëndësinë që duhet të kishte. Në dosje emri i tij del për vjedhje makinash, pengmarrje personi, shfrytëzim prostitucioni…por gjithmonë lihej i lirë. Deri sa shpërtheu si vrasës me pagesë, e i tregoi të gjitha vetë. Çfarë shkruhet për të në skedat e policisë, dhe historia tragjike e vajzës që trafikoi në Francë me qëllime prostitucioni, e parrëfyer më parë…

“Unë jetoja në Durrës, me babain, mamanë, dhe vëllezërit. Të gjithë në një banesë. Asnjëherë nuk kam qenë i punësuar, por i vetëpunësuar në tregun e fruta perimeve. Më pas pësova një aksident, u operova dhe e kisha të pamundur që punoja. Dhe hapa një dyqan për tregëtimin e këpucëve të pëdorura”.

Kështu prezantohet përpara prokurorëve Nuredin Dumani, njeri që ka vendosur të flasë dhe që gjatë katër viteve të fundit ishte ‘most wanted” i drejtësisë derisa krimi ku ai mbeti i plagosur i çoi policët në apartamentin ku ai fshihej i plagosur.